Masaalimu 41:1-13
Para tiretoore a isipo. Nsipo na Davidi.
41 Oohakalala tuule onaakhaliherya atthu oohaawa;Yehova onrowa omoopola mmaxakhani.
2 Yehova onoomukhapelela wiira okhale mukumi.
Atthu akina anooweha wiira ti mutthu oohakalala;Khamunrowa onvahererya mmatatani mwa awanani awe.
3 Okathi oniwereiwa awe, ohinawerya ovenya vakhaamani, Yehova onoomukhapelela;Nyuwo munoomukhapelela okathi oniwereiwa awe.
4 Miyo koohimya wiira: “Yehova, mukireerele murima.
Mukipenuxe, okhala wiira kihootthekelani”.
5 Masi awanani aka annikilavulela itthu sootakhala, yiiraka:
“Mutthu ole onrowa okhwa silini, wiira nsina nawe niliyaliwe?”
6 Mmosa a yaawo arwa okixukurya, onihimya itthu soowootha.
Owo onnithukumanya moolumo ootakhala wiira olavule;Nuumala-vo, onnirowa waaleela atthu akina.
7 Atthu ootheene anikinyokha, annikaapa;Awo annimpaka palano wiira akiirihe etthu yootakhala, ahimyaka wiira:
8 “Yoomukhumelela etthu yootakhala;Vano owo ohimmaathi, nto khonikhala-khala ovenyaka”.
9 Nave-tho, mpatthani aka muulupale, yoowo kaamuroromela aka,Ni kaalya aka vamosa, ookirukunuwela.
10 Xontte Yehova, mukireerele murima ni mukivenxe,Wiira kaaliverye itthu sootakhala akiirenle aya.
11 Kinoosuwela wiira kinnivara itthu sinoosivelani,
Okathi awanani aka ahinrowa aya okixintta.
12 Nyuwo munnikikhapelela mwaha wa ororomeleya waka;Nave munrowa okipweha ohoolo wanyu mahiku ootheene.
13 Ottottopeliwe Yehova, Muluku a Isarayeli,Mahiku ootheene.
Amen! Amen!
