Luka 17:1-37
17 Nuumala-vo, Yesu aahaahimeerya awiixutti awe wira: “Okathi wotheene sinookhala itthu sinimwiiriha mutthu ottheka. Masi, ootakhaliwa ole onimwiiriha mutthu ottheka!
2 Fataari mutthu owo aatthukweleliwe muxikoni nluku nuulupale, khuriheliwa mphareya, ohiya omutthekiha mmosa a acikhaani ala.
3 Mwiikasoope. Akhala wira munninyu ohootthekelani, mmuttaruxe. Attharuwa, mmulevelele.
4 Hata ootthekelakani ikwaha 7 nihiku nenlo, nave onarwa ikwaha 7 ohimyaka wira: ‘Koottharuwa’, muhaana omulevelela”.
5 Vano arummwa yaahimuhimeerya Pwiya wira: “Muncererye waamini wahu”.
6 Pwiya aahiwaakhula wira: “Vaakhanle wira mookhalana waamini onlikana ni enuku yaamukhaanixa,* mwaamuhimeerya mwiri* ola wira: ‘Mwiiphele-vo, murowe mwaiphatteye mphareya!’ Nto mwiri owo, waarowa owiiwelelani.
7 “Ti pani a nyuwo oniira okhalanne ene epottha, elimaka mmatta ni inyompe aahiiso okukhulaka inama, yahokolowa omatta, onahimeerya wira: ‘Murwe-va, mwaakuveke nilyeeke vameesa’?
8 Khuuvo. Masi, owo onrowa ohimeerya wira: ‘Mulokiherye yoolya aka. Nave nware ikuwo sa muteko sa murumeyi, mukirumeele, mpakha miyo omaliha olya ni owurya. Nuumala-vo, nyuwo munrowa olyaaka ni owurya’.
9 Nto yamaliha muteko aya, niireke onrowa oxukhurela epottha eyo? Nnaari.
10 Siiso-tho, nyuwo mwavara miteko sotheene murummwale anyu, muhimyeke wira: ‘Hiyo na ipottha paahi. Khinimphwanela etthu. Etthu nipanke ahu, ti etthu naakhanle ahu oopaka’”.
11 Okathi Yesu aarowa awe oYerusalemu, aahivira elapo ya oSamariya ni oGalileya.
12 Akelaka-ru muttetthe mmosa, alopwana 10 yaarina makokho,* yaahirowa okumana nuuwo. Masi awo, yeemenle ottaiwene.
13 Awo yaahikhuwela, yiiraka: “Yesu, Mwiixuttihi, munimorele ikharari!”
14 Yesu owoonaka-ru, aahiwiirela wira: “Murowe mwaixooniherye wa anamukuttho”. Nto okathi yaarowa aya, yaahipenuxiwa.
15 Mmosa a yaawo, voonale awe wira aahipenuxiwa, aahitthika onvuwihaka Muluku ni nsu nowiiwanyeya.
16 Vano, aahikokhora ohoolo wa Yesu, aahuurama mpakha vathi, omuxukhurelaka. Mulopwana owo aari musamariya.
17 Nto Yesu aahikoha oriki: “Kiira alopwana apenuxiwe yaari 10? Akina 9 ari vai?
18 Xeeni alopwana akina ahitthinke aya wira anvuwihe Muluku, ohikhanle paahi mulopwana ola a nloko nikina?”
19 Vano Yesu aahimuhimeerya wira: “Nvenye, muroweke. Waamini wanyu ohookhalihani saana”.
20 Afarisi yaahimukoha ariki: “Omwene wa Muluku onrwa liini?” Yesu aahiwaakhula wira: “Omwene wa Muluku khonrwa ntoko etthu enooneya.
21 Khaavo onrowa ohimya wira: ‘Ola-va!’ aahiiso ‘Ole vale!’ Moone wira, Omwene wa Muluku, ori eriyari anyu”.
22 Vano aahaaleela awiixutti awe wira: “Anoophiya mahiku munrowa anyu ophavelaka woona nihiku nimosa na Mwaana a mutthu, masi khamunrowa woona.
23 Nave atthu anrowa woohimeeryakani so: ‘Mmooneke, ori vale’, aahiiso ‘Mmooneke, ori va’. Muhirowe aahiiso muhaatthare.
24 Veekeekhai, ntoko etari enaarya aya ekhumaka mpantta mmosa wa erimu mpakha mpantta mukina wa erimu, siiso-tho, tonrowa aya wiiraneya okathi onrowa awe wooniheriwa Mwaana a mutthu.
25 Masi, owo ohaana toko ohaaxiwa vanceene ni okhoottiwa ni atthu a okathi ola.
26 Nave-tho, ntoko yaari aya mahiku a Nowe, siiso-tho, vanimwiiraneya mahiku a Mwaana a mutthu:
27 atthu yaanilya, yaaniwurya, alopwana yaanithela ni athiyana yaanitheliwa, mpakha nihiku Nowe aakenle awe mukalawani. Nto epula ya mutaaseke yaahirupa, yaapwetexa otheene aya.
28 Nave, ntoko yiiraneyale aya mahiku a Lothi: atthu yaanilya, yaaniwurya, yaanithuma, yaanitumiha, yaanaala ni yaaniteka.
29 Masi nihiku Lothi aakhumme awe oSodoma, waahimora mooro ni enxoofere* okhumaka wiirimu, khwaapwetexa otheene aya.
30 Onrowa wiiraneya siiso, okathi Mwaana a mutthu onrowa awe wiixooniherya.
31 “Nihiku nlo, ole ori vasulu va empa,* masi mireerelo sawe siri ene mpaani, ohikhuruwele vathi wira okuxe mireerelo iyo. Nave, ole ori omatta, ohitthike wira akuxe itthu sihanle ottuli.
32 Mmuupuweleke mwaarawe Lothi.
33 Ole oniphavela woopola okumi* awe, onompweteya. Masi, ole onimpweteya okumi* awe, onimoopola.
34 Kinooleelani wira, ohiyu yoowo, atthu anli anrowa orupa ekhaama emosa, vano mmosa onookuxiwa, mukina onrowa ohiiwa.
35 Nave anookhala athiyana anli anrowa oxilaka nxilo nimosa-ru. Mmosa onookuxiwa, mukina onrowa ohiiwa”.
36 *——
37 Nto awiixutti yaahimukoha ariki: “Pwiya, eyo enrowa wiiraneya woowi?” Yesu aahiwaakhula wira: “Vari murutthu, vaavo tonithukumana aya amurumaasi”.
Inoota
^ Aahiiso, “enuku eniitthaniwa mostarda”, yeeyo eniphwanyaneya wIsarayeli. Eyo enninnuwa mpakha ophiya imeeturu 4 ni yookhalana iritta.
^ Ola waari mwiri wiihaniwa amoreira.
^ Aahiiso, “makuttula; maretta”.
^ Nuulumo noowi enxoofere, enihimmwa enamuna emosa ya maluku anipattha mooro.
^ Ipa sinceene, vasulu vaya vaakhala ntoko etarato, ni atthu yaanirumeela wira avareke miteko sinceene.
^ Nwehe Moolumo Ootthokiheriwa ani: “Okumi”.
^ Nwehe Moolumo Ootthokiheriwa ani: “Okumi”.
^ Eversiikulu ela enniphwanyaneya aBiibiliya akina, masi kheniphwanyaneya soolempwa ni matata sinceene sootthuneya sa ekereku.
