Masaalimu 65:1-13
Para tiretoore a isipo. Nsipo na Davidi.
65 Muluku, nyuwo munoottottopeliwa oSiyoni;Hiyo nnimwaataphula anatiri noomanenlyaahuni.
2 Nyuwo munniiwa mavekelo;
Atthu a makhalelo ootheene animoorwa wa nyuwo.
3 Itampi saka sinnithipelela okitthara,Masi nyuwo munnilevelela.
4 Oohakalala ti yoole mmuthanlale anyu, munampixa vari anyu,Wiira okhaleke vate vanyu.
Hiyo nnoovona mwaha wa itthu sooreera nnaakhela ahu owannyu,Empa anyu yoowaarya.
5 Munoonaakhula mwa xariya, ni itthu soowoopiha,Nyuwo Muluku onnoopola;Atthu a mulaponi mootheene, anoororomelani nyuwo,Vamosa ni ale anikhala iphareya sa ottaiwene.
6 Murumeelaka owerya wanyu, moopweha miyaako opuro aya;Nyuwo* mookhalana owerya wuulupale.
7 Munnimaaliha mawimpi ootupa a mphareya,Nave munnimaaliha maloko aninyakulihana.
8 Atthu anikhala ottaiwene, anootikinihiwa yaawehaka miteko sanyu;Munoowiiriha ale a mpantta onikhuma nsuwa, mpakha a mpantta onikela nsuwa, okhuwela atteeliwe ene murima.
9 Munnikhapelela elapo,Mwiirihaka oruwerya mihokorokho sinceene ni othaaciri.
Moosariha miro ni maasi;Ela ti enamuna mulokihenrye anyu etthaya,Wiira mwaavaheke atthu eyoolya.
10 Munninaaniha imatta, ni munnilokiherya etthaya enilimmwa;Munnoolowiha etthaya ni epula yinceene, munnireeliha itthu sinaaliwa.
11 Khula mwaakha, nyuwo munnikumiherya mareeliho manceene;Khula ephiro munivira anyu, ennisareya itthu sinceene sooreera.
12 Moothakoni aakhala malaxi manceene makithi,Nave miyaako soohakalala vanceene.
13 Mapuro a malaxi awo, aasareya inama,Nave mapuro oowaataleya, aasareya ipyo.
Elapo yootheene ennikhuwela etteeliwe ene murima, ni enniipa.
Inoota
^ Eheeperi, “Owo”.
