Esteeri 4:1-17
4 Okathi Mordekayi aasuwenle awe itthu sootheene saapakiwe, aahikhera malaya awe, owara esaakho ni iihela ntthupi. Nuumala-vo, aahirowa eriyari ya epooma, onanla vanceene oriipiwe ene murima.
2 Owo aaronwe paahi mpakha vamukhora va mwene, okhala wiira khuuvo eemereriwa ovira vamukhora va mwene owanre ene esaakho.
3 Iprovinsia sootheene yaaphiya aya yooruma ni nlamulo na mwene, ayuda yaaniriipiwa murima, yaanitthukwa, yaaninla ni wiikhupanyerya. Atthu anceene yaanimpaathi vasaakhoni ni vattuurwani.
4 Okathi arumeyi athiyana ni alipa-oohuliwa a pwiyamwene Esteeri yaamulenle aya itthu siiraneya, Esteeri aahixanka vanceene. Nto, aahiruma oroiheliwa ikuwo Mordekayi wiira oware ohiya owara esaakho, masi Mordekayi aahikhootta.
5 Siiso, Esteeri aahiruma wiihaniwa Hataki, mmosa a alipa-oohuliwa a mwene, yoowo aathanliwe ni mwene wiira onvareleke muteko Esteeri, omuruma omukoha Mordekayi etthu yaamwiiriha opaka itthu iye ni etthu yiiraneya.
6 Nto, Hataki aahirowa olavula ni Mordekayi opuro woowaatta atthu wa epooma, waakhala ohoolo wa mukhora wa mwene.
7 Mordekayi aahimuleela Hataki itthu sootheene saamwiiranenle, ni musurukhu Hamani aaleihenrye awe oliva opuro onisukiwa mihakhu sa mwene, wiira aapwetexe ayuda.
8 Nave aahinvahererya ekoopiya ya nlamulo naalaleiwale oSusa naahimya wiira ayuda yaahaana omala-malihiwa. Nto Hataki aahaana omooniherya Esteeri ni omutthokiherya, ni omuleela wiira akumane ni mwene wiira omuxonttele ni aalavulele atthu awe.
9 Hataki aahitthika ni aahimuleela Esteeri etthu Mordekayi aahimmye awe.
10 Esteeri aahimwaakhula Hataki, onvahaka malakiheryo wiira amuleele Mordekayi oriki:
11 “Arumeyi ootheene a mwene ni atthu a iprovinsia sa mwene annisuwela wiira, akhala mulopwana wala muthiyana onirowa vanivateni na muhina na mwene ohiitthaniwe, nlamulo nintthariwa nri nimosa paahi: mutthu owo ohaana wiiviwa. Mutthu owo khonrowa wiiviwa paahi akhala wiira mwene onoomookolela ekopo awe ya eweero. Vano miyo koomaliha mahiku 30 kihiihaniwe ohoolo wa mwene”.
12 Okathi Mordekayi aaleeliwe awe etthu Esteeri aahimmye awe,
13 owo aahimwaakhula Esteeri oriki: “Muhuupuweleke wiira mwaha woowi munikhala etthoko ya mwene, munoowerya woopowa waavikana ayuda akina.
14 Mwahilavule etthu okathi ola, ayuda animoopoliwa ni animwaakiheriwa mwa enamuna ekina, masi nyuwo ni atthu a etthoko ya paapa anyu munimookhwaasa. Woonasa wene, moothanliwa okhala pwiyamwene mwaha wa okathi ola”.
15 Moottharelana Esteeri aahimwaakhula Mordekayi wiira:
16 “Murowe, mwaathukumanye ayuda ootheene aniphwanyaneya oSusa, ni atthukwe mwaha wa miyo. Ahilye nnakhala ahiwurye etthu mahiku mararu, othana ni ohiyu. Nave miyo ni arumeyi aka athiyana nnootthukwa. Miyo kinoorowa wa mwene, hata kivirikanyaka nlamulo. Vakhala okhwa, kinaamookhwa”.
17 Nto, Mordekayi aahikhuma ni aahipaka itthu sootheene Esteeri aahimmye awe.
