Masaalimu 132:1-18
Nsipo na Atthu Aniwela.
132 Xontte Yehova, mmuupuwele Davidi,Ni ohaawa wawe wootheene.
2 Yehova, muupuweleke wiira owo ohoolaphelani,Nyuwo mwa Muluku oowerya a Yakobe.
Davidi ohoomanelani natiri iiraka:
3 “Nkinrowa ovolowa mpaani mwaka.
Nkinrowa wumpaathi vakhaamani vaka;
4 Nkinrowa orupa,Nnakhala nkinrowa owala maitho aka,
5 Kihiphwannye opuro para Yehova,Opuro wooreera* para Muluku oowerya a Yakobe”.
6 WEfrata, naahiiwa olavuliwaka sa nivuku,*Naahiphwanya nivuku nlo mutakhwani.
7 Nrowe nikele mpaani mwawe;*Nrowe nuurame nipuro oninyakeliha awe inawu sawe.
8 Xontte Yehova, nvenye! Murwe nipuro nla munrowa anyu okhalaka,Nyuwo ni nivuku na ikuru sanyu.
9 Anamukuttho anyu, awareke exariya,Nave arumeyi anyu oororomeleya, atthapeke.
10 Mwaha wa etthu mmuleihenrye anyu murumeyi anyu Davidi,Muhimukhootte ole mmuthanlale anyu.
11 Yehova oomulaphela etthu Davidi;Owo khonrowa otthikela ottuli ni moolumo awe ani:
“Mutthu mmosa a osuulu anyu,*Kinompweha veehiceni vanyu.
12 Vakhala wiira osuulu anyu onoottharaka nivarihano naka,Ni malamulo aka kiniwiixuttiha aka,Nave osuulu aya,Onrowa okilaathiki veehiceni vanyu mahiku ootheene”.
13 Yehova oothanla oSiyoni;Owo onniphavela vanceene muttetthe owo, wiira okhaleke weiwo oriki:
14 “Nla nipuro kinrowa aka okhalaka mahiku ootheene;Kinrowa okhalaka vaava, okhala wiira ela ti etthu kiniphavela aka.
15 Kinooreeliha vanceene epooma ela ni eyoolya;Kinimwaavaha atthu oohaawa eyoolya eniphiyerya.
16 Kinoowoopola anamukuttho anikhala mpooma-mmo,*Nave atthu oororomeleya anikhala memmo anootthapaka.
17 Memmo, kinimwiiriha ikuru* sa Davidi wuncerereya.
Koolokiherya muthuko para ole kimuthanlale aka.
18 Kinoowiiriha awanani awe wuuliwa muru,Masi ekhara awe enrowa waaryaka”.
Inoota
^ Aahiiso, “Etapernaakulu yooreera”.
^ Aahiiso, “etapernaakulu”.
^ Aahiiso, “mutapernaakulu mwawe mooreera”.
^ Eheeperi, “muhokorokho wa mmirimani mwanyu”.
^ Aahiiso, “Nave anamukuttho aya kinimwaawariha woopowa”.
^ Eheeperi, “nnyaka”.
