Matheyo 23:1-39
23 Okathi ole, Yesu aahilavula ni mittitthi sa atthu, vamosa ni awiixutti awe, oriki:
2 “Alipa-oowiixuttiha Nlamulo ni afarisi, anikupali wira aniixuttiha ele Moise aixuttiha awe.
3 Tivonto, itthu sotheene anooleelaayani, nvareke, masi muhivareke itthu anivara aya, maana khanivara ele aniixuttiha aya.
4 Awo annitthukwa miritti soolemela, anaakapattiha atthu akina. Masi awo aneene khaniphavela okwannya, hata ni ekatha aya.
5 Awo annipaka itthu sotheene aphavelaka wooniwa ni atthu paahi. Nto, wira yiixaakihe itthu sootakhala, annincererya ikaaxa saamukhaani* aniwara aya, nave annirakamiha malaya aya.
6 Awo waasivela okilaathi mapuro oosuwanyeya ofestani, nave waasivela okilaathi mapuro oohoolo,* musinagoga.*
7 Nave-tho, waasivela okhomasiwa ni nttittimiho mapuro oowaatta atthu,* ni wiitthaniwaka Rabi.*
8 Masi nyuwo muhiireliweke Rabi,* okhala wira Mwiixuttihi anyu ori mmosa. Nto, nyuwo otheene mwa axinna.
9 Ohikhale munimwiirela anyu paapa vathi-va, okhala wira Tiithi inyu ori mmosa, yoowo ori wiirimu.
10 Hata muhiireliweke ahooleli, okhala wira Muhooleli anyu ori mmosa, Kristu.
11 Masi, ole ori muulupalexa eriyari anyu, ohaana okhala murumeyi anyu.
12 Ole oniixinnuwiha, onooyevihiwa, nave ole oniiyeviha, onimwinnuwihiwa.
13 “Mootakhaliwa nyuwo alipa-oowiixuttiha Nlamulo ni afarisi, anawoothe! Nyuwo munnaawalela atthu mukhora wa Omwene wa wiirimu; tthiri nyuwo aneene khamunkela-mo, nave munnaakhoottiherya ale aniphavela okela.
14 *——
15 “Mootakhaliwa nyuwo alipa-oowiixuttiha Nlamulo ni afarisi, anawoothe! Nyuwo munneetteetta mphareya ni valaponi mumphavelaka mutthu oomukeliha etiini ya ayuda. Vano mwamphwanya vale, munnimwiiriha mutthu owo orowa oGehena* ni okhalana nthowa ninceene, woovikanani nyuwo.
16 “Mootakhaliwa nyuwo, muniweettiha akhwiinyu muhoonaka, muhimyaka wira: ‘Akhala mutthu onilapha oromolaka etemplo, khahiyo etthu. Masi akhala mutthu onilapha oromolaka eweero ya mutemplo, mutthu owo ohaana opaka ele olamphe awe’.
17 Nyuwo alolo ni alipa-oohoona! Yuulupale tiivi? Niireke eweero aahiiso etemplo, yeeyo eniiriha eweero eyo okhala yooreera vamaithoni va Muluku?
18 Nave, nyuwo munihimya wira: ‘Akhala mutthu onilapha omuromolaka altaari, khahiyo etthu. Masi akhala mutthu onilapha oromolaka yoovaha eri valtaari, mutthu owo ohaana opaka ele olamphe awe’.
19 Nyuwo alipa-oohoona! Yuulupale tiivi? Niireke yoovaha aahiiso altaari, yoowo oniiriha yoovaha eyo okhala yooreera vamaithoni va Muluku?
20 Tivonto, ole onilapha aaromolaka altaari, onaalaphela altaari awo ni itthu sotheene siri vaavo.
21 Ole onilapha oromolaka etemplo, khahiyo onilaphela etemplo paahi, masi-tho onimulaphela Muluku yoowo onikhala mutemplo-mmo.
22 Nave, ole onilapha oromolaka erimu, onilaphela ehice ya Muluku ni onimulaphela Muluku, yoowo okilanthi veehiceni vaavo.
23 “Mootakhaliwa nyuwo alipa-oowiixuttiha Nlamulo ni afarisi, anawoothe! Nyuwo munnivaha epantta ya namuloko ya ortelaani* ni entro, vamosa ni ekomiinyu.* Masi munnithanya myaha suulupale sa Nlamulo, ntoko exariya, omoriwa ikharari ni ororomeleya. Iya ti itthu munireerela anyu weettela, masi muhihiyaka sikina.
