Marko 15:1-47
15 Nuumala oxa, makhulupale a anamukuttho, makhulupale a ayuda ni alipa-oowiixuttiha Nlamulo, vamosa ni eSineedrio* yotheene, yaahithukumana wira ampake palano a moota yaarowa aya omwiiva Yesu. Nto yaahimutthukwa, amuroiha wa Pilato.
2 Vano, Pilato aahimukoha wira: “Niireke nyuwo mwa Mwene a ayuda?” Yesu aahaakhula oriki: “Ti nyuwo munihimya”.
3 Masi makhulupale a anamukuttho yaanimuhimyana itthu sinceene.
4 Pilato aahitthikela-tho omukoha oriki: “Nyuwo khamunaakhula etthu? Niireke khamuniiwa itthu sinceene munihimyaniwa anyu ni atthu ala?”
5 Masi Yesu khaakhunle-tho etthu, nto Pilato aahitikinihiwa vanceene.
6 Khula efesta ya paasikha, Pilato aahilimalela omutaphula mutthu mmosa aatthukweliwe, atthu yanvekela aya.
7 Mahiku awo, aahikhala mulopwana mmosa, aihaniwa Baraba. Owo ni akhwaawe yaatthukwelaniwe awe mukhatteya, yaahinvirikanya kuvernu ni yaahiwiiva atthu.
8 Muttitthi wa atthu waahirowa wa Pilato onanvekela ntoko saalimalenle aya.
9 Pilato aahaakoha oriki: “Muniphavela wira kimutaphule Mwene a ayuda?”
10 Tthiri, Pilato aanisuwela wira makhulupale a anamukuttho yanvarinhe Yesu mwaha wa nrima.
11 Masi makhulupale a anamukuttho, yaahitumererya* muttitthi ole wira avekele otaphuliwa Baraba, ohiya Yesu.
12 Pilato aahaakoha-tho oriki: “Nto muniphavela wira kimwiirihe exeeni ole munimuhimya anyu okhala Mwene a ayuda?”
13 Atthu ale yaahikhuwela ariki: “Okhomeliwe vamwirini!”*
14 Masi Pilato aahitthikela-tho waakoha wira: “Mwaha wa xeeni? Otthenke-ni?” Nlelo awo yaamutepa okhuwela ariki: “Okhomeliwe vamwirini!”*
15 Vano Pilato ophavelaka waahakalaliha atthu, aahimutaphula Baraba. Nto nuumala oruma owaxuliwa Yesu, aahaavahererya wira yamukhomele vamwirini.
16 Atoropa yaahimuroiha Yesu mukintaali, niire so, owannyawe Pilato. Nave yaahaathukumanya atoropa otheene.
17 Yaahinwariha ekuwo yooxeerya ni yaahipaka ekhara ya miiwa, khunwariha mmuruni.
18 Vano awo yaanimukhuwelela ariki: “Ihaali, nyuwo Mwene a ayuda!”
19 Nave-tho, yaanimmana vamuru ni mutathi. Yaanimusenela, anakokhora ohoolo wawe yoothereryaka omuttittimiha.
20 Nuumala onveehasa, awo yaahimurula ekuwo eyo yooxeerya, anwariha-tho malaya awe a ota. Nto yaahimukuxa anamuroiha okhomeliwa vamwirini.
21 Nave-tho, yaahimukhanyererya mulopwana mmosa aavira okhumaka omatta, yoowo aihaniwa Simoni a oKirene, wira oteexe mwiri wa nihaaxeryo* wa Yesu. Mulopwana owo aari paapa awe Alexandre ni Rufo.
22 Siiso, yaahimuroiha nipuro niihaniwa oGolgotha, nenlo nintaphulela, “Muru Ohanle Makhuva-ru”.
23 Opuro ole, yaahinvaha eviinyu yootakaaheriwa ni miira,* masi Yesu aahikhootta.
24 Nuumala omukhomela Yesu vamwirini, atoropa ale yaahikawana malaya awe a ota, yaavereryaka eparakha wira yoone ele khula mutthu aarowa awe okuxa.
25 Waari okathi wa 9 oora ya voosiisu,* awo yaamukhomenle aya vamwirini.
26 Vano nipawe naahimya mulattu ene aakhomeliwa awe, naalempwe so: “Mwene a ayuda”.
27 Nave yaahaakhomela vamwirini alatarau anli vamosa nuuwo. Mmosa moono awe woolopwana, mukina moono awe woothiyana.
28 *——
29 Nto atthu yaavira, yaaninveeha Yesu attikinyaka muru, yiiraka: “Khwaa! Nyuwo mwaahimya wira munoopwexa etemplo ni mwanwerya oteka-tho muhina mwa mahiku mararu,
30 mwiixoopole ni mukhuruwe vamwirini wa nihaaxeryo-vo”.*
31 Nave-tho, makhulupale a anamukuttho ni alipa-oowiixuttiha Nlamulo, yaaninveeha, ariki: “Ola oowerya owoopola atthu akina, masi khoniwerya wiixoopola!
