Eezira 8:1-36
8 Ahooleli a imusi saya ni ale yaalempwale moovarihana ni imusi saya, yaakhumme oBabilonia vamosa ni miyo okathi aalamulela awe mwene Artaxerxe taala:
2 osuulu wa Pineha: Gerisomi; osuulu wa Itamari: Daniyeli; osuulu wa Davidi: Hatuxi;
3 anamwane a Xekaniya, a osuulu wa Parewoxi: Zakariya vamosa ni alopwana 150 aarina awe yaalempwale masina aya;
4 osuulu wa Pahathi-Mowabi: Eliyeho-Enayi mwaana a Zerahiya, vamosa ni alopwana 200 aarina awe;
5 osuulu wa Zatu: Xekaniya, mwaana a Yahaziyeli, vamosa ni alopwana 300 aarina awe;
6 osuulu wa Adini: Ebedi mwaana a Yonathani, vamosa ni alopwana 50 aarina awe;
7 osuulu wa Elami: Yexaya mwaana a Ataliya, vamosa ni alopwana 70 aarina awe;
8 osuulu wa Xefatiya: Zebadiya mwaana a Mikhayeli, vamosa ni alopwana 80 aarina awe;
9 osuulu wa Yowabi: Obadiya mwaana a Yehiyeli, vamosa ni alopwana 218 aarina awe;
10 osuulu wa Bani: Xelomithi mwaana a Yosifiya, vamosa ni alopwana 160 aarina awe;
11 osuulu wa Bebayi: Zakariya mwaana a Bebayi, vamosa ni alopwana 28 aarina awe;
12 osuulu wa Azigadi: Yohanani mwaana a Hakatani, vamosa ni alopwana 110 aarina awe;
13 osuulu wa Adonikami, yaawo yaari ookiserya, masina aya taala: Elifeleti, Yeyeli ni Xemaya, vamosa ni alopwana 60 yaarina aya;
14 osuulu wa Bigivayi: Utayi ni Zabudi, vamosa ni alopwana 70 yaarina aya.
15 Miyo kaahaathukumanya atthu awo waattamela muro onirowa wa Ahava, nimaka weiwo mahiku mararu. Masi okathi kaawehawenhaaka atthu ni anamukuttho, nkaawoonale alevi opuro ole.
16 Nto kaahiruma wiihaniwa Eliyeezeri, Ariyeli, Xemaya, Elinataani, Yaribi, Elinataani, Natani, Zakariya ni Mexulami, yaawo yaahoolela atthu, vamosa ni Yoyaribi ni Elinataani, yaawo yaari alipa-oowiixuttiha.
17 Nuumala-vo, kaahaaruma orowa wa Ido, muhooleli a opuro oniihaniwa Kasifiya. Nave kaahaaleela wiira yamuleele Ido ni axinnawe, yaawo yaavara muteko mutemplo yaari oKasifiya, wiira aniruuhele anamuteko a empa ya Muluku ahu.
18 Okhala wiira Muluku ahu ooreera murima aaninikhaliherya, naahiruuheliwa mulopwana a ankhili, a osuulu wa Mali, musulwaawe Levi, mwaana a Isarayeli, eyo piiyo, Xerebiya, vamosa ni anaawe ni axinnawe, alopwana 18.
19 Nave-tho naahiruuheliwa Haxabiya ni Yexaya, a osuulu wa amerari, vamosa ni axinnaya ni anaaya, alopwana 20.
20 Nave yaahikhala ale yaavara muteko mutemplo* 220, yaawo Davidi ni makhulupale yaavaherenrye aya wiira yaakhaliheryeke alevi miteko saya. Ootheene aya yaahilempwa masina aya.
21 Nto kaahaaleela atthu ootheene wiira atthukwe, waattamela muro Ahava, wiira niiyevihe ohoolo wa Muluku ahu ni ninvekele wiira onihoole mukwaha naarowa ahu weetta, vamosa ni aniihu ni mireerelo sahu sootheene.
