Masaalimu 68:1-35
Para tiretoore a isipo. Nsipo na Davidi.
68 Muluku ovenye, awanani awe amwara-mwariwe,Nave ale animunyokha, atthyawe ohoolo wawe.
2 Nwoomole, ntoko epheyo enoomola aya mwiixi;Siisaale ntoko eseera enitothowa aya vamooroni,Atakhali amala-malihiwe ohoolo wa Muluku.
3 Masi anaxariya atteeliweke murima;Awo yaaryeke ohoolo wa Muluku;Atthapeke, atteeliwe ene murima.
4 Mmwiipeleke Muluku; mwiipeke muttottopelaka nsina nawe.
Mmwiipele ole onivira mapuro oowaataleya a moothakoni.*
Yah* ti nsina nawe! Mutteeliweke murima ohoolo wawe.
5 Muluku tori paapa a anamwane ahirina paapa aya, ni onniwaakiherya* anaamukhweli,Ori ene nipuro noowaarya onikhala awe.
6 Muluku onnaavaha atthu oovela-vela, opuro wookhala;Owo onnaataphula aperesu ni onniwiiriha itthu oweettela saana.
Masi atthu oowiisoona,* ahaana okhala elapo yoowuuma.
7 Muluku, okathi mwaaweettiha anyu,*Okathi mweetta anyu moothakoni, (Selahi)
8 Elapo yaahittikinyeya;Nave wiirimu yaahirupa epula mwaha wa Muluku;Mwaako Sinayi waahittettemela mwaha wa Muluku, Muluku a Isarayeli.
9 Nyuwo Muluku, moorupiha epula yinceene;Hata okathi atthu anyu yaakhulumunwe aya, nyuwo mwaahaalipiha.
10 Awo yaakhala mmuttettheni mwanyu;Mwaha wa oreera wanyu murima, nyuwo Muluku mwaahaavaha itthu saathowa.
11 Yehova onniruma etthu ela;Athiyana anilaleya ihapari sooreera ti muttitthi muulupale.
12 Mamwene ni anakhotto aya annitthyawa, annitthyawa tthiri!
Muthiyana onihala owaani, onnaakhela itthu saakhiwe okhottoni.
13 Hata nyuwosa mwammaathale waattamela mooro ori omuttettheni,*Anookhala mapupha a epompa, asirikeliwe ni eparatha,Arina mapururu a eweero yooreerexa.*
14 Okathi Muluku Oowerya Sootheene aamwara-mwanrye awe mamwene a elapo ela,Eneevi yaahimora oSalimoni.*
15 Mwaako wa oBaxani, ti mwaako wa Muluku;*Mwaako wa oBaxani, wookhalana mapuro manceene oorakamela osulu.
16 Xeeni nyuwo miyaako soorakamexa, muniweha anyu ni nrima,Mwaako Muluku othanlale awe* wiira okhaleke?
Yehova onrowa okhalaka vaavo mahiku ootheene.
17 Ikaaro sa ekhotto sa Muluku siri ikonto ikonto sene.
Yehova oorowa nipuro noowaarya, okhumaka omwaako Sinayi.
18 Nyuwo moowela nipuro noorakama;Muhaakuxa alipa-ootthukweliwa;Muhaakuxa alopwana awo wiira akhale soovaha,Nyuwo Yah,* Muluku ahu, muhaakuxa hata alopwana oowiisoona, wiira mukhaleke eriyari aya.
19 Ottottopeliwe Yehova, yoowo khula nihiku oniteexa muritti ahu,Muluku eekeekhai, yoowo ori moopoli ahu. (Selahi)
20 Muluku eekeekhai, Muluku onnoopola;Yehova, Pwiya Muulupalexa, onniwoopola atthu mookhwaani.
21 Mweekeekhai, Muluku onoopwexakasa miru sa awanani awe,Onoonyaanya ekarakasa ya muru ya atthu yaale nlelo anittheka.
22 Yehova oohimya wiira: “Kinimwaattikiha oBaxani;Kinimwaakumiha mapuro oowiixa a mphareya,
23 Wiira muxuweye inawu sanyu mphomeni mwa awanani,Nave alapwa anyu, alate ephome ya awanani awo”.
24 Muluku, awo anniweha weetta wanyu onooniherya oxintta,Weetta wa Muluku aka, Mwene aka, okelaka nipuro noowaarya.
25 Alipa-oowiipa ari ohoolo, alipa-oowoopa ikaruma sa isipo sirina mikhoyi, annaatthara ottuli;Eriyari aya, sookhala imwali sinoopa malapa macikhaani.*
26 Mmuttottopele Muluku, eriyari ya muloko wa atthu anceene;Mmuttottopele Yehova, nyuwo munikhuma wa Tiithi a Isarayeli.
27 Nihimo naamukhaani na Beniyamini, ninnaaxintta atthu,Nave aakhala makhulupale a oYuda ni muttitthi aya onikhuwela,Ni makhulupale a nihimo na Zabuloni, ni makhulupale a nihimo na Nefetali.
28 Muluku anyu, oolakela woovahani ikuru.
Muluku, mooniherye ikuru sanyu, ntoko munniirela anyu.
29 Mwaha wa empa anyu oYerusalemu,Mamwene anooruuha etthu wiira yoovaheeni.
30 Mukasoope inama soowoopiha sinikhala munammeseni,*Nikoto na ipooyi ni axaana aya,Mpakha atthu wuurama, aruuhaka* eparatha.
Mwaamwarye atthu enaasivela ekhotto.
31 Sinooruuhiwa itthu sa eporonse* sikumihiwaka wExiitu;Atthu a oKuuxi, animoorwa yaakuveyaka wiira anvahe etthu Muluku.
32 Nyuwo mamwene a mulaponi, mmwiipeleke isipo Muluku,Mmwiipeleke isipo Yehova mmuttottopelaka, (Selahi)
33 Mmwiipeleke ole oneetteetta vasulu va erimu, yeeyo enikhala okhuma khalai.
Mwiiwe! Owo onnikukutteya ni nsu nawe nuulupale.
34 Musuwele owerya wa Muluku.
Olamulelo awe ori ni Isarayeli,Nave Muluku onnooniherya owerya wawe ori ene wiirimu.*
35 Atthu ahaana omoova ni omuttittimiha Muluku, yoowo ori nipuro nawe noowaarya.
Owo ti Muluku a Isarayeli,Yoowo onaavaha atthu ikuru ni owerya.
Ottottopeliwe Muluku.
Inoota
^ Aahiiso, woonasa wene: “mmeekuni”.
^ “Yah” ti enamuna yookhuveya ya nsina na Yehova.
^ Eheeperi, “mulipa-oophuka milattu”.
^ Aahiiso, “oovirikanya”.
^ Eheeperi, “mwaakhumme anyu ohoolo wa”.
^ Aahiiso, woonasa wene: “eriyari ya masisi a ipwittipwitthi”.
^ Aahiiso, “eweero ya ncano ni yooripelela”.
^ Aahiiso, “vaakhala ntoko wiira yaahimora eneeve oSalimoni”.
^ Aahiiso, “mwaako muulupale”.
^ Aahiiso, “oniphavela awe”.
^ “Yah” ti enamuna yookhuveya ya nsina na Yehova.
^ Aahiiso, “siniwoopa acuucu”.
^ Aahiiso, “muttiilini”.
^ Aahiiso, woonasa wene: “yaanyakele”.
^ Aahiiso, woonasa wene: “animoorwa anamitthaka”.
^ Eheeperi, “mmeekuni”.
