Masaalimu 116:1-19
116 Miyo kinnimphenta Yehova,Okhala wiira onniwiriyana* nsu naka, onnikiiwa kaamuxonttelaka wiira okikhaliherye.
2 Owo onnitheteya niyaru nawe* wiira okiwiriyane,Nave kinonvekelaka okumi aka wootheene.
3 Mikhoyi sa wookhwaani sookitthukwa;Mahiye aakivara.
Kootepa oxanka ni kooriipiwa murima vanceene.
4 Masi kaahivekela kiromolaka nsina na Yehova, kiiraka:
“Khoo Yehova, mukoopole!”
5 Yehova onnoona othunku ni ta xariya;Muluku ahu toomoriwa ikharari.
6 Yehova onnaakhapelela ale ahirina ankhili.
Ikuru saahikimalela, nto owo aahikoopola.
7 Miyo nkinrowa oxanka,Okhala wiira Yehova ookireerela murima.
8 Mookoopola mookhwaani,Nyuwo moopuputtha maithori aka, ni khimweemerenrye wiira inawu saka sikwattuliwe.*
9 Kinimweetta ohoolo wa Yehova, mulaponi mwa atthu akumi.
10 Kaahaamini, tivonto kaahilavula;Kaahixanka vanceene.
11 Miyo kaahivelavela, kinahimya wiira:
“Apinaatamu ootheene anawoothe”.
12 Kimuxukhurele sai Yehova,Mwaha wa itthu sootheene sooreera onikiirela awe?
13 Kinoowurya etthu eri mukaalisini, wiira kimuxukhurele mwaha wa okoopola,Nave kinoottottopela nsina na Yehova.
14 Kinimwaataphula anatiri kimmanenle aka Yehova,Ohoolo wa atthu awe ootheene.
15 Yehova onnoona owereya,Okathi anikhwa aya arumeyi awe oororomeleya.
16 Khoo Yehova, kinnoovarani metto,Okhala wiira ka murumeyi anyu.
Miyo ka murumeyi anyu, mwaana a epottha anyu yoothiyana.
Mookitaphula ikwirinti kaatthukwaniwe aka.
17 Kinimoovahani mukuttho wiira kooxukhureleni;Kinoottottopela nsina na Yehova.
18 Kinimwaataphula anatiri kimmanenle aka Yehova,Ohoolo wa atthu awe ootheene,
19 Vate va empa ya Yehova,Eriyari anyu, nyuwo Yerusalemu.
Mmuttottopeleke Yah!*
Inoota
^ Aahiiso, woonasa wene: “Miyo kinniphenta, okhala wiira Yehova onniiwa”.
^ Aahiiso, “onnuurama wiira okiwiriyane”.
^ Aahiiso, “sikwathule; sikakattuwe”.
^ Aahiiso, “Aleluya!” “Yah” ti enamuna yookhuveya ya nsina na Yehova.
