Luka 21:1-38
21 Okathi Yesu aaweha awe ikaaxa saariheliwa musurukhu, owo aanaaweha athaaciri arihelaka musurukhu aya mukaaxani-mmo.
2 Vano aahimoona muthiyana naamukhweli, oothoiwa, orihelaka musurukhu miili waarina efaita vakhaani,*
3 onahimya wira: “Kinooleelani ekeekhai wira, muthiyana ole naamukhweli oothoiwa, oovaha vanceene waavikana atthu otheene.
4 Mweekeekhai, otheene ale aavaha musurukhu waahala, masi naamukhweli ole, ni othoiwa* wawe, oovaha itthu sotheene aalipana awe”.
5 Okathi mukina, awiixutti akina yaanilavula attottopelaka etemplo, moota yaareerihiwe aya ni maluku ooreera ni mwaha wa itthu saavahiwa Muluku.
6 Vano Yesu aahihimya wira: “Itthu iya munoona anyu, anoophiya mahiku nihinrowa aya ohala vale nluku nimosa vasulu va nluku nikhwaaya, nihimoroxeliwe vathi”.
7 Nto awiixutti awo yaahimukoha Yesu, yiiraka: “Mwiixuttihi, okathi xeeni sinrowa aya okhumelela itthu iya, nave tiivi enrowa okhala ethoonyeryo yoowi itthu iya sihanle wiiraneya?”
8 Yesu aahiwaakhula, wira: “Mwiikasoope wira ohikhale onoohapuxani, okhala wira atthu anceene animoorwa arumeelaka nsina naka, yiiraka: ‘Kristu ti miyo’, nave ariki: ‘Okathi waahimmwa ohaattamela’. Muhaatthare.
9 Vano, mwaiwa vale silavuliwaka ikhotto ni onyakulihana wa atthu, muhoove. Tthiri itthu iya sihaana okhumelela toko, masi olumwenku khonrowa omala okathi ene yoowo”.
10 Nto Yesu aahaahimeerya wira: “Nloko ninrowa owana ni nloko nikina, elapo ni elapo ekina.
11 Sinookhumelela itetere suulupale, nave-tho enoothowaka yoolya ni sinookhumelela ikwerere mapuro oovirikana. Sinookhumelela-tho wiirimu itthu soowoopiha ni ithoonyeryo suulupale.
12 “Masi sihinatthi okhumelela itthu iya sotheene, atthu animoovarani ni woolupatthani, yoovahereryeni musinagoga* ni yooriheleni mukhatteya. Munooroihiwa ohoolo wa mamwene ni makuvernatoro, mwaha wa nsina naka.
13 Nto eyo enoowiirihani okhala anamoona aka ohoolo waya.
14 Tivo, vamurimani vanyu, muhiilokiherye vahinatthi moota munrowa anyu wiixaakiha,
15 maana kinimoovahani ankhili ni kinimookhaliheryani osuwela etthu yoohimya. Nto awanani anyu khanrowa owerya owaakhulani etthu.
16 Nave-tho, apapinyu ni amaminyu ni anninyu ni amusi inyu ni apatthani inyu, anrowa woovarihani. Awo anoowiiviha akina a nyuwo.
17 Nyuwo munoonyokhiwa ni atthu otheene mwaha wa nsina naka.
18 Nto hata ekharari emosa ya mmuruni mwanyu, khenrowa orimeela.
19 Vakhala wira munoovilela mpakha wookiseryani, munimoopola ikumi sanyu.
20 “Masi, mwaweha oYerusalemu orukureriwe ene ni anakhotto, musuweleke wira opwetexiwa waya ori vakhiviru.
21 Vano, ale anikhala oYudeya, apaceryeke otthyawela omiyaakoni, nave ale ari oYerusalemu, akhume. Nto ale ari ota wa epooma ele, ahikele-mo,
22 okhala wira mahiku awo Muluku onrowa waaphukela atthu, wira siiraneye itthu sotheene sihimmwale ni Soolempwa Soowaarya.
23 Mahiku awo, anootakhaliwa athiyana oorupala ni ale animwaamwiha mwaana! Onookhala ohaawa wuulupale muttetthe ola, nave oviruwa wa Muluku onimwaamorela atthu ala.
24 Nave awo anrowa wiiviwa ni xoowa* ni anookuxiwa ntoko ipottha, amwaraxeliwe ilapo sotheene. Yerusalemu onoonyakeliwa ni amalapo, mpakha omalela okathi wa amalapo awo.
25 “Nave-tho, sinookhumelela ithoonyeryo vansuwani, vamweerini ni mutheneerini. Vathi-va, atthu a ilapo soovirikana anoohaawa, ahisuwelaka etthu yoowiira mwaha wa oruma ni ottikinyeya wa ephareya.
26 Atthu anrowa okhwa woova, alipelelaka itthu sinrowa okhumelela elapo yotheene, okhala wira itthu siri wiirimu sinoottikinyiwa.
27 Nave awo anoomoona Mwaana a mutthu orwaaka mmeekuni, ni owerya ni ovuwa wuulupale.
28 Masi okathi itthu iya sinipacerya aya okhumelela, mweemele oratteene ni mweemexe muru, okhala wira woopoliwa wanyu ori vakhiviru”.
29 Nto Yesu aahaaleela nlikanyiho nimosa, oriki: “Muupuwele mwiri wa ifiiku ni miri sikina.
30 Okathi miri iyo siniphuwa aya makukhu masya, nyuwo munnisuwela wira elimwe ennaattamela.
31 Siiso-tho, moonaka-ru sikhumelelaka itthu iya, musuweleke wira Omwene wa Muluku ori vakhiviru.
32 Kinooleelani ekeekhai wira atthu a mahiku ala, tthiri khanrowa omala, itthu iya sotheene sihikhumelenle.
33 Erimu ni elapo sinoomala, masi moolumo aka, khanimala nnakhala vakhaani.
34 “Mwiikasoope wira olya vanceene ni owurya vanceene ni oxankela itthu siniphavela anyu, sihihonone muupuwelo anyu, wira nihiku nlo nihoophwanyeni mootutuxerya,
35 ntoko mwaamunama onimorela vamuraakhoni. Kinoolelani etthu ela, maana nihiku nlo nnimwaaphwanya mootutuxerya atthu otheene anikhala vathi-va.
36 Tivonto, muthipeleleke owehaweha. Okathi wotheene muxontteleke wira muhiphwanyiwe ni itthu sotheene sinrowa wiiraneya, nave wira mweemele ohoolo wa Mwaana a mutthu”.
37 Nto Yesu aaniwiixuttiha atthu othana wotheene mutemplo, masi ohiyu aanirowa orupa omwaako Olivera.
38 Vano, atthu otheene yaanirowa okumana nuuwo voosiisu mutemplo, wira anwiriyane.
Inoota
^ Ekereku, “ileepita piili”. Ileepita piili, waari musurukhu waaliviwa mutthu aavara muteko etthu yoowiiraka minuutu 10.
^ Aahiiso, “ohaawa”.
^ Nwehe Moolumo Ootthokiheriwa.
^ Aahiiso, “espaata”.
