Eezira 9:1-15
9 Nuumala ovariwa itthu iya sootheene, makhulupale yaahikaattamela anakileela wiira: “Atthu a Isarayeli, anamukuttho ni alevi khavalanne ni atthu a elapo ela, nave annipaka itthu soohiirya, eyo piiyo, sa akanaani, ahiti, aperizi, ayebusi, atthu a wAmoni, atthu a oMowabi, atthu a wExiitu ni atthu a wAmori.
2 Awo ahaathela anamwane axithiyana a atthu awo, nave ahaatheliha anaaya axilopwana. Vano, nloko nla noowaarya, nootakaahana ni atthu a ilapo iya saarukurenrye. Nave makhulupale ni makuvernatoro makina tatempe opaka etampi”.
3 Nuumala wiiwa etthu ela, kaahikhera nlaya naka na muhina ni na ota, kaahaasula ikharari sikina sa mmuruni mwaka ni ereru aka, kikilaathi kixankale ene vanceene.
4 Moottharelana, ootheene ale yaattittimiha moolumo a Muluku a wIsarayeli yaahithukumana, akirukurerya, mwaha wa ohiroromeleya wa atthu yaakhumme weepotthani, nlelo kikilanthi ene, kixankale ene vanceene mpakha okathi wa soovaha sa ipyo saavahiwa makaaripi.
5 Waaphiyale aya okathi wa soovaha sa ipyo saavahiwa makaaripi, kaahivenya opuro kanla aka, nlaya naka na muhina ni na ota nikhereyale ene. Nave kaahikokhora kimuteexerya matata aka Yehova, Muluku aka.
6 Nto kaahihimya wiira: “Khoo Muluku aka, kinnuuliwa muru. Nave kinoona wiira nkiniphwanela owaattamelani wiira koovekeleni. Khoo Muluku aka, ifaalya sahu khasinkontareya, nave mulattu ahu ohuukeleya mpakha wiirimu.
7 Okhuma mahiku a amuhavinre ahu mpakha olelo, mulattu ahu onnitepa wunnuwa. Mwaha wa ifaalya sahu, hiyo, mamwene ahu ni anamukuttho ahu, ninnivahereriwa mmatatani mwa mamwene a ilapo sikina, nihaaxiwaka ni espaata, oroihiwa weepotthani, wiiyeriwa ni wuulihihiwa muru ntoko sinooneya aya olelo.
8 Masi okathi vakhaani, Yehova Muluku ahu, oonimorela ikharari, eemereryaka wiira atthu akina yoopowe onivahaka opuro woovareleleya, opuro awe woowaarya, wiira maitho ahu, khoo Muluku ahu, yaaryeke, nave wiira onimumulihe vakhaani naari ahu ipottha.
9 Hata niri ene ipottha, Muluku ahu khonihiyale weepotthani. Masi oonooniherya ophenta wawe woororomeleya ohoolo wa mamwene a oPersia, onivahaka ikuru wiira nitthikele oteka empa ya Muluku ahu, yeeyo yaahononiwe ni onikhapelele* oYuda ni oYerusalemu.
10 “Masi vano, khoo Muluku ahu, nihimye exeeni nuumala itthu iya sootheene? Hiyo noohiya sooruma sanyu,
11 seiyo munivanhe anyu mwaarumeelaka arumeyi anyu, maprofeta, muhimyaka wiira: ‘Elapo munrowa anyu okuxa wiira ekhale yawinyu, khelonke mwaha wa atthu anikhala mulaponi memmo, ni mwaha wa itthu soohiirya anipaka aya. Awo aasariha mulaponi-mmo itthu soohiloka, okhuma oponta mpakha oponta.
12 Tivo muhaavahe aniinyu axithiyana wiira atheliwe ni anaaya axilopwana, nnakhala muheemererye wiira anaaya axithiyana atheliwe ni aniinyu axilopwana, muhipake etthu yaarowa owiiriha okhalana murettele ni othaaciri. Mwiira siiso, munookhala oolipa, munimoolya yoolya yooloka ya elapo eyo ni munookuxa elapo eyo wiira ekhale ya aniinyu mahiku ootheene’.
13 Nuumala itthu iya sootheene sinikhumelenle mwaha wa miteko sahu sootakhala, ni mwaha wa mulattu ahu muulupale, nyuwo khoo Muluku ahu, khampanke etthu muttharaka soottheka sahu, nave mooneemererya hiyo niri-va okhala akumi.
14 Niireke nnootthikela ohiiwelela sooruma sanyu, nave nnootthikela othelana ni atthu anipaka itthu iya soohiirya? Niireke khimwaarowa onanariwa ni hiyo mpakha onipwetexa moomalela muhimuhiyaka nnakhala mutthu mmosa mukumi?
15 Khoo Yehova Muluku a Isarayeli, nyuwo mwa naxariya, okhala wiira nihoopowa ntoko atthu vakhaani ahanle mpakha olelo-va. Hiyo niri-va, ohoolo wanyu ni mulattu ahu, okhala wiira mwaha wa etampi ela khivanweryaneya weemela ohoolo wanyu”.
Inoota
^ Eheeperi, “onivahe ixiri sa maluku”.
