Masaalimu 40:1-17
Para tiretoore a isipo. Nsipo na Davidi.
40 Kinnimulipelela Yehova ni murima aka wootheene,Nave owo ootheteya niyaru nawe wiira okiwiriyane* okathi kinikhuwela aka, kivekelaka okhaliheriwa.
2 Owo ookikumiha mulittini muri maasi ootupa,Ookikumiha vanttopheni.
Nave oheemexa inawu saka vasulu va mwala;Oolipiha inawu saka.
3 Nuumala-vo, ookiixuttiha nsipo na niinaano,Nsipo na omuttottopela Muluku ahu.
Atthu anceene anrowa owehaka itthu Muluku opanke awe, atikinihiwe ene,Ni anoomuroromelaka Yehova.
4 Mutthu oohakalala ti yoole onimuroromela Yehova,Ni ohinaaroromela atthu oowiikuxererya aahiiso anawoothe.
5 Khoo Yehova, Muluku aka,Nyuwo munninuupuwela,Nave mooniirela itthu sinceene sootikiniha.
Khuuvo onlikana ni nyuwo;Vaakhanle wiira kiheererya olaleya ni ohimya miteko sanyu sootheene,Miyo nkaarowa owerya, maana khasireere!
6 Nyuwo khamphavenle mukuttho nnakhala etthu wiira nvahiwe,Masi mootthukula maaru aka wiira kiiweke.
Khanvenke soovaha para opahiwa ni soovaha para oleveleliwa itampi.
7 Vano kaahihimya wiira: “Moone, miyo kihoorwa.
Murooluni, yoolempwa etthu kihimmwaka miyo.
8 Muluku aka, okisivela vanceene opaka etthu muniphavela anyu.Nave nlamulo nanyu niri vamurimani vaka.
9 Kinnilaleya ihapari sooreera sa exariya, eriyari ya muloko woowaatta atthu.
Yehova, ntoko munisuwela anyu, miyo nkinimaala.
10 Miyo nkiniipithiha exariya anyu vamurimani vaka.
Kinnilaleya ororomeleya wanyu ni woopola wanyu.
Nkinivitha ophenta wanyu woororomeleya ni ekeekhai anyu, eriyari ya muloko woowaatta atthu”.
11 Xontte Yehova, muhihiye okimorela ikharari.
Ophenta wanyu woororomeleya ni ekeekhai anyu, sikikhapeleleke okathi wootheene.
12 Mixankiho sinikirukurerya khasireere, kihinawerya okontari.
Itampi saka khasireere waatta, sinnikikhulumula kihinawerya woona opuro onirowa aka;Iyo ti soowaatta ovikana ikharari saka,Nave miyo kookhulumuwa.
13 Xontte Yehova, mukoopole.
Khoo Yehova, mwaakuve murwe mukikhaliherye.
14 Ootheene yaale aniphavela okiiva,Yuuliwe muru ni aveeheye.
Ootheene yaale anihakalala ni ohaawa waka,Atthikele ottuli yuuliwe ene muru.
15 Ootheene yaale anikitheya yiiraka: “Ekaa! Ekaa!”
Axankiheye mwaha wa wuuliwa muru.
16 Masi ootheene yaale aniwaavyani,Atthapeke ni atteeliweke murima mwaha wa nyuwo.
Ootheene yaale aniphavela vanceene woopoliwa ni nyuwo, okathi wootheene ahimyeke wiira:
“Ovuwihiwe Yehova”.
17 Masi miyo koovelavela ni koohaawa;Xontte Yehova, mukiwehe.
Ti nyuwo munikikhaliherya ni munikoopola;Muluku aka, muhipise.
Inoota
^ Aahiiso, “ohuurama wiira okiwiriyane”.
