Marko 6:1-56
6 Yesu aahivenya onarowa muttetthe awe, nto awiixutti awe yaahimutthara.
2 Vaaphiyale aya esaabadu, Yesu aahipacerya wiixuttiha musinagoga.* Vano atthu anceene yaamwiiwa, yaahitikinihiwa anahimya wira: “Mulopwana ola iixuntte vai itthu iya? Ti pani onvahale osuwela nno ni owerya opaka miiriirya iya?
3 Ola khahiyo kalapinteero, mwaana a Maria, ni munnawe Yakobo, Yosefe, Yuda ni Simoni? Ankhi axirokorawe, khahiyo yaala anikhala ni hiyo?” Tivonto, awo khiyaamukupanli.*
4 Vano Yesu aahaaleela wira: “Khaavo profeta onittittimihiwa muttetthe awe aahiiso ni amusi awe nnakhala vatthokoni vawe”.
5 Siiso, Yesu khaavanre miteko sootikiniha muttetthe ole, masi aapenunxe aretta vakhaani paahi, owiixaatheryaka matata awe.
6 Owo aahitikinihiwa vanceene mwaha wa ohaamini waya. Vano, aahirowa mittetthe soowaattamela, owiixuttihaka atthu.
7 Yesu aahiwiihana arummwa 12, aaruma anli-anli, ni aahaavaha ikuru wira aweryeke woomola malaikha ootakhala.
8 Nave-tho, owo aahaaruma wira ahikuxe etthu yaarowaka mukwaha aya, masi amukuxe ttootto paahi. Nave ahikuxe ephaawu, murupa wa yoolya ya mukwaha, nnakhala musurukhu* mmurupani.
9 Masi Yesu aahaaleela wira arowe paahi ni isantaalya yaawanre aya ni ikuwo saawanre aya.
10 Nave aahaaleela wira: “Khula etthoko enrowa anyu, mukhaleke vaavo mpakha okathi munikhuma anyu muttetthe owo.
11 Vano muttetthe muhinrowa anyu waakheliwa aahiiso owiriyaniwa, nto okathi onikhuma anyu, mutatheke ntthupi na inawu sanyu, ntoko ethoonyeryo yoowi awo aattheka”.
12 Awiixutti yaahivenya, khurowa waalaleerya atthu wira arukunuxe mirima saya.
13 Nave yaahoomola malaikha ootakhala manceene, yaahaattikitthela makhura aretta anceene, ni yaahaapenuxa.
14 Vano, mwene Herodi aahiiwa olavuliwaka Yesu, maana nsina nawe naahivuwa, ni atthu yaanihimya wira: “Owo ti Yohani Mpatisa, oroohihimuxiwa mookhwaani. Tivo orina awe owerya wa ovara miteko sootikiniha”.
15 Akina yaanihimya wira: “Owo ti Eliya”. Akina-tho yaahimya wira: “Owo profeta, ntoko ale a khalai”.
16 Vano, Herodi vaiwale awe, aahiira: “Yohani, yoowo miyo kaarumme aka wiikitthiwa muru, oroohihimuxiwa”.
17 Tthiri, Herodi mwaneene, aahiruma ovariwa Yohani, khitthukweliwa mukhatteya, mwaha wa Herodiya, mwaarawe Filipe, munnawe Herodi, okhala wira Herodi aahimuthela.
18 Yohani aanimuhimeerya Herodi wira: “Nyuwo khamuneemereriwa omuthela mwaara a munninyu”.
19 Tivo, Herodiya aanimunyokha Yohani, onaphavela omwiiva, masi khaawerya.
20 Herodi aanimoova Yohani, maana aanisuwela wira Yohani aari naxariya ni aanimukokhorela Muluku. Nto Herodi aanimukhapelela. Khula okathi anwiriyana awe Yohani olavulaka, Herodi khaasuwela yoomwiiriha. Tivonto, vaanimusivela onwiriyana.
