Matheyo 25:1-46
25 “Omwene wa wiirimu pooti olikanyihiwaka ni imwali* 10, seiyo saakunxe ixamaniiya saya, khurowa okumana ni mutheli.
2 Imwali thanu khisaarina ankhili, masi thanu saahikhalana ankhili.*
3 Iye sahaarina ankhili, saahikuxa ixamaniiya saya, masi khisaakunxe makhura* makina.
4 Nto iye saarina ankhili, saahikuxa ixamaniiya saya, ni saahikuxa-tho makhura makina.
5 Okathi mutheli aapisa awe orwa, imwali iye sotheene, saahiphwanya ikhove, sirupa.
6 Ohiyu eriyari, vaahikhuweliwa wira: ‘Mutheli oophiya! Murowe mwakumane nuuwo’.
7 Nto imwali iye sotheene saahivenya, silokiherya ixamaniiya* saya.
8 Vano imwali sahaarina ankhili, saahiwiirela ale yaarina ankhili: ‘Munivahe makhura anyu vakhaani, okhala wira ixamaniiya sahu sihanle ottipha’.
9 Nto imwali saarina ankhili, saahaakhula siiraka: ‘Noovahani vale, woonasa wene khanrowa oniphiyerya otheene ahu. Murowe opuro onitumihiwa aya, mwathumeke awinyu’.
10 Okathi yaaronwe aya othuma makhura, mutheli aahiphiya. Imwali iye saari soolikana ene, saahikela nuuwo efesta ya ekasamento,* nto mukhora khuwaliwa.
11 Nuuvira okathi, imwali iye sahaarina ankhili, saahitthika sinahimya wira: ‘Mutheli, mutheli, munihulele!’
12 Owo aahiwaakhula iiraka: ‘Kinooleelani ekeekhai wira, miyo nkinoosuwelani’.
13 “Tivonto, muthipeleleke owehaweha, okhala wira khamunsuwela nihiku, nnakhala ewoora.
14 “Nave-tho, Omwene wa Muluku onlikana ni mulopwana mmosa aaphavela weetta mukwaha woorakama. Ohinatthi okhuma, aahiwiihana arumeyi awe, aahiyerya mireerelo sawe.
15 Mmosa aahinvaha italento* thanu, mukina italento piili, nave mukina-tho aahinvaha etalento emosa. Aahinvaha khula mmosa ntoko saawerya awe, vano aahivenya onarowa.
16 Moohipisa, murumeyi ole aakhenle italento thanu, aahimweetta nakoso, ophwanya-tho italento sikina thanu.
17 Siiso-tho, ole aakhenle italento piili, aahiphwanya-tho italento piili.
18 Masi ole aakhenle etalento emosa, aahithipela musurukhu* wa pwiya awe.
19 “Nuuvira okathi munceene, pwiya aya arumeyi ale aahitthika, onapacerya opaka ikontha naawo.
20 Nto murumeyi aakhenle italento thanu, aahiruuha italento sikina thanu, onahimya wira: ‘Pwiya, mwaakihiyenrye italento thanu, vano, mooneke, koophwanya italento sikina thanu’.
21 Pwiya awe aahimuleela wira: ‘Muhiira saana, murumeyi ooloka ni oororomeleya! Nyuwo moororomeleya ni itthu vakhaani. Nto kinrowa woororomelani itthu sinceene. Mutteeliweke murima ni pwiya anyu’.
22 Nuumala-vo, murumeyi aakhenle italento piili, aahiruuha italento sikina piili, onahimya wira: ‘Pwiya, mwaakihiyenrye italento piili, vano, mooneke, koophwanya italento sikina piili’.
23 Pwiya awe aahimuleela wira: ‘Muhiira saana, murumeyi ooloka ni oororomeleya! Nyuwo moororomeleya ni itthu vakhaani. Nto kinrowa woororomelani itthu sinceene. Mutteeliweke murima ni pwiya anyu’.
24 “Wookiseryani, aahirwa murumeyi ole aakhenle etalento emosa, onahimya wira: ‘Pwiya, miyo kihoosuwelani okhala mutthu ooxankiha, maana munnihepha opuro ohaalale anyu, nave munnithukumanya ipyo muhithanlenle anyu.
25 Tivo, kaanoova, nto kithipela etalento anyu. Mukuxeke ela mwaakihiyenrye anyu’.
26 Pwiya awe aahimwaakhula iiraka: ‘Nyuwo mwa murumeyi ootakhala ni oolosowa! Kiira mwaanisuwela wira kinnihepha muhaalale aka, ni kinnithukumanya ipyo kihithanlenle aka?
