Masaalimu 96:1-13
96 Mmwiipele Yehova nsipo na niinaano.
Mmwiipele Yehova, ootheene nyuwo munikhala mulaponi!
2 Mmwiipele Yehova; muttottopeleke nsina nawe.
Mulaleye ihapari sooreera sa moota oniwoopola awe atthu, nihiku ti nihiku.
3 Eriyari ya maloko, mulaleyeke ovuwa wawe,Nave eriyari ya atthu ootheene, mulaleye miteko sawe sootikiniha.
4 Yehova ti muulupale ni toniphwanela ottottopeliwa vanceene.
Owo onniphwanela wooviwa vanceene, waavikana amuluku ootheene.
5 Amuluku ootheene a atthu, kharina efaita,Masi Yehova topanke erimu.
6 Ohoolo wawe, wookhala ovuwa ni waarya;Owerya ni oreera ori opuro onikhala awe.
7 Mahimo, anvahe Yehova ele eniphwanela awe,Anvahe Yehova ele eniphwanela awe, mwaha wa ovuwa wawe ni owerya wawe.
8 Anvahe Yehova ovuwa oniphwanela nsina nawe;Amuruuhele yoovaha emosa vate vawe.
9 Akokhore ohoolo wa Yehova, awanre ene ikuwo sooreerexa;*Nyuwo atthu ootheene a mulaponi, muttettemeleke ohoolo wawe.
10 Eriyari ya maloko, mulaleye wiira: “Yehova tori Mwene!
Elapo yoolipihiwa, kheniweryaneya ottikinyiwa.
Owo onimwaaphukela atthu* ottharaka exariya”.
11 Erimu etteeliweke murima, nave elapo ehakalaleke;Ephareya ni itthu sootheene siri memmo, sikukutteyeke;
12 Imatta ni itthu sootheene siri memmo, sitteeliweke murima.
Nave okathi omosa-ru, miri sootheene sa mutakhwani sikhuweleke ni otteeliwa murima ohoolo wa Muluku,
13 Okhala wiira Yehova onnoorwa,*Onnoorwa ophukela elapo.
Owo onimwaaphukela atthu anikhala mulaponi ottharaka exariya,Nave onimwaaphukela atthu voororomeleya.
Inoota
^ Aahiiso, woonasa wene: “mwaha wa waarya wawe woovuwa”.
^ Aahiiso, “Owo onoowaakiha atthu mwaha wa”.
^ Aahiiso, “ohoorwa”.