32 Mmuhiye Kristu, Mwene a Isarayeli, okhuruwe vamwirini wa nihaaxeryo,* wira ninwehe, nimukupali”. Nave hata ale yaakhomeliwe vamosa nuuwo, yaaninveeha.
33 Yaarumale aya 12 oora,* elapo ele yotheene yaahikhumelela ewiriphi* mpakha 15 oora.*
34 Yaarumale aya 15 oora, Yesu aahikhuwela ni nsu noowiiwanyeya, oriki: “Eli, Eli, lama sabakthani?”, yeeyo entaphulela wira, “Muluku aka, Muluku aka, xeeni muhalaka okinyanyala?”
35 Atthu akina yeemenle vakhiviru vaavale, nuumala omwiiwa, yaahiira: “Mmwiiweke! Ola onimwiihana Eliya”.
36 Mutthu mmosa aahitthimaka, oxuweya exiponxa* nviinyuni yoonyuunya, otthukwelela vamutathini, onanvaha Yesu wira owurye, oriki: “Mmuhiye! Noone vakhala wira Eliya onimoorwa omukuruxa”.
37 Vano Yesu aahitthikela-tho okhuwela ni nsu noowiiwanyeya, nuumala-vo, aahikhwa.*
38 Ekortiina ya mutemplo yaahikhereya okhuma osulu mpakha vathi.
39 Nto, nuumala mukhulupale a anakhotto, yoowo eemenle vaavale, oweha itthu siiraneyale ni Yesu ohalaka okhwa, aahihimya wira: “Tthiri, ola aari Mwaana a Muluku”.
40 Yaahikhala-tho vaavale athiyana yeemenle ottaiwene, awehaka. Mwa yaawo, aahikhala Maria Madalena, Maria maama awe Yakobo mukhaani ni Yosefe, vamosa ni Salome,
41 yaawo yaamutthara Yesu ni yanvarela muteko okathi aari awe oGalileya, ni athiyana akina yaamutthanre oYerusalemu.
42 Vano, nihinatthi okela nsuwa, ni okhala wira naari nihiku naalokiheriwa aya esaabadu, niire so, nihiku nimosa ehinatthi esaabadu,
43 Yosefe a wArimathaya aahilipiha murima onarowa okumana ni Pilato, onvekela murutthu wa Yesu. Yosefe owo aari mulopwana oottittimihiwa iirela mpantta etripunaale ya etiini ya ayuda, nave aanilipelela Omwene wa Muluku.
44 Pilato aahiphavela osuwela akhala wira Yesu aahikhwa aahiiso nnaari, tivo aahimwiitthana mukhulupale a anakhotto, khimukoha.
45 Nuumala Pilato osuwela wira Yesu aahikhwa, aahimweemererya Yosefe okuxa murutthu.
46 Yosefe aahithuma ekuwo ya eliinyu yooreera, aahikuruxa murutthu wa Yesu, ovitikelela ni ekuwo eyo ya eliinyu yooreera, ovitha mmahiye yaathimpwale vamwala. Nuumala-vo, aahipirikixela nluku vamukhora va mahiye awo.
47 Masi, Maria Madalena ni Maria maama awe Yosefe, yaahihala vaavale awehaka opuro aavithiwe awe Yesu.
Inoota
^ Nwehe Moolumo Ootthokiheriwa.
^ Aahiiso, “yaahithupya”.
^ Aahiiso, “Iiviwe vamwirini”.
^ Aahiiso, “Iiviwe vamwirini”.
^ Nwehe Moolumo Ootthokiheriwa.
^ Etthu yoohapala.
^ Ekereku, “ewoora ya neeraru [nuumala nsuwa okhuma]”.
^ Eversiikulu ela enniphwanyaneya aBiibiliya akina, masi kheniphwanyaneya soolempwa ni matata sinceene sootthuneya sa ekereku.
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Ekereku, “ewoora ya neethanu namosa [nuumala nsuwa okhuma]”.
^ Aahiiso, “elapo ele yotheene yaahiriipela”.
^ Ekereku, “ewoora ya neethanu naxexe [nuumala nsuwa okhuma]”.
^ Etthu enlikana ni munyeenyere woowuuma, yeeyo ennuula maasi.
^ Aahiiso, “aahihiya omumula”.
