Marko 1:1-45
-
Olaleerya wa Yohani Mpatisa (1-8)
-
Opatisiwa wa Yesu (9-11)
-
Satana onnimweehererya Yesu (12, 13)
-
Yesu onnipacerya olaleerya oGalileya (14, 15)
-
Olattuliwa wa awiixutti oopacerya (16-20)
-
Nlaikha nootakhala ninnoomoliwa (21-28)
-
Yesu onnaapenuxa atthu anceene oKafarnawu (29-34)
-
Nivekelo opuro ohinivira-viriwa (35-39)
-
Namakokho onnipenuxiwa (40-45)
1 Opacerya wa ihapari sooreera sa Yesu Kristu, Mwaana a Muluku.
2 Profeta Yesaya oolepa wira: “(Mwiiwe! Kinnimuruma namitthaka* aka ohoolo wanyu* wira oolokiheryeni ephiro).
3 Nsu na mutthu ninnikhuwela moothakoni niiraka: ‘Mulokiherye ephiro ya Yehova! Mookolole istaraata sawe’”.
4 Yohani Mpatisa aari moothakoni, aalaleeryaka atthu wira opatiso ti ethoonyeryo ya orukunuxa murima, wira mutthu oleveleliwe itampi.
5 Nto atthu a muttetthe wotheene wa oYudeya ni atthu otheene yaakhala oYerusalemu, yaanirowa wa Yohani. Awo yaanipatisiwa* ni Yohani mmuro Yordani, nave yaanihimya itampi saya ohoolo wa atthu otheene.
6 Vano, Yohani aawara nlaya na manri a ekamelo, ni esintu ya esapala* muyuununi mwawe. Owo aalya isoope ni oravo* wa mutakhwani.
7 Owo aanaalaleerya atthu oriki: “Ottuli waka, onnoorwa mutthu mukina oowerya okivikana miyo, yoowo kihimphwanela aka wuurama wira kitaphule mikhoi sa isantaalya sawe.
8 Miyo kihoopatisani ni maasi, masi owo onrowa woopatisani ni munepa woowaarya”.
9 Mahiku ene yaawo, Yesu aahikhuma oNazarethi wa oGalileya, ni aahipatisiwa ni Yohani mmuro Yordani.
10 Nto okhumaka-ru mmaasini, aahiweha erimu ehuleyaka, vano Yesu aahoona munepa wa Muluku okhuruwaka ntoko epompa,* emurweelaka yoowo.
11 Nave-tho, naahiiwanyeya nsu naakhuma wiirimu, nriki: “Nyuwo mwa Mwanaka, kinimphentexa aka, onikihakalaliha vanceene”.
12 Niinaano-ru, munepa woowaarya waahimwiiriha orowa moothakoni.
13 Nto, aahikhala weiwo mahiku 40, eehereriwaka ni Satana. Nave-tho moothakoni-mmo saahikhala inama sa mutakhwani. Malaikha yaanimukhaliherya.
14 Nuumala Yohani ovariwa, Yesu aahirowa oGalileya onaalaleerya atthu ihapari sooreera sa Muluku,
15 iiraka: “Okathi waathanliwe woophiya, nave Omwene wa Muluku ori vakhiviru. Murukunuxe mirima sanyu ni mwaamini ihapari sooreera”.
16 Yesu eettaka okerekhere wa ephareya ya oGalileya, aahinweha Simoni ni Andreya, muhima awe Simoni, arihelaka matthavi aya mphareya, okhala wira yaari atothi a ihopa.
17 Nto Yesu aahaahimeerya wira: “Mukitthareke, miyo kinimookhalihani atothi a atthu”.
18 Okathi ene yoowo, awo yaahihiya matthavi aya, anamutthara Yesu.
19 Avikanaka vakhaani, aahinweha Yakobo ni muhima awe, aihaniwa Yohani, yaawo yaari anamwane a Zebedeyo. Awo yaari mukalawani, alokiheryaka matthavi aya.
20 Nto okathi ene yoowo, Yesu aahiwiitthana. Vano yaahimuhiya paapa aya, Zebedeyo, ori ene mukalawani ni anamuteko, anamutthara Yesu.
21 Nuumala-vo, yaahirowasa oKafarnawu nuuwo.
Ephiyaka-ru esaabadu, Yesu aahikela musinagoga,* onapacerya wiixuttiha.
22 Vano atthu yaahitikinihiwa vanceene ni moota aixuttiha awe, maana itthu aixuttiha awe saakhuma wa Muluku, ohiya ntoko alipa-oowiixuttiha Nlamulo.