27 Weeso mwaahaana oroiha musurukhu* aka opanko, wira kaatthikaka, kiphwanye wuncereriwe ene.
28 “Nto pwiya ole aahihimya wira: ‘Mmwaakhe etalento eyo erina awe, munvahe ole orina italento 10.
29 Tthiri ole orina, onimuncereriwa ni onookhalana soowaatta. Vano ole ohirina, hata ele erina awe, onimwaakhiwa.
30 Mmukuxe murumeyi owo ohirina efaita, mmurihele ota, weepiphini. Weiwo tonrowa awe wunla ni olumanyiha maino awe’.
31 “Okathi Mwaana a mutthu onirwa awe ni ovuwa wawe, vamosa ni malaikha awe, onrowa okilaathi veehiceni vawe yoowaarya.
32 Nave atthu a maloko otheene anoothukumanyiwa ohoolo wawe. Owo onimwaavalaanya atthu wira akhale ikrupu piili, siisaale makampusi onivalaanya awe ipwittipwitthi ni ipuri.
33 Vano, onookhaliha ipwittipwitthi moono awe woolopwana, masi ipuri moono awe woothiyana.
34 “Nto Mwene onimwaaleela ale ari moono awe woolopwana wira: ‘Murweeke, nyuwo mureelihiwe ni Tiithi aka. Mwaakhele Omwene mulokiheriwa anyu olumwenku ohinatthi opattuxiwa.*
35 Tthiri miyo kaahivoliwa etala, nyuwo mukivaha yoolya. Kaahivoliwa ntthona, nyuwo mukivaha maasi. Khimwaakisuwela, nave nkaarina opuro wookhala, masi mwaahikaakhela saana vate vanyu.
36 Kaahithaaleliwa,* nyuwo mukivaha ikuwo. Kaahiwereiwa, nyuwo mukikhapelela. Kaahitthukweliwa mukhatteya, nyuwo mukixukurya’.
37 Vano anaxariya anoomwaakhula, yiiraka: ‘Pwiya, noowehaleni silini, nvoliwe ene etala, hiyo noovahani yoolya, aahiiso nvoliwe ene ntthona, noovahani maasi?
38 Noowehaleni silini, muhirina opuro wookhala, niwaakhelani saana vate vahu, aahiiso, muthaaleliwe ene, nto hiyo noovahani ikuwo?
39 Noowehaleni silini, nwereiwaka aahiiso mutthukweliwe ene mukhatteya, nto hiyo nooxukuryani?’
40 Mwene onoowaakhula iiraka: ‘Kinooleelani ekeekhai wira, okhala wira moomwiirela mmosa a axinnaka ala acikhaani, mukiirenle miyo’.
41 “Nto Mwene onimwaaleela ale ari moono awe woothiyana, wira: ‘Mukhumase-va, nyuwo mulamuliwe, murowe omooroni ohinttipha, olokiheriwe awe Satana ni malaikha awe.
42 Miyo kaahivoliwa etala, nyuwo muhikivaha yoolya. Kaahivoliwa ntthona, nyuwo muhikivaha maasi.
43 Khimwaakisuwela, nave nkaarina opuro wookhala, masi khimwaakaakhenle saana vate vanyu. Kaahithaaleliwa, nyuwo muhikivaha ikuwo. Kaahiwereiwa ni kaahitthukweliwa mukhatteya, masi nyuwo muhikikhapelela’.
44 Nave-tho awo animwaakhula, yiiraka: ‘Pwiya, noowehaleni silini, nvoliwe ene etala wala ntthona, muhirina opuro wookhala, muthaaleliwe ene, nwereiwaka, aahiiso mutthukweliwe ene mukhatteya, hiyo nihookhaliheryani?’
45 Mwene onoowaakhula wira: ‘Kinooleelani ekeekhai wira, okhala wira khimmwiirenle mmosa a acikhaani ala, khamukiirenle miyo’.
46 Nto ala anrowa opwetexiwa voomalela,* masi anaxariya anrowa ophwanya okumi woohimala”.
Inoota
^ Nuulumo nla na ekereku, nimmuhimya muthiyana ohitonko orupa ni mulopwana.
^ Aahiiso, “miruku”.
^ Ixamaniiya saarumeeliwa khalai, saaheliwa makhura a olivera.
^ Aahiiso, “ikhanttiyero”.
^ Aahiiso, “niira na othela”.
^ Etalento ya ekereku, yaalemela ikiilo 20.4.
^ Ekereku, “eparatha”.
^ Ekereku, “eparatha”.
^ Nuulumo noowi olumwenku ohinatthi opattuxiwa, anihimmwa anamwane a Adamu ni Eva.
^ Aahiiso, “Nkaawanre voomalela”.
^ Ekereku, “wiikitthiwa; okwasiwa”.
