Esteeri 6:1-14
-
Mordekayi onnittittimihiwa ni mwene (1-14)
6 Ohiyu ole, mwene khaawerya orupa.* Tivo, aahivekela wiira oruuheliwe eliivuru yaalempwale itthu siiraneyale okathi ole, esommwa ohoolo wawe.
2 Nto vaahiphwanyiwa opuro vaalempwale ele Mordekayi aalavunle awe omuhimyaka Bigitani ni Terexi, makhulupale manli a mwene, yaawo yaakhala vamukhora, yampanke palano wiira amwiive* mwene Asuwero.
3 Vano mwene aahikoha wiira: “Niireke Mordekayi aahittittimihiwa ni otthuveliwa mwaha wa etthu eyo?” Arumeyi a mwene yaahaakhula ariki: “Khaapakeliwe etthu”.
4 Nuumala-vo, mwene aahikoha wiira: “Ti pani ori vate vale?” Hamani taari vanivateni na muhina na empa ya mwene* wiira onvekele mwene wiira Mordekayi othomeiwe vamwirini aalokihenrye awe.
5 Arumeyi a mwene yaahimwaakhula wiira: “Hamani tori vate vale”. Vano mwene aahaaleela wiira: “Mmwiirele okeleke”.
6 Okathi Hamani aakenle awe, mwene aahimukoha wiira: “Opakeliwe exeeni mulopwana yoole mwene oniphavela awe omuttittimiha?” Hamani aahuupuwela vamurimani vawe oriki: “Ti pani mwene oniphavela awe omuttittimiha kihikhanle miyo?”
7 Vano, Hamani aahimwaakhula mwene oriki: “Mulopwana yoole mwene oniphavela awe omuttittimiha,
8 ohaana oruuheliwa malaya a omwene, yaawo mwene oniwara awe, nave oruuheliwe ekhavalo mwene oniwela awe, ekhavalo eyo ewarihiwe mmuru ekhara ya omwene.
9 Malaya awo ni ekhavalo eyo, ovahereriwe mukhulupale ootepexa ottittimihiwa a mwene, owarihiwe mulopwana mwene oniphavela awe omuttittimiha, nave owelihiwe ni eettihiwe vakhavaloni opuro woowaatta atthu wa epooma. Atthu ahaana okhuwela ohoolo wawe ariki: ‘Ela ti etthu eniireliwa awe mulopwana mwene oniphavela awe omuttittimiha!’”
10 Moowaakuveya, mwene aahimuleela Hamani wiira: “Mwaakuveke, murowele malaya ni ekhavalo, mwamwiirele Mordekayi, muyuda, yoowo okilanthi vamukhora wa mwene, itthu sootheene muhimmye anyu. Muhihiye nnakhala etthu emosa muhimmye anyu”.
11 Nto, Hamani aahikuxa malaya ni ekhavalo, onwariha Mordekayi, nave omweettiha opuro woowaatta atthu wa epooma, okhuwelaka ohoolo wawe oriki: “Ela ti etthu eniireliwa awe mulopwana mwene oniphavela awe omuttittimiha!”
12 Nuumala-vo, Mordekayi aahitthikela vamukhora va mwene, masi Hamani aahitthimakela owannyawe, inlaka ni okhunenle ene muru.
13 Okathi Hamani aamulenle awe mwaarawe aihaniwa Zerexi ni apatthani awe ootheene itthu sootheene saamwiiranenle, ale yanvaha miruku, ni mwaarawe, Zerexi, yaahimuleela wiira: “Vakhala wiira Mordekayi, yoowo okhalihiwe muulupale woovikanani nyuwo, muyuda tthiri, weeso nyuwo khamunrowa onwerya. Moohaaniherya munoopwetexiwa ohoolo wawe”.
14 Nlelo atthu ale alavulaka nuuwo, yaahiphiya makhulupale a mwene, amukuxa Hamani moowaakuveya amuroihaka opuro Esteeri aalokihenrye awe yoolya.
Inoota
^ Eheeperi, “ikhove sa mwene saahimutthyawa”.
^ Eheeperi, “amuhele ikatha”.
^ Aahiiso, “epalaasio”.