23 Okathi ene yoowo, aahikhala mulopwana mmosa musinagoga-mmo,* aavariwe ni nlaikha nootakhala. Nto mulopwana owo aahikhuwela, oriki:
24 “Exeeni erina anyu ni hiyo, nyuwo Yesu munazarethi? Murwenle onipwetexa? Kinnoosuwelani saana. Nyuwo murummwale ni Muluku!”
25 Vano Yesu aahipwapwela nlaikha nle nootakhala, oriki: “Mmaale! Mmukhume mutthu owo!”
26 Nlaikha nlo nootakhala, naahimurihela vathi mulopwana owo, nnamuthukumeliha, nikhuwelaka ni nsu noorunya. Nuumala-vo, naahimuhiya.
27 Nto, atthu otheene yaahitikinihiwa vanceene, anakohana yaawo-ru, ariki: “Exeeni ela? Ola mwiixuttiho wa niinaano! Owo ookhalana owerya wa woomola malaikha ootakhala, nto malaikha awo annimwiiwelela”.
28 Siiso, itthu sotheene Yesu aapaka awe, saahisuweliwa mowaakuveya mapuro otheene a elapo ya oGalileya.
29 Vano, Yesu aahikhuma musinagoga,* onarowa owannyawe Simoni ni Andreya, ori ene ni Yakobo ni Yohani.
30 Amaathi awe Simoni, yaarimummaathi, ewereiwaka efeepere.* Niinaano-ru, awosa yaahimuleela Yesu.
31 Nto, Yesu aahiwaattamela, aahaavarela ntata ni aahiweemexa. Vano, efeepere* yaahaavira, enapacerya owaapeela yoolya.
32 Nsuwa nikelaka-ru, atthu yaahipacerya omuruuhela Yesu aretta otheene ni ale yaavariwe ni malaikha ootakhala.
33 Vano, atthu otheene a epooma ele, yaahithukumana vamukhora wa empa ele aari awe Yesu.
34 Owo aahaapenuxa atthu anceene yaawereiwa iretta soovirikana, ni aahoomola malaikha ootakhala manceene, masi kheemererya wira malaikha awo elavuleke, maana yaanimusuwela okhala Kristu.*
35 Vahalaka oxa, nsuwa nihinatthi okhuma, Yesu aahivenya onarowa opuro wahaakhanle atthu, onapacerya ovekela.
36 Masi, Simoni ni ale aarina awe, yaahirowa omphavela Yesu.
37 Nuumala omphwanya, yaahimuhimeerya wira: “Atthu otheene animoophavelani”.
38 Nto Yesu aahiwaakhula oriki: “Nrowe opuro mukina, mittetthe siri vakhiviru, wira nave kaalaleerye atthu a weiwo, maana eyo ti etthu kirwenle aka”.
39 Vano, aahirowa, onaalaaleerya atthu musinagoga* mwaya, muttetthe wotheene wa oGalileya, nave-tho aanoomola malaikha ootakhala.
40 Weiwo, namakokho* mmosa aahimwaattamela Yesu, onamuxonttela okhoromme ene, ohimyaka wira: “Mwaphavela-ru, munoowerya okipenuxa”.
41 Nto, Yesu aahimmorela ikharari namakokho* ole, aahookola ntata nawe, aahimukwata, onahimya wira: “Kinniphavela! Mpenuwe”.
42 Niinaano-ru, makokho* awe yaahimmalela, nto owo aahikhala saana.
43 Vano, Yesu aahimuhiya orowaka, ni aahimuleela saana,
44 oriki: “Phoole, muhimuleele mutthu, masi murowe mwaixooniherye wa namukuttho. Nave, mwavahe mukuttho onivekeliwa ni nlamulo na Moise mwaha wa openuxiwa wanyu, wira vasuweliwe wira mookhalihiwa saana tthiri”.
45 Akhumaka-ru vale, mulopwana ole aahipacerya olaleya mapuro otheene. Tivonto, Yesu khaawerya okela mpooma ooniwaka. Nto aanikhala mapuro yahaattela oviriwa. Hata vari siiso, atthu yaanirwa, akhumaka ipantta sotheene.
Inoota
^ Aahiiso, “namuhupi”.
^ Ekereku, “vamaithoni vanyu”.
^ Aahiiso, “yaanipwinihiwa; yaanixuweiwa”.
^ Aahiiso, “exapala”.
^ Aahiiso, “enuyi”.
^ Aahiiso, “ekhuntta”.
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Aahiiso, “ettekuxa”.
^ Aahiiso, “ettekuxa”.
^ Aahiiso, woonasa wene: “yaanimusuwela owo aari aani”.
^ Nwehe Moolumo Ootthokiheriwa.
^ Aahiiso, “namakuttula; namaretta”.
^ Aahiiso, “namakuttula; namaretta”.
^ Aahiiso, “makuttula; maretta”.
