Luka 11:1-54
11 Yesu aari nipuro nimosa ovekelaka. Vano, omalihaka-ru, mwiixutti awe mmosa aahinvekela wira: “Pwiya, muniixuttihe ovekela, ntoko Yohani owiixuttihale awe awiixutti awe”.
2 Owo aahaaleela wira: “Mwaavekelaka, muhimyeke so: ‘Tiithi, nsina nanyu nitteelihiwe.* Omwene anyu orwe.
3 Munivaheke khula nihiku, yoolya* eniphiyerya nihiku notheene.
4 Nave, munlevelele soottheka sahu, maana hiyo-tho ninnaalevelela otheene ale annitthekela.* Muhinihiye nimoraka okathi oneehereriwa ahu’”.
5 Nto Yesu aahaaleela wira: “Muupuwele wira nyuwo mookhalana mpatthani, vano munarowa owannyawe ohiyu eriyari, munanvekela muriki: ‘Mpatthani mukoolihe iphaawu tthaaru,
6 okhala wira mpatthani aka mmosa ohoorwa vatthokoni vaka okhumaka mukwaha awe, masi miyo nkirina etthu yonvaha’.
7 Vano mpatthani inyu owo onnaakhula ori ene mpaani oriki: ‘Munookixatiyari.* Mukhora woowaliwa, nave miyo ni anaaka nihimmaathi Nkikhanle oovenya wira koovaheeni etthu’.
8 Kinooleelani wira owo onoovenya tthiri, ni ononvaha mpatthani awe itthu siniphavela awe, ohiya mwaha wookhala mpatthani awe, masi mwaha wa othipelela oveka.
9 Nto kinoohimeeryani wira, muthipeleleke oveka, munoovahiwa. Muthipeleleke ophavelasa, munoophwanya. Muthipeleleke omana mukhora, munoohuleliwa.
10 Otheene ale aniveka, anoovahiwa. Nave otheene ale aniphavelasa, anoophwanya, ni otheene ale animana mukhora, anoohuleliwa.
11 Mweekeekhai, niireke ookhala paapa oniira mwanawe anvekela ehopa, onanvaha enowa, ohiya ehopa?
12 Aahiiso anvekela nooce, onanvaha walisi?*
13 Tivonto, nnaamwi muri nyuwo ootakhala murima, munasuwela waavaha itthu sooreera aniinyu, nto niireke Tiithi ori wiirimu khonitepa waavaha munepa woowaarya ale aninvekela?”
14 Okathi mukina, Yesu aahoomola nlaikha nootakhala naamwiiriha mulopwana mmosa ohilavula. Nuumala nlaikha nne okhuma, mulopwana ole aahipacerya olavula, nto mittitthi sa atthu saahitikinihiwa vanceene.
15 Masi akina yaahimya wira: “Ola onoomola malaikha ootakhala okhaliheriwaka ni Satana,* namalamulela a malaikha ootakhala”.
16 Akina, aphavelaka omweehererya, yaahinvekela wira owooniherye ethoonyeryo enikhuma wiirimu.
17 Osuwelaka itthu yuupuwela aya, Yesu aawaakhunle wira: “Omwene onikawanyeya yoowo-ru, onoohononeya. Nave etthoko enikawanyeya yeeyo-ru, enoohononeya.
18 Siiso-tho, vakhala wira Satana onniikawanya mmansawe, vano omwene awe onrowa okhala sai? Nyuwo munihimya wira kinoomola malaikha ootakhala kikhaliheriwaka ni Satana.*
19 Nto miyo koomolaka malaikha ootakhala kikhaliheriwaka ni Satana,* ankhi atthu anyu, anoomola ni owerya wawani? Ti maana aya, atthu anyu anrowa aya woophukelani.
20 Masi akhala wira kinoomola malaikha ootakhala kikhaliheriwaka ni owerya wa Muluku,* eyo enitaphulela wira, Omwene wa Muluku woophiya, nyuwo muhisuwela.
21 Okathi mulopwana a ikuru ni orina ikaruma sa ekhotto onikhapelela awe enupa awe, khuuvo oniwerya wiiya mireerelo sawe.
22 Masi arwa mukina orina ikuru sinceene onvikana owo, khinwerya, onnimwaakha ikaruma sawe sa ekhotto aaroromela awe. Nuumala-vo, onnikawanya itthu omwaakhale awe.
