Masaalimu 45:1-17
Para tiretoore a isipo. Nsipo ninlavula sa Ifilori. Nsipo na osuulu wa Kora. Maskiili.* Nsipo na ophenta.
45 Kootteeliwa murima vanceene mwaha wa etthu yooreera.
Koohimya wiira: “Nsipo naka* kinrowa omwiipela mwene mmosa”.
Nlumi naka nri ntoko mureka* wa mulipa-oolepa ooratta.
2 Nyuwo mwene, mootepa oreera waavikana atthu ootheene.
Mwaano mwanyu, annikhuma moolumo ooreera.
Tivonto Muluku ooreelinhaaweni voohimala.
3 Nyuwo mutthu oowerya, mutthukwelele espaata* anyu muyuununi,Mookhalana nttittimiho ni ovuwa.
4 Mooniherye ovuwa wanyu, ni mwaaxintte;Mweettihe ekhavalo anyu ni nwane ekhotto, nwiirelaka atthu oowiiyeviha, mwiirelaka ekeekhai ni exariya,Nave ntata nanyu noolopwana, nnoovara* itthu sootikiniha.
5 Mareetthe anyu toothokolowa, anniwiiriha atthu omora ohoolo wanyu;Awo annithorola mirima sa awanani a mwene.
6 Muluku tori ehice anyu mahiku ootheene.Nyuwo mookhalana ekopo ya mwene anyu, ni munrowa olamulelaka mwa xariya.
7 Ehoosivelani exariya, ni moonyokha itthu sootakhala.
Tivonto, Muluku ohoothanlani, owiitthelakani makhura, ni ootepa wootteelihani murima, waavikana mamwene makina.
8 Ikuwo sanyu sootheene, sinninkhela eperfuume ya miira, alowe* ni kaasiya;Empa anyu yuulupale, yeeyo ereerihiwe ni maino a etthepo,
Onniiwanyeya oruma wa ikaruma sa isipo, seiyo sinootteelihani murima.
9 Anamwane axithiyana a mwene, ari ekurupu ya aximwali oottittimiheya anookhaliheryani.
Pwiyamwene, ori moono anyu woolopwana, ophwanelihiwe ene ni eweero ya wOfiri.
10 Nyuwo mwanaka, mwiiwe ni nwiriyane oratteene moolumo aka;Mwaaliyale atthu anyu ni amusi a apapinyu.
11 Nto mwene onoosiveliwa mwaha wa oreera wanyu,Okhala wiira owo pwiya anyu.Tivonto, muurame ohoolo wawe.
12 Mwaana mwaamuthiyana a oTiiro, onooruuha etthu wiira oovaheeni;Alopwana oothaaciri vanceene, anoophavela oreereliwa murima ni nyuwo.*
13 Muhina mwa empa ya mwene, mwaana mwaamuthiyana a mwene oosareya ovuwa;Soowara sawe ti sa eweero yooreerihiwa.
14 Owo onniroihiwa wa mwene, owanre ene ikuwo sooreera sa musurukhu munceene.*
Imwali sinimuhoola, sinniroihiwa mpaani, ohoolo wawe.*
15 Iyo sinniroihiwa vootteeliwa murima ni otthapa;Sinnikela vatthokoni va mwene.
16 Aniinyu axilopwana, animwaaranttela amuhavinre aya.
Nyuwo munrowa waakhaliha makhulupale a mulaponi mootheene.
17 Kinoosuweliha nsina nanyu maloko ootheene anrowa okhumelela ohoolo.
Tivonto atthu anrowa aya woovuwihakani mahiku ootheene.
Inoota
^ Nwehe Moolumo Ootthokiheriwa.
^ Eheeperi, “Miteko saka ti”.
^ Aahiiso, “ekaneta”.
^ Aahiiso, “mmutthukwelele xoowa”.
^ Eheeperi, “nnoowiixuttiha”.
^ Aahiiso, “eloyi”.
^ Aahiiso, “weepeserya owiitho wanyu”.
^ Aahiiso, woonasa wene: “ikuwo sooxoriwa”.
^ Eheeperi, “wanyu”.
