Esteeri 3:1-15
3 Nuumala itthu iya, mwene Asuwero aahimuthanla Hamani mwaana a Hamedata, a wAgagi, omukhaliha muulupale, omuhelaka opuro wootepexa ovuwa waavikana makhulupale ootheene aarina awe.
2 Nave arumeyi ootheene a mwene, yaawo yaakhala vamukhora, yaanikokhora yuuramaka mpakha vathi ohoolo wa Hamani okhala wiira mwene aahiruma wiira aahaana ottittimihiwa. Masi Mordekayi aahikhootta wuurama aahiiso okokhora ohoolo wawe.
3 Siiso arumeyi a mwene yaawo yaakhala vamukhora va mwene yaahimukoha Mordekayi wiira: “Xeeni muhiniiwelela anyu yooruma ya mwene?”
4 Awo yaamakela omukoha khula nihiku, masi owo khaawiriyana. Tivo yaahimuleela Hamani wiira yoone vakhala wiira mweettelo wa Mordekayi waamweemereriwa, maana owo aahaaleela wiira aari muyuda.
5 Okathi Hamani oonale awe wiira Mordekayi aahikhootta wuurama ni okokhora ohoolo wawe, Hamani aahinanariwa vanceene.
6 Masi, Hamani uupuwela wiira omwiiva Mordekayi paahi khivaaphiyerya, okhala wiira aahileeliwa wiira Mordekayi aari muyuda. Siiso, Hamani aahiphavela waamala-maliha atthu ootheene a Mordekayi, eyo piiyo, ayuda ootheene yaari moomweneni wa Asuwero.
7 Mweeri woopacerya, eyo piiyo, mweeri wa Nisani,* eyaakha ya namuloko ni piili ya mwene Asuwero, awo yaahinvonya puuri (eyo piiyo, esorti) ohoolo wa Hamani wiira asuwele nihiku ni mweeri yaarowa aya wiiraneya eyo. Nto esorti eyo yaahimorela mweeri wa namuloko ni piili, eyo piiyo, mweeri wa adari.*
8 Moottharelana, Hamani aahimuleela mwene Asuwero wiira: “Aakhala atthu amwarenle eriyari ya atthu a iprovinsia sootheene munilamulela anyu, yaawo malamulo aya anivirikana ni malamulo a atthu akina. Nave awo khaniiwelela malamulo a mwene. Nto khivanreerela mwene waahiya siiso.
9 Mwene oona oreerela, okumiherye nlamulo ninruma opwetexiwa atthu awo. Miyo kinimwaaliva italento* 10.000 sa eparatha makhulupale, yaawo anrowa opweha opuro onisukiwa mihakhu sa mwene”.*
10 Siiso mwene aahimurula anela awe mukathani, onvahererya Hamani, mwaana a Hamedata a wAgagi, yoowo aanyokha ayuda.
11 Mwene aahimuleela Hamani wiira: “Kinnoovahereryani eparatha ni atthu, nwiiriheke ele enoona anyu oreerela”.
12 Nihiku 13 na mweeri woopacerya, yaahiihaniwa masekretaario a mwene. Awo yaahilepa itthu sootheene yaarummwale aya ni Hamani arumeelaka ileetera sa khula eprovinsia ni nttaava na khula mutthu, wiira yaaroihele masaatrapa* a mwene, makuvernatoro yaawo yaalamulela iprovinsia ni makhulupale a atthu oovirikana. Epaphelo eyo yaalempwale mwa nsina na mwene Asuwero, nave yaahiheliwa eseelu ni anela a mwene.
13 Ikarta iyo saahiroihiwa arumeeliwaka anamitthaka iprovinsia sootheene sa mwene, sirumaka wiira yaahaana opwetexiwa, wiiviwa ni omala-malihiwa ayuda ootheene, eyo piiyo, amiravo ni ale oowuuluvala, athiyana ni anamwane, nihiku nimosa, nihiku 13 na mweeri wa namuloko ni piili, eyo piiyo, mweeri wa adari, nave wiira yaahaana okuxa mireerelo saya.
14 Moolumo a yooruma eyo yaahaana olaleiwa ntoko nlamulo khula eprovinsia ni oleeliwa atthu ootheene wiira yiilokiherye para nihiku nlo.
15 Anamitthaka yaahikhuma moowaakuveya attharaka yooruma ya mwene. Nto yooruma ele yaahilaleiwa opuro woolipihiwa wa Susa. Moottharelana mwene ni Hamani yaahikilaathi wiira awurye, masi atthu a epooma ya oSusa yaahixanka ahisuwelaka etthu yiiraneya.
Inoota
^ Munwehe Apendise B15.
^ Munwehe Apendise B15.
^ Etalento emosa yaalemela ikiilu 34.2. Munwehe Apendise B14.
^ Aahiiso, woonasa wene: “miyo kinooliva italento 10.000 opuro sinisukiwa mihakhu sa mwene para atthu anrowa ovara muteko owo”.
^ Nwehe Moolumo Ootthokiheriwa.