21 Naahiphiya nihiku nooreerela, nenlo Herodi aapanke awe efesta ohiyu, otthapelaka nihiku na oyariwa wawe. Owo aahaalattula makhulupale a mulaponi, makumantanti a atoropa ni atthu oovuwa a oGalileya.
22 Okathi ene yoowo, mwaana mwaamuthiyana a Herodiya, aahiphiya, aniina. Eyo yaahimusivela Herodi ni atthu yaalya* vamosa nuuwo. Mwene Herodi aahimuhimeerya mwali ole, wira: “Mukivekele khula etthu eniphavela anyu, miyo kinimoovahani”.
23 Nave aahilapha oriki: “Khula etthu enrowa anyu okivekela, miyo kinimoovahani, hata okawanya omwene aka eriyari”.
24 Nto aahirowa omukoha maama awe, oriki: “Kaveke exeeni?” Maama awe aahimuhimeerya wira: “Mwaveke muru wa Yohani Mpatisa”.
25 Tivonto, mwali ole aahitthimakela niinaano-ru wa mwene Herodi, onanvekela, oriki: “Mukivahe niinaano-va, muru wa Yohani Mpatisa, muthaaluni”.
26 Nnaamwi aariipiwe murima vanceene, mwene Herodi khaaphavela okhootta ele aavekeliwe awe, maana aahilapha ni mwaha wa atthu aalattunle awe.*
27 Tivo, mwene Herodi aahimuruma kwarta mmosa wira omuruuhele muru wa Yohani. Nto kwarta owo aahirowa wiikittha muru wa Yohani mukhatteya,
28 khiruuha muthaaluni. Aahinvahererya mwali ole, nto owo aahimuroihela maama awe.
29 Nuumala awiixutti a Yohani wiiwa etthu ele, yaahirwa okuxa murutthu awe, khuvitha mmahiye.
30 Arummwa yaahithukumana ni Yesu, amuleela itthu sotheene yaapanke aya ni yaixuttihale aya.
31 Yaahikhala atthu anceene yaarwa ni yaarowa, nto Yesu ni awiixutti awe khiyaarina okathi woomumula, nnakhala woolya. Tivo Yesu aahaahimeerya awiixutti awe wira: “Nyuwo murwe wiiphiini, nipuro nihinaattela oviriwa, mwamumule vakhaani”.
32 Siiso, Yesu ni awiixutti awe yaahikela mukalawani, anarowa nipuro noomaaleleya.
33 Masi atthu anceene yaahaaweha avenyaka ni yaahisuwela eyo. Tivo, atthu a ipooma sotheene yaahitthimakela weiwo, khupacerya ophiya.
34 Vano, okathi Yesu aakhuma awe mukalawani, aahiweha muttitthi muulupale wa atthu, ni aahiwoonela othunku, okhala wira yaari ntoko ipwittipwitthi sihirina makampusi aya. Nto, aahipacerya owiixuttiha itthu sinceene.
35 Nsuwa nikelaka-ru, aawiixutti awe yaahirowa okumana ni Yesu, anamuleela wira: “Nipuro nla ti noorakamela omuttettheni, nave vahanle wiila.
36 Mwaamwarye atthu ala arowe mittetthe soowaattamela ni mmawaani, wira yathume etthu yoolya”.
37 Nto Yesu aahiwaakhula wira: “Mwaavaheke nyuwo yoolya”. Awo yaahimukoha, ariki: “Nookhala oorowa othuma iphaawu musurukhu oniphiyerya itenaario* 200, wira naavahe atthu ala?”
38 Owo aahaakoha wira: “Murina iphaawu ikavi? Murowe mwawehe!” Nuumala awiixutti okohererya, yaahimwaakhula ariki: “Siri iphaawu thanu ni ihopa piili”.