23 Ole ohikhanle ni miyo, onnikivirikanya, nave ole ohinthukumanya ni miyo, onnimwarya-mwarya.
24 “Nlaikha nootakhala namukhuma mutthu, ninneettakasa moothakoni, niphavelaka nipuro noomumula. Masi naahiphwanye, ninnihimya so: ‘Kinootthikela empa aka, ekhumale aka’.
25 Niphiyaka-ru, ninniphwanya empa eyo eveliwe ene ni ereerihiwe ene oratteene.
26 Vano, ninnirowela malaikha makina 7, ootepa otakhala ovikana nlo. Annikela empa eyo, enakhala memmo. Siiso, makhalelo masya a mutthu ole annitepa onanara ovikana a khalai”.
27 Vano, Yesu olavulaka itthu iya, muthiyana mmosa aari eriyari ya muttitthi wa atthu, aahikhuwela oriki: “Oohakalala ti muthiyana ooyanreni ni owaamwinheni nipele!”
28 Nto Yesu aahaakhula wira: “Nnaari, masi oohakalala taale aniiwa nuulumo na Muluku, aneettela!”
29 Okathi mittitthi sa atthu saathukumanne aya, Yesu aahihimya wira: “Nyuwo atthu* ootakhala ni oohiroromeleya! Nyuwo munnithipelela ophavela ethoonyeryo, masi khamunrowa ovahiwa ethoonyeryo ekina, ehikhanle ethoonyeryo ya profeta Yona.
30 Siisaale Yona aari awe ethoonyeryo ya atthu a oNiinive, siiso-tho, Mwaana a mutthu onrowa okhala ethoonyeryo ya atthu a okathi ola.
31 Nihiku Noophukela, pwiyamwene a osuuli,* onoohihimuxiwa vamosa ni atthu a okathi ola wira aalamule, okhala wira aahikhuma ottaiwene, arowaka owiriyana miruku sa Salomoni. Masi, moone wira vaava ookhala mutthu orina efaita yuulupale onvikana Salomoni.
32 Nihiku Noophukela, atthu a oNiinive anoohihimuwa vamosa ni atthu a okathi ola wira yaalamule, okhala wira yaahirukunuxa mirima saya, nuumala omwiiwa Yona olaleeryaka. Masi, moone wira vaava ookhala mutthu orina efaita yuulupale onvikana Yona.
33 Khuuvo onipattiha muthuko, onapweha nipuro noowiipitheya aahiiso onakhuneela ni ettanka.* Masi onipweha osulu-sulu, wira ale anikela mpaani yooneke okokola.
34 “Muthuko wa erutthu, niitho. Tivonto, akhala wira niitho nanyu ninluluwanya itthu sooreera paahi, erutthu anyu yotheene ennaarya.* Masi, niitho nanyu natakhala,* erutthu anyu yotheene enoosareya epiphi.
35 Mukhalane ephoole wira muthuko orina anyu, ohikhale epiphi.
36 Nto erutthu anyu yotheene yamwaleeliwa ni muthuko, ehinakhalana epiphi, yotheene enookhala nipuro noowaarya, ntoko muthuko onoomwaleelaayani ni waarya waya”.
37 Nuumala Yesu olavula itthu iya, nfarisi mmosa aahimulattula orowa olya yoolya ya othana owannyawe. Nto owo aahirowa, okilaathi, ohameela vameesa.
38 Vano, nfarisi ole aahitikinihiwa nuumala woona wira Yesu aahipacerya olya ohinyanwe.*
39 Masi Pwiya aahimuhimeerya wira: “Nyuwo afarisi, munnirapiha ekoopho ni eparatho ota-ru, masi muhina mwanyu moosareya ohiphiyeriwa ni otakhala.
40 Nyuwo mwa alolo! Khamunsuwela wira ole opanke epantta ya vate, oopaka-tho ya muhina?
41 Nwiireleke sooreera alipa-oohaawa* ni itthu siri vamurimani vanyu, nto itthu sotheene mwa nyuwo sinookhala sooreera.
42 Masi, mootakhaliwa nyuwo afarisi, okhala wira munnivaha epantta ya namuloko ya ortelaani* ni aruuta* ni makukhu makina. Nto munnithanya exariya ni ophenta wa Muluku. Iya ti itthu munirummwa anyu weettela, muhihiyaka sikina.
