Fileemoni 1:1-25
1 Miyo Paulo, kitthukweliwe mwaha wa Kristu Yesu, vamosa ni munnihu Timootheyo, kinnoolepelani nyuwo Fileemoni, mpatthani ihu onvarana ahu muteko.
2 Nave kinnimulepela murokorihu Apia, ni Arikipo, nakhotto mukhwiihu a Kristu, ni muloko onithukumana vate vanyu:
3 Oreera murima wuulupale ni murettele wa Muluku Tiithi ihu, ni wa Yesu Kristu Pwiya ahu, okhale ni nyuwo.
4 Kinnimuxukhuru Muluku aka, kiwuupuwelakani nyuwo, okathi wotheene kinivekela aka,
5 okhala wira kinniiwa omwaamini wanyu ni omphenta wanyu Pwiya Yesu, ni waaphenta wanyu ale oororomeleya.*
6 Kinninvekela Muluku wira waamini munooniherya anyu, owiiriheni woona itthu sooreera nrina ahu, ninvarelaka muteko Kristu.
7 Nyuwo munnaka, ophenta wanyu wookihakalaliha ni wookilipiha vanceene, maana muhaakurunuxa murima ale oororomeleya.*
8 Tivonto, hata kiweryaka woorumani mwa nsina na Kristu opaka etthu enireerela,
9 masi kiniphavela woovekelani mwaha woophenta. Kinoovekelani ti miyo Paulo, kuuluvanle, nave-tho vano kitthukweliwe mwaha wa Kristu Yesu.
10 Kinnoovarani metto mwaha wa mwanaka Oneesimo, yoowo kikhanle aka paapa awe kiri ene mukhatteya.*
11 Oneesimo owo, khalai khaawiirenleni sooreera, nto vano onninikhaliherya vanceene.
12 Vano miyo kinnooruhelani nyuwo, mmwaakhele ntoko ole onimphenta aka vanceene.*
13 Kaaniphavela wira okhaleke ni miyo, ovaraka muteko mwaarowa anyu okivarelaka mukhatteya-mu, kitthukweliwa aka mwaha wa ihapari sooreera.
14 Masi nkiphavenle opaka etthu nyuwo muhikeemerenrye, wira oreera wanyu murima ohikhale wookhanyereriwa, masi okhale vootthuna wanyu.
15 Waanyiheryasa, ti etthu emwiirihale ovalaana ni nyuwo okathi vakhaani,* wira ootthikeleni ni mukhalaneke mahiku otheene,
16 ohiya ntoko epottha, masi ovikana epottha, okhala wira vano munna onimphenta aka vanceene, nave nyuwo muhaana omphenta vanceene, ohiya mwaha wookhala mutthu paahi, masi-tho mwaha wookhala mukristau mukhwiinyu.
17 Tivo, mwaakithokoreryaka okhala mpatthani inyu,* mmwaakhele saana ntoko mwaarowa anyu okaakhela.
18 Nave, akhala wira ohootthekelani aahiiso ohookophelani etthu, mukilokiheke miyo.
19 Miyo Paulo, kinlepa-va ni ntata naka: kinimoolivani. Nto muupuweleke wira nyuwo-tho mookikophela okumi anyu.
20 Munnaka, miyo kinniphavela waakhela etthu yooreerela enrwa wa nyuwo, mwaha wa Apwiya; muriirihe murima aka mwa Kristu.
21 Kinnikupali wira munoopaka ele eniveka aka, tivonto, kinlepa kisuwelaka wira munimwiira ovikana ele enoovekelakani.
22 Nave-tho, mukaaverye opuro woorupa. Tthiri, kinniroromela wira mwaha wa mavekelo anyu, kinootaphuliwa kitthikele weiwo.*
23 Epaafara, otthukwelaniwe aka mwaha wa Kristu Yesu, onnoovahani isalamu.
24 Siiso-tho Marko, Aristarko, Dema ni Luka, yaawo anvarana aka muteko, annookhomasani.
25 Oreera murima wuulupale wa Pwiya Yesu Kristu, okhale ni nyuwo mwaha wa mukhalelo wooreera munooniherya anyu.
Inoota
^ Ekereku, “ale oowaarya”.
^ Ekereku, “ale oowaarya”.
^ Ekereku, “mmikhoyini”.
^ Aahiiso, “ntoko murima aka”.
^ Ekereku, “ewoora emosa”.
^ Ekereku, “mwaapariinyu”.
^ Aahiiso, “kihokolexeriwe wa nyuwo”.
