Esteeri 5:1-14
5 Nihiku na neeraru, Esteeri aahiwara ikuwo sawe sa opwiyamwene, orowa vanivateni na muhina na empa ya mwene,* onalipelela ohoolo wa empa ya mwene. Vano mwene aari opuro aalamulela awe, okilanthi ene veehiceni vawe, ohoolo wa mukhora.
2 Nuumala mwene onweha pwiyamwene Esteeri eemenle ene vate, aahimureerela murima, omookolela Esteeri ekopo ya eweero aakunxe awe mmatatani mwawe. Nuumala-vo, Esteeri aahaattamela, okwannya oponta wa ekopo eyo.
3 Mwene aahimukoha wiira: “Pwiyamwene Esteeri, exeeni enooxankihani? Muniphavela oveka exeeni? Hata nimeya na omwene aka kinimoovahani!”
4 Esteeri aahaakhula wiira: “Mwene oona ooreerela, mwene ni Hamani arowele olelo vaava yoolya koolokihenryaakani”.
5 Siiso, mwene aahaaleela arumeyi awe wiira: “Mwamuleele Hamani wiira orwe moowaakuveya ntoko Esteeri onivekela awe”. Moottharelana, mwene ni Hamani yaahirowela yoolya Esteeri aalokihenrye awe.
6 Okathi yaawurya aya eviinyu, mwene aahimukoha Esteeri wiira: “Exeeni muniphavela anyu? Mukileele, miyo kinimoovahani. Muniphavela oveka exeeni? Hata nimeya na omwene aka miyo kinimoovahani!”
7 Esteeri aahaakhula wiira: “Etthu eniphavela aka ni enivekela aka tiila:
8 mwene oona oreerela ni aphavela okiirela etthu eniphavela aka ni okivaha etthu enivekela aka, mwene ni Hamani arweele yoolya kinrowaaka waalokiherya meelo, nto meelo vaavo kinimwaakhula ele mwene enikoha awe”.
9 Nihiku nle, Hamani aakhumme ohakalanle ene ni otteeliwe ene murima. Masi okathi anwehale awe Mordekayi vamukhora wa mwene, oweha wiira khaavenyale nnakhala khaathukumenle ohoolo wawe, Hamani aahinanariwa vanceene ni Mordekayi.
10 Vano, Hamani aahiivara-vara onarowa owannyawe. Moottharelana aahiruma wiihaniwa apatthani awe ni mwaarawe aihaniwa Zerexi.
11 Hamani aahiittottopa mwaha wa mihakhu sawe sinceene, anaawe anceene ni moota mwene anvuwinhe awe omukhalihaka muulupale, onvahaka opuro wootepa ottittimiheya waavikana makhulupale ni arumeyi a mwene.
12 Hamani ahincererya oriki: “Ohiya-vo, pwiyamwene Esteeri aakilattunle miyo paahi ni mwene yoolya aalokihenrye awe. Nave-tho, ookilattula wiira meelo kakhale ni yena vamosa ni mwene.
13 Masi, khiivo enkisivela nlelo kinwehaka Mordekayi, muyuda, okilaathiki vamukhora wa mwene”.
14 Vano, mwaarawe, Zerexi ni apatthani awe ootheene yaahimuhimeerya wiira: “Murumihe wiira weemexiwe mwiri orina ikoovatu 50* orakamela waya osulu. Nto voosiisu ene munvekele mwene wiira Mordekayi othomeiwe vaavo. Siiso, munootteeliwa murima okathi munrowa anyu olya ni mwene”. Etthu ele yaahimusivela vanceene Hamani, nto aahiruma weemexiwa mwiri.
