Masaalimu 139:1-24
Para tiretoore a isipo. Nsipo na Davidi.
139 Khoo Yehova, nyuwo mootokosa murima aka, nave munnikisuwela.
2 Nyuwo munnisuwela okathi kinikilaathi aka ni okathi kineemela aka.
Munnisuwela miyuupuwelo saka, muri ene ottaiwene.
3 Nyuwo munnikiweha* okathi kineetta aka ni kinimmaathi aka;Munnisuwela iphiro saka sootheene.
4 Yehova, nyuwo munnisuwela etthu kinrowa aka ohimya,Nlelo kihinatthi olavula etthu.
5 Nyuwo mookirukurerya ipantte sootheene, wiira mukikhapelele;Nave ntata nanyu nookivarelela.
6 Nyuwo munnikisuwela oratteene.
Eyo etthu yootikiniha, kihiniwerya aka osuwela saana.
7 Kinrowa otthyawela woowi, wiira kisyake ikuru sanyu soowaarya?Nave kinrowa wiipitha woowi, muhinrowa anyu owerya okiweha?
8 Vaakhanle wiira koowela wiirimu, nyuwo mwaamukiweha weiwo.Nave vaakhanle wiira koorupa Mmahiye* nyuwo mwaamukiphwanya.
9 Vaakhanle wiira kinniwerya ovava osulu wootheene moowaakuveya, siisaale ntoko onikhumelela aya waarya wa oxaka,Kinarowa okhala omalenle ephareya,
10 Hata kiri ene weiwo, ntata nanyu naamukeettiha,Ntata nanyu noolopwana naamukivarela.
11 Kahimya wiira: “Nkiniwerya wooniwa veepiphini!”
Para nyuwo, epiphi eyo enrowa okhala okokola.
12 Hata epiphi, khiyaarowa okhala yooriipela para nyuwo,Masi ohiyu, waarowa okhala wookokola ntoko othana.Para nyuwo, epiphi enoolikana ni okokola.
13 Ti nyuwo mpanke isyo saka;Mwaahikisuka* mmirimani mwa amaama.
14 Enamuna yootikiniha mukipanke anyu, ennikitikiniha vanceene, ni ennikiiriha woottottopelani.
Miteko sanyu ti sootikiniha,Nto miyo kinnisuwela eyo oratteene.
15 Makhuva aka khiyaavitheyale vamaithoni vanyu,Okathi mwaakipanke anyu nipuro noowiipitheya,Okathi kannuwa aka mmirimani mwa amaama.*
16 Maitho anyu yaahikiweha kihinatthi oyariwa;Ipantte sootheene sa erutthu saahilempwa muliivuruni mwanyu,Ehinatthi okhumelela nnakhala epantte emosa.Hata mahiku saarowa aya opakeya, yaahilempwa.
17 Kinnoona miyuupuwelo sanyu okhala sa efaita yuulupale!
Khoo Muluku, mwaattelo aya khoreere!
18 Vaakhanle wiira kaamweererya okontari, iyo sanvikana mihaava sa ophareya.
Hata kivenyaka voosiisu, nlelo kaarowa wiira kikontariki.*
19 Khoo Muluku, xontte nwiive atakhali!
Nto, atthu ootakhala murima, yaamukihiya,
20 Ti yaawo anilavula itthu sootakhala, wiira yookumiheryeni maxakha;*Awo awanani inyu, yaawo anirumeela nsina nanyu mwa enamuna yoohikhalela.
21 Kiira kinnaanyokha ale anoonyokhani, nyuwo Yehova?Kiira kinnaathanya ale anoovirikanyani?
22 Miyo kinnaathanya atthu awo;Mweekeekhai, awo awanani aka.
23 Khoo Muluku, mukitokose ni musuwele murima aka.
Mukivarerye, musuwele miyuupuwelelo saka sinikixankiha.
24 Moone vakhala wiira ehaavo etthu yootakhala vamurimani vaka,Ni mukeettiheke ephiro ehinimala.
Inoota
^ Eheeperi, “munniphima”.
^ Nwehe Moolumo Ootthokiheriwa.
^ Aahiiso, woonasa wene: “Mwaahikitthava”.
^ Eheeperi, “Okathi kaatthaviwale aka mapuro oowiixerya a mulaponi”.
^ Eheeperi, “nlelo kiri ni nyuwo”.
^ Aahiiso, “attharaka muupuwelo aya”.
