Marko 7:1-37
7 Vano, afarisi ni alipa-oowiixuttiha Nlamulo akina, yaahirwa ekhumaka oYerusalemu, emuthukumanela Yesu.
2 Awo yaahiwoona awiixutti a Yesu alyaaka matata aya anananre ene, eyo piiyo, ahinyanwe.*
3 (Afarisi ni ayuda otheene khanilya ahinyanwe mpakha mweekookhinoni, attharihelaka soolema sa amuhavinre aya,
4 nave yaatthikaka omerkaatu, khanilya ahiirapihale. Sookhala soolema sikina sinceene avahiwe aya ni anivarexexa aya, ntoko opatisa ikoopho, mirinki ni mino sa ekoopiri.)
5 Tivonto, afarisi ni alipa-oowiixuttiha Nlamulo yaamukohale aya Yesu wira: “Xeeni awiixutti anyu ahinittittimiha aya soolema sa amuhavinre, analya matata aya anananre ene?”
6 Yesu aahiwaakhula wira: “Yesaya aahilavula ekeekhai oohimyakani nyuwo anawoothe, ntoko valempwale aya wira: ‘Atthu ala anikittittimiha ni eyano paahi, masi mirima saya khisikhanle vaavo.
7 Anikikokhorela mahala ene, okhala wira aniixuttiha sooruma sa atthu’.
8 Nyuwo munnihiya otthara sooruma sa Muluku, munatthara soolema sa atthu”.
9 Nave-tho, Yesu aahaahimeerya wira: “Nyuwo munnirumeela olavilavi wira mukhootte sooruma sa Muluku, mphavelaka otthara soolema sanyu.
10 Mwa ntakiheryo, Moise oohimya wira: ‘Mwaattittimiheke apapinyu ni amaminyu’. Nave oohimya wira: ‘Ole onaaveeha* apapawe ni amamawe, ohaana wiiviwa’.
11 Masi nyuwo munihimya wira: ‘Akhala mutthu onaaleela apapawe aahiiso amamawe wira: “Itthu kaarina aka wookhaliheryani, kooleiherya onvaha Muluku”’,*
12 nyuwo munnimukhoottiherya waakhaliherya apapawe aahiiso amamawe.
13 Tivo, nyuwo muhiiriha nuulumo na Muluku ohikhalana efaita mwaha wa soolema sanyu, seiyo nwiixuttihale anyu akina. Nave munniira itthu sinceene sinilikana ni iya”.
14 Vano Yesu aahiihana-tho muttitthi wa atthu wira orwe vaari awe, onaahimeerya wira: “Otheene anyu mukiwiriyane, ni mwiiwexexe saana ele enihimyaka.
15 Etthu enimunanariha mutthu khahiyo ele enikela mwaano mwawe, masi enimunanariha tiile enikhuma mwaano mwawe”.
16 *——
17 Nuumala Yesu ohiya muttitthi ole, aahiphiya vatthokoni, nto awiixutti awe yaahimukoha yootaphulela ya nlikanyiho nle.
18 Yesu aahaahimeerya wira: “Nave nyuwo khamuniiwexexa ntoko atthu ale? Niireke khamunsuwela wira itthu sotheene sinikela mwaano mwa mutthu, khasinimunanariha?
19 Tthiri itthu iyo, khasinikela vamurimani, masi sinikela mmirimani, nuumala-vo sinakhumela ota”.
20 Nave-tho, Yesu aahihimya wira: “Itthu sotheene sinikhuma mwaano, ti sinimunanariha mutthu.
21 Veekeekhai, vamurimani va mutthu sinnikhuma miyuupuwelo sootakhala: orupihana woohiloka,* wiiya, wiiva,
22 oraruwa, ohiphiyeriwa, otakhala, owoka, mweettelo woohiloka onooniherya ohuuliwa muru,* nrima, onveeha Muluku, wiisoona ni ohaathokorerya akina.
23 Itthu iya sotheene sootakhala, sinikhuma vamurimani, nto ti seiyo sinimunanariha mutthu”.
24 Nuumala okhuma opuro ole, Yesu aahirowa muttetthe wa oTiro ni oSidoni. Vano owo aahiphiya vatthokoni, nto khaaphavela wira atthu asuwele wira oophiya, hata vari siiso, awo yaahisuwela.
25 Yesu aphiyaka-ru, muthiyana mmosa, yoowo mwanawe mwaamuthiyana aavariwe ni nlaikha nootakhala, aahiiwa oromoliwaka Yesu, nto aahirwa okhoroma ohoolo wawe.
26 Muthiyana ole aari mukereku, aayariwe oFenisia wa oSiiria. Nto aanithipelela onvekela Yesu wira oomole nlaikha nootakhala nanvanre mwanawe mwaamuthiyana.
27 Yesu aahimuhimeerya wira: “Mwahiye toko anamwane alye mpakha ovona, maana khivanireerela owaakha anamwane yoolya, onaarihela axaana a alapwa”.
28 Vano muthiyana owo aahimwaakhula Yesu, iiraka: “Aayo, atokweene. Masi hata axaana a alapwa, annoolya itathela sinaamora anamwane”.
29 Nto Yesu aahimuhimeerya wira: “Okhala wira muhaakhula siiso, muroweke, nlaikha nootakhala, noomuhiya mwaninyu”.
30 Okathi muthiyana ole aaphiyale awe owannyawe, aahimphwanya mwanawe ommaathale ene vakhaamani, nlaikha nootakhala nimuhiyale ene.
31 Yesu aahikhuma muttetthe wa oTiro, onavira oSidoni, orowaka ephareya ya oGalileya. Vaakhumale awe iwo, aahirowa muttetthe wa oDekaapoli.*
32 Weiwo, atthu yaahimuruuhela mulopwana mmosa ahaiwa ni ahaalavula saana. Awo yaanimuxonttela Yesu wira omwiixaatherye matata awe.
33 Yesu aahimuroiha mulopwana owo wiiphiini, ottaiwene wa muttitthi ole. Nuumala-vo, aahikeliha ikatha sawe owaruni wa mulopwana ole. Nave, Yesu aahisenela ikatha sawe, okwata nlumi na mulopwana ole.
34 Nuumala oweha wiirimu, Yesu aahiittha iphumu, onahimya wira: “Efatha”, eyo piiyo, “Mutthukuwe”.
35 Niinaano-ru, owaruni wa mulopwana ole waahitthukuwa, nlumi nawe naahitaphuwa, nto owo aahipacerya olavula oratteene.
36 Vano, Yesu aahaalopola wira ahimuleele mutthu. Masi okathi Yesu aatepa awe waaleela siiso, awo yaamutepa omulaleya.
37 Tthiri, atthu ale otheene yaahitikinihiwa vanceenexa, anahimya wira: “Owo onnipaka saana itthu sotheene. Ootthukula maaru a atthu yahaiwa, nave oowiiriha olavula ale yahaalavula”.
Inoota
^ Afarisi ni ayuda yaaninyawa attharihelaka soolema saya.
^ Aahiiso, “onaaramusa”.
^ Ekereku, “ekorpani”.
^ Eversiikulu ela enniphwanyaneya aBiibiliya akina, masi kheniphwanyaneya soolempwa ni matata sinceene sootthuneya sa ekereku.
^ Ekereku, porneía. Nwehe Moolumo Ootthokiheriwa.
^ Ekereku, aselgéia. Nwehe Moolumo Ootthokiheriwa ani: “Mweettelo Woohiloka Onooniherya Ohuuliwa Muru”.
^ Aahiiso, “muttetthe wa Ipooma 10”.
