Masaalimu 32:1-11
Nsipo na Davidi. Maskiili.*
32 Oohakalala tuule onileveleliwa itampi sawe ni siliyaliwe* soottheka sawe.
2 Oohakalala tuule Yehova ohininvaha awe mulattu,Yoowo ohirina miyuupuwelo soowoototha.
3 Okathi kaamaalale aka, makhuva aka yaahitteettheya, okhala wiira kaanixanka mahiku ootheene.
4 Othana ni ohiyu, ntata nanyu* naanikilemela.
Ikuru saka saahimala, ntoko maasi aniwelela mwaha wa nsuwa nooviha na elimwe. (Selahi)
5 Nto kaahooleelani etampi aka;Nkaavinthe yoottheka aka.
Kaahihimya wiira: “Kinoomuleela Yehova itampi saka”.
Vano nyuwo mwaahikilevelela itampi saka. (Selahi)
6 Tivonto, atthu ootheene oororomeleya animoovekelakani,Okathi vaniweryaneya aya owaattamelani.
Hata akhumelelaka maasi manceene, khanrowa waaphwanya atthu awo.
7 Nyuwo mwa nipuro naka kiniipitha aka;Munrowa okikhapelela okathi kinrowa aka oxanka.
Munrowa okeemexa eriyari ya atthu anitteeliwa murima mwaha wa woopola wanyu. (Selahi)
8 “Kinimoovahani ankhili, ni kinoowiixuttihani ephiro mukhanle anyu ootthara.
Kinimoovahani miruku ni kinimookhapelelani.
9 Muhikhaleke ntoko ekhavalo aahiiso mwaamunama oniihaniwa muula,Seiyo sihinsuwela etthu,Ni sineettihiwa erumeeliwaka eyeettiheryo aahiiso mukhoyi, wiira siiweleleke”.
10 Atakhali annihaawa vanceene;Masi ole onimuroromela Yehova, onnirukureriwa ni ophenta wawe woororomeleya.
11 Nyuwo anaxariya, mutteeliweke murima ni mutthapeke mwaha wa Yehova;Nyuwo ootheene ooreera murima, mukhuweleke voohakalala.