39 Vano Yesu aahaaruma atthu otheene okilaathi vamalaxini makithi, ari ene ikrupu sene.
40 Nto yaahikilaathi ari ene ikrupu sa atthu 100 ni 50.
41 Nuumala-vo, Yesu aahikuxa iphaawu iyo thanu ni ihopa piili, aahiweha osulu, onavekela. Vano aahikawanya iphaawu iyo, aavaha awiixutti, nto awiixutti yaahaakawela atthu. Nave aahikawanya ihopa iye piili aavaha atthu otheene.
42 Atthu otheene yaahilya mpakha ovona.
43 Nuumala-vo, saahittotteliwa ipetaaso sa* iphaawu saahanle, khusarya ittanka* 12, nave saahittotteliwa ihopa saahanle.
44 Vano atthu yaakhunre iphaawu, yaari alopwana 5.000.
45 Nto, voohipisa, Yesu aahaaruma awiixutti awe okela mukalawani, wira ahooleke alapuwelaka ekhopela ekina ya ephareya, oluluwanya oBethisaida. Owo aahanle aamwaryaka atthu.
46 Nuumala Yesu waalaxerya atthu ale, aahirowa omwaako ovekela.
47 Okathi waapacenrye aya wiila, ekalawa yiira eri ene eriyari ya ephareya, masi Yesu aari mekhawe eemenle ene vatthayani.
48 Vano, vakelaka oxa,* Yesu voonale awe wira awiixutti awe vaanaaxankiha weettiha ekalawa, okhala wira yaarowa waakhuma epheyo, aahirowa vaari aya, eettaka vasulu va maasi a mphareya. Masi aahala vakhaani waavikana.
49 Vanwehale aya Yesu eettaka vasulu va maasi a mphareya, awiixutti yaahuupuwela wira: “Niireke nnooloha!” Nto yahikhuwela,
50 okhala wira otheene aya yaahimoona, atuthuwa. Voohipisa, Yesu aahilavula naawo oriki: “Mulipihe murima! Ti miyo, muhoove”.
51 Nuumala-vo, aahikela mukalawani, khikhala naawo. Nave epheyo yaahimaala. Awiixutti yaahitikinihiwa vanceene,
52 maana khiyaiwexenxe yootaphulela ya mwiiriirya wa iphaawu. Tthiri awo khiyaawerya wiiwexexa.
53 Nuumala olapuwela ekhopela ekina, yaahiphiya oXenesareti, yeemexa ekalawa aya waattamela weiwo.
54 Akhumaka-ru mukalawani, atthu a elapo ele yaahimusuwela Yesu.
55 Nto, atthu awo yaahitthimakela waaleela anammawaani a muttetthe ole. Vano, awo yaanimuroihela Yesu aretta vanrepani,* mapuro otheene yaiwa aya wira Yesu aari weiwo.
56 Siiso, ilapo sotheene ni mittetthe sotheene ni mapuro otheene aaphiya awe, atthu yaanaaruuha aretta aya omerkaatu.* Nave-tho, yaanimuxonttela Yesu oweemererya aretta ovara vathi va nlaya nawe na ota paahi. Nto otheene ale yaavara, yaanikhala saana.
Inoota
^ Nwehe Moolumo Ootthokiheriwa.
^ Aahiiso, “awo yaahikhumuwa mwaha wa yoowo”.
^ Ekereku, “ekoopiri”.
^ Aahiiso, “yaari vameesa”.
^ Aahiiso, “aarina awe vameesa”.
^ Musurukhu maluku ene wa eparatha wa oRoma. Nwehe Moolumo Ootthokiheriwa.
^ Aahiiso, “mapattuxa a”.
^ Aahiiso, “isestu”.
^ Ekereku, ‘okathi wa neexexe’. Okathi Yesu aari awe valaponi, ‘okathi wa neexexe’, waapacerya ewoora ya neeraru ya voosiisu mpakha nsuwa okhuma.
^ Aahiiso, “vakhaamani”.
^ Waari opuro atthu yaathuma aya ni otumiha itthu, nave atthu anceene yaathukumana aya.
