Eezira 7:1-28
7 Nuumala itthu iya, okathi mwene Artaxerxe a oPersia aalamulela awe, Eezira aahitthika. Owo aari mwaana a Seraya, mwaana a Azariya, mwaana a Hilikiya,
2 mwaana a Xalumi, mwaana a Sadoki, mwaana a Ahitubi,
3 mwaana a Amariya, mwaana a Azariya, mwaana a Merayothi,
4 mwaana a Zerahiya, mwaana a Uzi, mwaana a Buki,
5 mwaana a Abixuwa, mwaana a Pineha, mwaana a Eleyazari, mwaana a Aroni, mukhulupale a anamukuttho.
6 Eezira owo, aatthinke oBabilonia. Owo aari mulipa-oolepa, aasuwela oratteene Nlamulo na Moise, nenlo naakumiheriwe ni Yehova, Muluku a Isarayeli. Mwene aahinvaha itthu sootheene aavekela awe, okhala wiira Yehova Muluku awe aanimukhaliherya.
7 Aisarayeli akina, anamukuttho, alevi, alipa-oowiipa, makwarta a vamukhora ni ale yaavara muteko mutemplo,* yaahirowa oYerusalemu eyaakha ya neethanu nenli ya mwene Artaxerxe.
8 Eezira aahiphiya oYerusalemu mweeri wa neethanu, eyaakha ya neethanu nenli ya mwene.
9 Nihiku noopacerya na mweeri woopacerya, owo aahipacerya weetta mukwaha okhumaka oBabilonia, nave aahiphiya oYerusalemu nihiku noopacerya na mweeri wa neethanu, okhala wiira Muluku awe ooreera murima aanimukhaliherya.
10 Eezira aahilokiherya murima awe* wiira otokose Nlamulo na Yehova ni eetteleke, ni iixuttiheke malamulo awe ni ophukela wawe wIsarayeli.
11 Ela ekoopiya ya ekarta mwene Artaxerxe anvanhe awe Eezira, namukuttho ni mulipa-oolepa, aasuwela oratteene* sooruma sa Yehova ni malamulo awe para aisarayeli:
12 * “Artaxerxe, mwene a mamwene, tonimulepela namukuttho Eezira, mulipa-oolepa Nlamulo na Muluku a wiirimu: Murettele okhale ni nyuwo.
13 Kooruma wiira atthu ootheene anilamuleliwa ni miyo aniirela mpantta atthu a Isarayeli waahela muhina anamukuttho ni alevi, aroweke ni nyuwo oYerusalemu yaaphavelaka.
14 Moorummwa ni mwene ni atthu 7 aninvaha miruku wiira mutokose Nlamulo na Muluku anyu nenlo mukunxe anyu, moone vakhala wiira ninneetteliwa ni atthu a oYuda ni a oYerusalemu.
15 Nave mukuxe eparatha ni eweero yeeyo mwene ni atthu aninvaha miruku anvanhe aya voohikhanyereriwa Muluku a wIsarayeli, yoowo onikhala oYerusalemu,
16 vamosa ni eparatha yootheene ni eweero yootheene yeeyo mwaakhenle anyu* iprovinsia sootheene sa oBabilonia, vamosa ni itthu sivahiwe ni atthu ni anamukuttho voohikhanyereriwa empa ya Muluku anyu, oYerusalemu.
17 Musurukhu owo muhaana othumela ipooyi, ipwittipwitthi saamukhaani, ipwittipwitthi suulupale, soovaha sa ipyo ni soovaha siniwuriwa, wiira nvaheke valtaari a empa ya Muluku anyu oYerusalemu.
18 “Nave eparatha ni eweero ekina enrowa ohala, nyuwo ni axinninyu mwiiriheke khula etthu munoona anyu oreerela, muttharaka ele Muluku anyu oniphavela awe.
19 Mireerelo sootheene sinrowa anyu ovahiwa wiira sivareliweke muteko empa ya Muluku anyu, nvahererye ohoolo wa Muluku, oYerusalemu.
20 Itthu sikina munrowa anyu ophavela orumeela para empa ya Muluku anyu, munrowa oliverya ni mihakhu sa mwene.
21 “Miyo, mwene Artaxerxe, kinnaaruma atthu ootheene a mpantta onikela nsuwa wa muro Eufrate yaawo anikhapelela mihakhu, wiira anvahererye Eezira, namukuttho ni mulipa-oolepa Nlamulo na Muluku a wiirimu, itthu sootheene onivekela awe,
22 mpakha ophiyerya italento* 100 sa eparatha ikooro* 100 sa etiriku, ipaathi* 100 sa eviinyu, ipaathi 100 sa makhura ni maakha oowaatta.
23 Itthu sootheene Muluku a wiirimu oniruma awe sinivarihana ni empa awe sihaana ovariwa ni nthiti, wiira ohinanariwe ni atthu ahu, miyo ni anaaka.
24 Nave-tho khamuneemiheriwa waaliviha mpoosito* anamukuttho, alevi, alipa-oowiipa, makwarta a vamukhora, ni ale anivara muteko mutemplo aahiiso anamuteko a empa ya Muluku.
25 “Vano nyuwo Eezira, muttharaka osuwela nvahiwe anyu ni Muluku anyu, mwaathanle makhulupale ni alipa-oophuka wiira yaaphukeleke atthu ootheene anikhala mpantta onikela nsuwa wa muro Eufrate, eyo piiyo, ootheene ale anisuwela malamulo a Muluku anyu. Nave-tho muhaana owiixuttiha ootheene ahinisuwela malamulo awo.
26 Nto atthu ootheene ahinrowa wiiwelela Nlamulo na Muluku anyu ni nlamulo na mwene, awo ahaana ophukeliwa ni olamuliwa wiiviwa, oroihiwa weepotthani, olivihiwa multa aahiiso otthukweliwa mukhatteya”.
27 Ottottopeliwe Yehova, Muluku a amuhavinre ahu, yoowo ohenle vamurimani va mwene ophavela oreeriha empa ya Yehova oYerusalemu!
28 Owo ookooniherya ophenta woororomeleya ohoolo wa mwene, atthu awe aninvaha miruku ni makhulupale ootheene oowerya a mwene. Tivo kaahilipa murima* okhala wiira Yehova Muluku aanikikhaliherya, nto kaahaathukumanya ahooleli a Isarayeli wiira arowe ni miyo.
Inoota
^ Aahiiso, “Anetiniimi”. Eheeperi, “ale yaavahereriwe”.
^ Aahiiso, “aahilakela vamurimani vawe”.
^ Aahiiso, “aalepa moolumo a”.
^ Eezira 7:12 mpakha 7:26 okhala wene elempwale ni aramaiko.
^ Eheeperi, “mphwannye anyu”.
^ Etalento emosa yaalemela ikiilu 34.2. Munwehe Apendise B14.
^ Ekooro emosa yaakhala iliituru 220. Munwehe Apendise B14.
^ Epaatho emosa yaakhala iliituru 22. Munwehe Apendise B14.
^ Nttaava noopacerya saahimmwa inamuna tthaaru sa mpoosito: mpoosito wa khula mutthu, mpoosito wa atthu yaatumiha, ni mpoosito waalinvwa ni atthu yeetta mukwaha mustaraatani.
^ Aahiiso, “kaahiilipiha”.
