Esteeri 8:1-17
8 Nihiku nle, mwene Asuwero aahinvaha pwiyamwene Esteeri empa ya Hamani, nwanani a ayuda. Nave, Mordekayi aahirowa wa mwene, okhala wiira Esteeri aahimuleela mwene wiira Mordekayi aari mmusi awe.
2 Vano, mwene aahimurula anela awe, yoowo aamwaakhale awe Hamani, onvaha Mordekayi. Nave, Esteeri aahimuhiyerya Mordekayi empa yaari ya Hamani wiira okhapeleleke.
3 Moottharelana, Esteeri aahirowa-tho olavula ni mwene. Owo aahiirihela ohoolo wawe, inlaka ni omuxonttelaka wiira omala-malihe etthu ele yootakhala, Hamani, a wAgagi aapanke awe, ni wiira ommala-malihe palano aapakenle awe ayuda.
4 Mwene aahimookolela Esteeri ekopo awe ya eweero, nto Esteeri aahivenya eemela ohoolo wa mwene.
5 Esteeri aahihimya wiira: “Mwene eemererya, oona oreerela ni oona wiira ti va xariya ni kinnimusiveliha, orume wiira nittipihiwe nlamulo nilempwale mutukumentoni, nenlo Hamani mwaana a Hamedata a wAgagi, olempe awe ohimyaka wiira aarowa waapwetexa ayuda, iprovinsia sootheene sa mwene.
6 Miyo nkinwerya waaweha atthu aka yaakhumelelaka ehasara ela, nave nkinwerya waaweha amusi aka apwetexiwaka”.
7 Vano, mwene Asuwero aahimuleela pwiyamwene Esteeri ni Mordekayi, muyuda wiira: “Konvaha Esteeri empa ya Hamani, nave kooruma wiira Hamani othomeiwe vamwirini mwaha wa etthu aalakenle awe owiirela* ayuda.
8 Vano mulepe epaphelo mwa nsina na mwene wiira moone vakhala wiira munimwaaphwanyiha mureerelo ayuda, nave muhele eseelu* ni anela a mwene. Tthiri nlamulo ninlempwa mwa nsina na mwene, nnaheliwa eseelu ni anela a mwene, khaninturukiwa”.
9 Vano, nihiku 23 na mweeri wa neeraru, eyo piiyo, mweeri wa Sivaani,* masekretaario a mwene yaahiihaniwa, ni yaahilepa itthu sootheene Mordekayi aarumme awe ayuda, masaatrapa,* makuvernatoro ni makhulupale a iprovinsia, okhuma wIndia mpakha wEthiyopia, iprovinsia 127, arumeelaka ileetera sa khula eprovinsia ni nttaava na khula mutthu. Nave-tho yaahirumeela ileetera sa ayuda ni nttaava naya.
10 Mordekayi aahilepa ikarta mwa nsina na mwene Asuwero, ohela eseelu ni anela a mwene. Aahiroiha ikarta iyo aarumeelaka anamitthaka yeettiha ikhavalo, yaawo yaawela ikhavalo saatthimaka vanceene, seiyo saahuuwa para ovareliwa miteko sa mwene.
11 Ikarta iyo, mwene aahiweemererya ayuda a ipooma sootheene wiira athukumane ni yaakiherye okumi aya. Nave-tho aahiweemererya waamala-maliha, owiiva ni opwetexa ekurupu ya atthu yaakuxa ikaruma sa ekhotto a khula nloko aahiiso eprovinsia yaarowa waatuphela, waahela muhina axaaraya ni anaaya, ni okuxa mireerelo saya.
12 Eyo yaahaana wiiraneya nihiku nimosa iprovinsia sootheene sa mwene Asuwero, nihiku 13 na mweeri wa namuloko ni piili, eyo piiyo, mweeri wa Adari.*
13 Moolumo a ekarta eyo yaahaana olaleiwa ntoko nlamulo iprovinsia sootheene. Nave yaahaana oleeliwa atthu ootheene wiira ayuda yiilokiherye nihiku nle wiira awunlele ikuhu awanani aya.
14 Arummwaka ni mwene, anamitthaka yaahivenya moowaakuveya, atthimakaka, awenle ene ikhavalo saavareliwa miteko sa mwene. Nave, nlamulo nno naahilaleiwa opuro woolipihiwa wa oSusa.
15 Mordekayi aahikhuma ohoolo wa mwene owanre ene ikuwo sa omwene, sooripelela ni sootteela, owanre ene-tho ekhara ya eweero ni nlaya nooreerexa na ekoore yooxeerya. Nave, epooma ya oSusa atthu yaanikhuwela etteeliwe ene murima.
16 Vano ayuda yaahoopoliwa, yaanitteeliwa murima, yaanihakalala ni yaanittittimihiwa.
17 Iprovinsia sootheene ni ipooma sootheene, nlamulo ni yooruma ya mwene yaaphiyale aya, ayuda yaanitteeliwa murima, yaanihakalala, yaanipaka ifesta ni yaanitthapa. Nave, atthu anceene a ilapo sikina yaaniihimya okhala ayuda, maana yaaniwoova vanceene ayuda.
Inoota
^ Eheeperi, “mwaha woowookolela ntata”.
^ Aahiiso, “ekanyeryo”.
^ Munwehe Apendise B15.
^ Nwehe Moolumo Ootthokiheriwa.
^ Munwehe Apendise B15.