43 Mootakhaliwa nyuwo afarisi, okhala wira woosivelani okilaathi mapuro oohoolo* musinagoga* ni okhomasiwa ni nttittimiho mapuro oowaatta atthu.*
44 Mootakhaliwa nyuwo, maana munlikana ni mahiye ahinooneya oratteene,* yaawo atthu anivira aya vasulu vaya ahisuwelaka!”
45 Nto mulopwana mmosa aasuwela saana Nlamulo, aahimuhimeerya Yesu wira: “Mwiixuttihi, mwaalavulaka siiso, nave munniniveeha hiyo-tho”.
46 Yesu aahaakhula oriki: “Mootakhaliwa nyuwo-tho munisuwela saana Nlamulo, okhala wira munnaareya atthu miritti soolemela. Masi nyuwo aneene khamuniphavela okwannya, hata ni ekatha anyu!
47 “Mootakhaliwa nyuwo, okhala wira munniteka mahiye a maprofeta, yaawo amuhavinre anyu awiivale aya!
48 Mweekeekhai, nyuwo moosuwela miteko sa amuhavinre anyu, hata vari siiso muheemererya. Awo aawiiva maprofeta, nto nyuwo mooteka mahiye a maprofeta awo.
49 Tivonto miruku sa Muluku saahimmye aya wira: ‘Kinimwaaroihela maprofeta ni arummwa, nto awo anoowiiva akina ni animwaalupattha akina.
50 Siiso, atthu a okathi ola anoovahiwa nthowa mwaha wa ephome emwarexiwe ya maprofeta otheene, olumwenku ohinatthi opattuxiwa,*
51 okhuma ephome ya Abeli mpakha ephome ya Zakariya, yoowo aiviwe eriyari ya altaari ni empa ya Muluku’.* Aayo, kinoohimeeryani wira atthu a okathi ola anoovahiwa nthowa.
52 “Mootakhaliwa nyuwo munisuwela saana Nlamulo, okhala wira moowaakha atthu ixaavi sa omusuwela Muluku. Nyuwo aneene khamunkela-mo, nave munnaakhoottiherya ale aniphavela okela!”
53 Nuumala okhuma opuro ole, alipa-oowiixuttiha Nlamulo ni afarisi, yaahipacerya onvelaveliha Yesu, ampakelaka makoho manceene,
54 awehereryaka olavula etthu yaarowa owiiriha onvara ni moolumo awe.
Inoota
^ Aahiiso, “nithokoreriweke okhala noowaarya”.
^ Ekereku, “ephaawu”.
^ Ekereku, “annikophela”.
^ Aahiiso, “Munookinyoonyiha”.
^ Aahiiso, “nikharanace”.
^ Ekereku, “Belizebuli”. Onihimmwa muhooleli, aahiiso namalamulela a malaikha ootakhala.
^ Ekereku, “Belizebuli”. Onihimmwa muhooleli, aahiiso namalamulela a malaikha ootakhala.
^ Ekereku, “Belizebuli”. Onihimmwa muhooleli, aahiiso namalamulela a malaikha ootakhala.
^ Ekereku, “ekatha ya Muluku”.
^ Aahiiso, “atthu a okathi ola”.
^ Aahiiso, “okuusini”.
^ Aahiiso, “esestu”.
^ Aahiiso, “ennisareya waarya”.
^ Aahiiso, “nakhalana nrima”.
^ Afarisi ni ayuda yaaninyawa attharihelaka soolema saya.
^ Nwehe Moolumo Ootthokiheriwa.
^ Ortelaani, ti etempeero enirumeeliwa wira esivihiwe yoolya.
^ Mwiri onirumeeliwa wira oloolaniwe iretta ni wunkheliha yoolya.
^ Aahiiso, “ooreerexa”.
^ Nwehe Moolumo Ootthokiheriwa.
^ Aahiiso, “omerkaatu”.
^ Aahiiso, “ahiheliwe ekanyeryo”.
^ Nuulumo noowi olumwenku ohinatthi opattuxiwa, anihimmwa anamwane a Adamu ni Eva.
^ Aahiiso, “etemplo”.