22 Miyo kaahuuleliwa muru onvekela mwene wiira onivahe anakhotto ni anakhavalo yaarowa onaakiheryaka awanani ahu mphironi, okhala wiira kaahimuleela mwene wiira: “Muluku ahu ooreera murima, onnikhala ni ootheene ale animphavela, masi owo onniwooniherya ikuru sawe ni onanariwa wawe ootheene ale animunyanyala”.
23 Vano hiyo naahitthukwa ni naahinvekela Muluku ahu mwaha ola, nto owo aahiwiriyana oxonttela wahu.
24 Eriyari ya makhulupale a anamukuttho, kaahaathanla makhulupale a anamukuttho 12, eyo piiyo, Xerebiya ni Haxabiya, vamosa ni axinnaya 10.
25 Nuumala-vo, kaahaaphimela eparatha, eweero ni mireerelo, seiyo mwene, atthu yanvaha miruku ni makhulupale awe, ni atthu ootheene a Isarayeli yaari opuro ole yaavanhe aya para empa ya Muluku ahu.
26 Nave-tho kaahiphima ni kaahaavahererya italento* 650 sa eparatha, mireerelo 100 sa eparatha seiyo saalemela italento piili, italento 100 sa eweero,
27 itixela 20 sa eweero, seiyo saaphiyerya idariko* 1.000 ni mireerelo miili sa ekoopiri yooreerihiwa, ekoore yooxeerya, saarina efaita yinceene ntoko eweero.
28 Moottharelana kaahaaleela wiira: “Nyuwo mwa atthu oowaarya para Yehova, nave mireerelo iya ti soowaarya, nto eparatha ni eweero soovahiwa voohikhanyereriwa Yehova Muluku a amuhavinre anyu.
29 Mukhapelele oratteene itthu iya mpakha ophimmwa osaala wa empa ya Yehova ohoolo wa makhulupale a anamukuttho, alevi, makhulupale a ahooleli a imusi sa atthu a Isarayeli, oYerusalemu”.
30 Vano anamukuttho ni alevi, yaahikuxa eparatha, eweero ni mireerelo yaaphimeliwe aya wiira aroihe oYerusalemu, empa ya Muluku ahu.
31 Nto nihiku 12 na mweeri woopacerya, naahivenya omuro Ahava nrowaka oYerusalemu. Muluku ahu aaninikhaliherya, nave owo aahinoopola mmatatani mwa awanani ahu ni ale yaaniipithela mphironi.
32 Vano hiyo naahiphiya oYerusalemu, nimumula weiwo mahiku mararu.
33 Nihiku na neexexe, naahiphima eparatha, eweero ni mireerelo mpaani mwa Muluku ahu, ninvahererya namukuttho Meremothi, mwaana a Uriya. Owo aari vamosa ni Eleyazari mwaana a Pineha, ni alevi, Yozabadi, mwaana a Yexuwa, vamosa ni Nowadiya, mwaana a Binuwi.
34 Itthu sootheene saahikontariwa ni saahiphimmwa. Nave itthu sootheene saaphimmwale saahilempwa.
35 Ale yaatthinke weepotthani oBabilonia, yaahinvaha mikuttho soopahiwa Muluku a atthu a Isarayeli, ipooyi 12 para atthu ootheene a Isarayeli, ipwittipwitthi saamukhaani 96, ipwittipwitthi soolopwana 77, ni ipuri soolopwana 12 ntoko yoovaha ya oleveleliwa etampi. Itthu iya sootheene yaahinvaha Yehova ntoko mukuttho woopahiwa.
36 Nuumala-vo naahaavahererya malamulo a mwene ahooleli a makuvernatoro a iprovinsia ni makuvernatoro a mpantta onikela nsuwa wa muro Eufrate. Nto awo yaahaakhaliherya atthu ni yaahikhaliherya empa ya Muluku eekeekhai.
Inoota
^ Aahiiso, “Anetinimi”. Eheeperi, “ale yaavahereriwe”.
^ Etalento emosa yaalemela ikiilu 34.2. Munwehe Apendise B14.
^ Musurukhu maluku ene wa eweero a oPersia. Munwehe Apendise B14.
