Luka 24:1-53
24 Vano, voosiisu ene wa nihiku noopacerya na esumana,* awo yaahirowa omahiye akunxe ene makhura oowunkhela yaalokihenrye aya.
2 Nto yaaphwannye nluku naattiyelaniwe mahiye nipirikixeliwe ene ota.
3 Okathi yaakenle aya mmahiye, khiyaaphwannye murutthu wa Pwiya Yesu.
4 Nlelo axankale ene, alopwana anli yaaheemela vakhiviru vaya, awanre ene malaya oowaarya.
5 Athiyana awo yaahoova vanceene, yuurama mpakha vathi. Vano alopwana awo yaahaakoha wira: “Xeeni munimphavela anyu mutthu mukumi eriyari ya alipa-ookhwa?
6 Owo khokhanle vaava, masi oohihimuxiwa. Muupuweleke itthu oohimenryaaweni nlelo ori ene oGalileya,
7 oriki: Mwaana a mutthu ohaana ovahereriwa mmatatani mwa anatampi, okhomeliwa vamwirini ni ohihimuxiwa nihiku na neeraru”.
8 Vano awo yahuupuwela moolumo awe,
9 atthika omahiye, anarowa waahimeerya itthu iye sotheene arummwa 11 ni awiixutti akina.
10 Athiyana yaaleela arummwa itthu iyo, taala: Maria Madalena, Yohana, Maria maama awe Yakobo, ni athiyana akina yaari naawo.
11 Masi arummwa khiyaakupanli athiyana ale. Yuupuwela wira awo yampakelela itthu yaahimya aya.
12 Vano Pedru aahivenya, onatthimakela omahiye. Nuuphiya, aahuurama onaweha mmahiye. Nto aahiweha ikuwo saavitikeleliwe murutthu wa Yesu. Siiso, aahikhuma otikinihiwe ene, mwaha wa etthu yaakhumelenle.
13 Nihiku nenno, awiixutti anli yaaneetta mukwaha arowaka muttetthe wiihaniwa Emawuusi, yoowo waarakamenle oYerusalemu, etthu yoowiiraka ikiloomo 11.*
14 Awo yaanivaanela, alavulaka itthu sotheene saakhumelenle.
15 Vano, avaanelaka itthu iyo, Yesu mwaneene aahiwaattamela, oneetta vamosa naawo,
16 masi awo khiyaamusuwenle.
17 Yesu aahaakoha wira: “Myaha xeeni sinivaanela anyu mweettaka mphironi?” Nto awo yaaheemela, ariipiwe ene murima.
18 Mmosa a awiixutti ale, yoowo aihaniwa Kelopha, aahimwaakhula wira: “Niireke nyuwo mwa muletto onikhala mekhawe oYerusalemu, ni ohinisuwela* itthu sikhumelenle weiwo mahiku ala?”
19 Yesu aahaakoha oriki: “Itthu xeeni?” Awo yaahimwaakhula wira: “Itthu sinimuhimya Yesu munazarethi, yoowo oonihenrye okhala profeta oowerya ni miteko, vamosa ni moolumo awe, ohoolo wa Muluku ni wa atthu otheene;
20 ni moota makhulupale a anamukuttho ni anamalamulela yanvaherenrye aya wira iiviwe, ni okhomeliwe vamwirini.
21 Masi hiyo naalipelela wira mulopwana owo taarowa owoopola aIsarayeli. Ohiya-vo, olelo-va aavira mahiku mararu sikhumelenle ene itthu iya.
22 Nave-tho, nootikinihiwa vanceene mwaha wa ihapari ahimmye aya awiixutti akina athiyana, yaawo yaaronwe omahiye voosiisu.
23 Awo khaphwannye murutthu awe. Masi yaahirwa ahimyaka wira aaweha malaikha, yaawo ahimmye wira Yesu mukumi.
24 Vano, atthu akina yaari ni hiyo, yaahirowa omahiye, aphwanya ntoko athiyana ale yaahimmye aya, masi khiyaamoonale Yesu”.
25 Nto Yesu aahaahimeerya wira: “Nyuwo atthu oohikhalana ankhili ni oopisa waamini itthu sotheene maprofeta alavunle aya!
26 Maprofeta aahimya wira Kristu aahaana ohaawa itthu iya sotheene, ni aahaana ovuwihiwa wiirimu”.
27 Vano, owo aahaatthokiherya itthu sotheene silempwale simuhimyaka yoowo, okhuma soolempwa sa Moise ni sa Maprofeta otheene.