24 Nyuwo ahooleli oohoona. Nyuwo munnimukikittha pwilimwithi, masi munnimirya ekamelo!
25 “Mootakhaliwa nyuwo alipa-oowiixuttiha Nlamulo ni afarisi, anawoothe! Nyuwo munnirapiha ekoopho ni eparatho ota-ru, masi muhina mwaya moosareya ohiphiyeriwa ni ophavela wiihakalaliha paahi.
26 Nyuwo nfarisi oohoona, mpaceryeke orapiha ekoopho ni eparatho muhina mwaya, wira nave ota waya sikhale sooreera.
27 “Mootakhaliwa nyuwo alipa-oowiixuttiha Nlamulo ni afarisi, anawoothe! Nyuwo munlikana ni mahiye ootteelihiwa, yaawo ota waya anooneya oreera, masi muhina mwaya asareyale ene makhuva a atthu ookhwa ni itthu sotheene soonanara.
28 Siiso-tho, vamaithoni va atthu, nyuwo munikhala ntoko anaxariya, masi vamurimani vanyu moosareya wootha ni itthu sootakhala.
29 “Mootakhaliwa nyuwo alipa-oowiixuttiha Nlamulo ni afarisi, anawoothe! Nyuwo munniteka mahiye a maprofeta ni munnireeriha mahiye a anaxariya.
30 Nave munnihimya wira: ‘Naakhanle okathi wa amuhavinre ahu, khinaarowa waakhaliherya owiiva maprofeta’.
31 Siiso, nyuwo munniihimya mmansinyu okhala anaaya atthu ale yaawiivale maprofeta.
32 Tivo, mmaliherye miteko amuhavinre anyu apacenrye aya.
33 “Nyuwo inowa, nloko na ivili, munrowa owerya sai otthyawa ophukeliwa ni oriheliwa oGehena?*
34 Tivo, kinimooruuhelani maprofeta, alipa a miruku ni alipa-oowiixuttiha. Akina munoowiiva, akina munimwaakhomela vamwirini, akina-tho munimwaawaxula musinagoga* mwanyu, nave akina munimwaalupattha khula epooma.
35 Siiso, enimoomorelani ephome yotheene ya atthu a xariya yiiviwe mulaponi, okhuma Abeli mpakha ephome ya Zakariya, mwaana a Barakhiya, yoole omwiivale anyu eriyari ya empa ya Muluku ni altaari.
36 Kinooleelani ekeekhai wira, itthu iya sotheene sinimwaakhumelela atthu a mahiku ala.
37 “Yerusalemu! Nyuwo Yerusalemu! Nawiive a maprofeta ni munaavonyakasa maluku atthu muruuheliwe anyu ni Muluku! Koophavela ikwaha sinceene waathukumanya aniinyu, siisaale mwalyakhu onaathukumanya awe axaana awe mmapuphani mwawe! Masi nyuwo khuhiphavela.
38 Tivo, Muluku onoohiya empa* anyu.*
39 Veekeekhai, kinooleelani wira, okhuma okathi yoola khamunikoona-tho, mpakha nihiku ninrowa anyu ohimya wira: ‘Ooreelihiwa tuule onirwa mwa nsina na Yehova!’”
Inoota
^ Ikaaxa iyo saamukhaani, saanikhalana ipantta sa Soolempwa Soowaarya, nave yaawara vayuuci ni yaaniwara moono aya woothiyana.
^ Aahiiso, “ooreerexa”.
^ Nwehe Moolumo Ootthokiheriwa.
^ Aahiiso, “omerkaatu”.
^ Aahiiso, “Mwiixuttihi”.
^ Aahiiso, “Mwiixuttihi”.
^ Eversiikulu ela enniphwanyaneya aBiibiliya akina, masi kheniphwanyaneya soolempwa ni matata sinceene sootthuneya sa ekereku.
^ Nwehe Moolumo Ootthokiheriwa.
^ Ortelaani, ti etempeero enirumeeliwa wira esivihiwe yoolya.
^ Ortelaani, entro ni ekomiinyu, ti itempeero sinirumeeliwa wira esivihiwe yoolya.
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Eyo piiyo, etemplo.
^ Aahiiso, woonasa wene: “enookhala milepe”.
