Marko 13:1-37
13 Okathi Yesu aakhuma awe mutemplo, mwiixutti awe mmosa aahimuleela wira: “Mwiixuttihi, mooneke moota areerale aya maluku ale ni ipa iye!”
2 Yesu aahimuhimeerya oriki: “Kiira munnoona ipa iye suulupale? Tthiri anoophiya mahiku nihinrowa aya ohala vale nluku nimosa vasulu va nluku nikhwaaya, nihimoroxeliwe vathi”.
3 Yesu aahikilaathi vamwaako Olivera, onaweha etemplo. Vano Pedru, Yakobo, Yohani ni Andreya, yaahimukoha wiiphiini yiiraka:
4 “Munileele: okathi xeeni sinrowa aya okhumelela itthu iya, nave tiivi enrowa okhala ethoonyeryo yoowi itthu iya sinoomala?”
5 Yesu aahipacerya waaleela oriki: “Mwiikasoope wira ohikhale onoohapuxani.
6 Atthu anceene animoorwa arumeelaka nsina naka, ariki: ‘Kristu ti miyo’, nave animwaahapuxa atthu anceene.
7 Vano, mwaiwa vale silavuliwaka ikhotto mapuro oovirikana, muhituthuwe. Tthiri itthu iya sihaana okhumelela, masi khahiyo ti omala wa olumwenku.
8 “Nloko ninrowa owana ni nloko nikina, elapo* ni elapo* ekina, nave-tho sinookhumelela itetere mapuro oovirikana; ni enoothowaka yoolya. Masi itthu iya sinooniherya wira iwo woopaceryani wa ohaawa.*
9 “Vano, nyuwo mwiipasoopeke. Atthu animooroihani otripunaale ni animoowaxulani musinagoga,* ni munooroihiwa ohoolo wa makuvernatoro ni mamwene mwaha wa miyo, wira mukhale anamoona aka vamaithoni vaya.
10 Nave-tho, atthu a maloko otheene ahaana olaleeriwa toko ihapari sooreera.
11 Vano, okathi anookuxaayani wira yoovariheni, muhixanke ni etthu enrowa anyu ohimya; masi mulavule ele munepa woowaarya oniwiirihaayani olavula okathi ene yoowo, maana khahiyo ti nyuwo munilavula, masi munepa woowaarya tonilavula.
12 Nave-tho, munna ononvahererya munnawe wira iiviwe, paapa ononvahererya mwanawe, hata anamwane animwaarukunuwela axipapaya ni aximamaya, wira awiivihe.
13 Nyuwo munoonyokhiwa ni atthu otheene mwaha wa nsina naka. Masi ole onivilela mpakha wookiseryani, tonrowa woopowa.
14 “Tivonto, mwaweha etthu yoonanara enihonona itthu, eri ene nipuro nahaareerela aya okhala, (ole onisoma, ohaana okhalana ankhili wira iiwexexe moolumo ala), ale anikhala oYudeya, apaceryeke otthyawela omiyaakoni.
15 Ole ori vasulu va empa,* ohikhuruwele vathi, nnakhala ohikele mpaani wira okuxe etthu.
16 Ole ori omatta, ohitthike wira okuxe nlaya nawe na ota.
17 Mahiku awo, anootakhaliwa athiyana oorupala ni ale animwaamwiha mwaana!
18 Muthipeleleke ovekela wira eyo ehiiraneye eyiita;
19 okhala wira mahiku awo, onrowa okhala okathi wa maxakha. Okhuma vaavale Muluku opacenrye awe opattuxa elapo mpakha vano, khanakhumelele maxakha ntoko awo, nave khanrowa-tho okhumelela.
20 Mweekeekhai, Yehova ahaavukunle mahiku awo, khuuvo aarowa woopowa. Masi mwaha wa atthu oothanliwa, owo aathanlale awe, oovukula mahiku awo.
21 “Akhala mutthu onooleelani wira: ‘Mooneke, Kristu ori va’, aahiiso ‘Mooneke, ori iwe’, muhikupali.
22 Anookhumelela akristu oowootha ni maprofeta oowootha, yaawo anrowa opaka miiriirya suulupale ni soovirikana, wira vaweryaneya, yaahapuxe hata ale oothanliwa.
23 Tivonto, nwehaweheke. Kihooleelani sihinatthi okhumelela itthu iya sotheene.
24 “Masi mahiku awo, amalaka-ru maxakha, nsuwa nnoottipha, mweeri onoohiya waarya,
25 nave itheneeri sinoomora wiirimu. Vano itthu siri wiirimu sinoottikinyiwa.
26 Atthu anoomoona Mwaana a mutthu orwaaka mmeekuni, ni owerya ni ovuwa wuulupale.
27 Owo onooruma malaikha wira yaathukumanye atthu aathanlale awe, anikhuma ipantte ixexe* sa olumwenku, okhuma vanipacerya aya elapo, mpakha vanimalela aya erimu.
28 “Mwiixutte etthu ni nlikanyiho na mwiri wa ifiiku: Okathi iritta saya isya sinipacerya aya ophuwa, nto makukhu aya anakhumela ota, munnisuwela wira elimwe ehaattamela.
29 Siiso-tho, moonaka-ru sikhumelelaka itthu iya, musuweleke wira Mwaana a mutthu ori vakhiviru, vamukhora.
30 Kinooleelani ekeekhai wira atthu a mahiku ala, tthiri khanrowa omala, itthu iya sotheene sihikhumelenle.
31 Erimu ni elapo sinoomala, masi moolumo aka, khanimala nnakhala vakhaani.
32 “Vano, nihiku nene wala ewoora ene khuuvo onisuwela, nnakhala malaikha a wiirimu hata Mwaana a Muluku, masi Tiithi paahi tonisuwela.
33 Tivonto, muthipeleleke owehaweha, muhirupe, okhala wira khamunsuwela okathi ene othanliwe.
34 Onlikana ni mulopwana mmosa aaphavela weetta mukwaha woorakama. Ohinatthi okhuma, aahaahiyerya arumeyi awe miritti, khula mmosa muteko awe. Nave, aahimuruma kwarta wira othipeleleke owehaweha.
35 Tivonto, muthipeleleke owehaweha, okhala wira khamunsuwela okathi mwaneene empa onirwa awe, vakhala wira onirwa vahalaka wiila aahiiso ohiyu eriyari, wala vahinatthi ophiya oxaka* aahiiso voosiisu,
36 wira arwa mootutuxerya, ohoophwanyeni murupaka.
37 Ele kinooleelaakani nyuwo, kinaaleela-tho atthu otheene: Muthipeleleke owehaweha”.
Inoota
^ Ekereku, “omwene”.
^ Ekereku, “omwene”.
^ Onlikana ni owereya muthiyana onoona awe aahalaka oyara.
^ Nwehe Moolumo Ootthokiheriwa.
^ Nwehe enoota ya Matheyo 24:17.
^ Ekereku, “ipheyo ixexe”.
^ Ekereku, “muthupi woopacerya wiipa”.