28 Nto yaanaattamela muttetthe yaarowa aya, vano Yesu aahiikhaliha ntoko mutthu aarowa ottaiwene.
29 Masi awo yaahimukhanyererya ohala, ariki: “Murupe vaava, okhala wira nsuwa nookela, nave vahanle wiila”. Nto Yesu aaheemererya, khukhala naawo.
30 Olyaaka* sisaale naawo, Yesu aahikuxa ephaawu, aahivekela, khukawanya, onapacerya waavaha.
31 Niinaano-ru, maitho aya yaahitthukuwa, enawerya omusuwela Yesu. Masi owo aahilakaseya eriyari aya.
32 Vano yaanihimeeryana wira: “Ti nthowa naya moolumo awe yaavara aya mirima sahu, okathi aalavula awe ni hiyo mustaraatani, onitthokiheryaka oratteene Soolempwa”.
33 Ewoora ene yeeyo, yaahivenya, atthikela oYerusalemu. Weiwo yaahaaphwanya arummwa 11 ni ale yaathukumanne vamosa naawo,
34 yaawo yaahimya wira: “Tthiri Pwiya oohihimuxiwa, nave oomukhumelela Simoni!”
35 Nto awo yaahihimya itthu saakhumelenle mustaraatani, ni moota yaamusuwenle aya Yesu, okathi aakawannye awe ephaawu.
36 Alavulaka siisaale, Yesu mwaneene aahikhumelela eriyari aya, onaahimeerya wira: “Murettele okhale ni nyuwo”.
37 Masi okhala wira awiixutti yaahitikinihiwa ni woova, awo yuupuwela wira yaaweha munepa.
38 Vano owo aahaahimeerya wira: “Munixankela-ni? Xeeni munihoverya anyu vamurimani vanyu?
39 Mooneke matata aka ni inawu saka, wira ti yoomi. Mukivare, moone, okhala wira munepa khorina ethayi nnakhala makhuva, ntoko munikoona anyu”.
40 Ahimyaka siiso, aahiwooniha matata awe ni inawu sawe.
41 Masi nlelo ahikupaliki mwaha wa otteeliwa murima vanceene ni otikinihiwa, Yesu aahaakoha wira: “Niireke mookhalana-vo etthu enilyiwa?”
42 Nto awo yaahinvaha ehopa yoowooxiwa.
43 Yesu aahikuxa, onakhuura anwehaka.
44 Vano Yesu aahaahimeerya wira: “Okathi kaari aka ni nyuwo, kaahilavula moolumo ala, kinitthikela aka olavula vano, yaawo ani: ‘Itthu sotheene silempwale ni nlamulo na Moise ni soolempwa sa Maprofeta ni Isaalimo, sikihimyaka miyo, sihaana wiiraneya’”.
45 Vano aahitthukula muupuwelo aya wira yiiwexexe Soolempwa,
46 nto aahaahimeerya wira: “Ela ti etthu elempwale: Kristu aahaana ohaawa ni ohihimuxiwa mwa alipa-ookhwa nihiku na neeraru.
47 Nave, mwaha wa nsina nawe, okhuma oYerusalemu mpakha ilapo sotheene, yaamulaleiwa ehapari, wira atthu otheene attharuwe itampi saya ni aleveleliwe.
48 Nyuwo munrowa okhala anamoona a itthu iya.
49 Miyo kinimoovahani ele Tiithi aka oleihenrye awe woovahani. Masi nyuwo muhale oYerusalemu, mpakha waakhela owerya onikhuma wiirimu”.
50 Nuumala-vo, owo aahaaroiha awiixutti awe muttetthe wa oBethania. Weiwo, aahivenxa matata awe, aareeliha.
51 Okathi aareeliha awe, owo aahaahiya, onawelihiwa wiirimu.
52 Awiixutti yaahuurama, ananvuwiha yoowo. Nuumala-vo, yaahitthikela oYerusalemu, atteeliwe ene murima vanceene.
53 Mahiku otheene yaanikhala mutemplo, amuttottopelaka Muluku.
Inoota
^ Nwehe enoota ya Matheyo 28:1.
^ Ekereku, “Istaatio 60”. Estaatio emosa, yaarina imeeturu 185.
^ Aahiiso, woonasa wene: “Niireke nyuwo mwa muletto mmosa a oYerusalemu yoowo ohinisuwela?”
^ Aahiiso, “Ohamenle ene vameesa”.
