Matheyo 7:1-29
7 “Muhiye waaphukela akina, wira Muluku ohoophukeleni.
2 Okhala wira enamuna munaaphukela anyu akina, ni nyuwo munrowa ophukeliwa siiso; nave mphimo onrowa anyu waaphimela akina, munrowa ophimeliwa yoowo.
3 Nto, xeeni muniwehexexa anyu ekokhola eri mmaithoni mwa munninyu, masi muhinaweha mwiri* ori mmaithoni mwanyu?
4 Aahiiso, vaniweryaneya sai omwiirela munninyu wira: ‘Nkani kookumiheni ekokhola mmaithoni mwanyu’, variki nyuwo murina ene mwiri mmaithoni mwanyu?
5 Nawoothe! Mpacerye okumiha mwiri ori mmaithoni mwanyu, nuumala-vo munoowehaka saana, wira nwerye okumiha ekokhola eri mmaithoni mwa munninyu.
6 “Muhaavahe alapwa itthu sa Muluku, nnakhala muhirihele ikuluwe ipeerola,* wira sihinyakele, nuumala-vo soorukunuweleni ni soovulaliheni.
7 “Muthipeleleke oveka, munoovahiwa. Muthipeleleke ophavelasa, munoophwanya. Muthipeleleke omana mukhora, munoohuleliwa.
8 Otheene ale aniveka, anoovahiwa. Nave otheene ale aniphavelasa, anoophwanya, ni otheene ale animana mukhora, anoohuleliwa.
9 Nto, niireke ookhala a nyuwo, oninvaha mwanawe nluku, onvekenle ene ephaawu?
10 Aahiiso, niireke ononvaha enowa, onvekenle ene ehopa?
11 Tivonto, nnaamwi muri nyuwo ootakhala murima, munasuwela waavaha itthu sooreera aniinyu, nto niireke Tiithi inyu ori wiirimu khontepa waavaha itthu sooreera ale aninvekela?
12 “Tivonto, itthu sotheene muniphavela anyu wiireliwa ni atthu akina, ni nyuwo-tho nwiireleke seiyo. Tthiri, eyo ti etthu Nlamulo na Moise ni soowiixuttiha sa Maprofeta sinihimya aya.
13 “Nvireke mukhora woophunyeya, okhala wira mukhora muulupale ni estaraata yuulupale sinroiha wookhwaani,* nto atthu anceene anvira mukhora yoowo.
14 Masi, mukhora woophunyeya ni estaraata yaamukhaani, sinroiha weekumini. Nto, atthu vakhaani tanivira.
15 “Mwiipasoope ni maprofeta oowootha, yaawo anoorweelani yiisoneihaka ntoko ipwittipwitthi, masi muhina ari ene miici sootakhala.
16 Nyuwo munimwaasuwela mwaha wa soowiira saya. Khuuvo oniwerya wuurula* ewuuva mmiiwani, aahiiso efiiku munthakathakani.*
17 Vamosa-ru, mwiri wooloka onniima mihokorokho sooloka, masi mwiri woohiloka oniima mihokorokho soohiloka.
18 Mwiri wooloka khoniwerya wiima mihokorokho soohiloka, nave mwiri woohiloka khoniwerya wiima mihokorokho sooloka.
19 Mwiri ohiniima mihokorokho sooloka, onniikitthiwa, onapahiwa.
20 Tthiri, munimwaasuwela atthu awo mwaha wa soowiira saya.
21 “Wira mutthu okele Moomweneni wa wiirimu, khivamphiyerya okiirela, ‘Apwiya, Apwiya’! Ankela-mo taale aniira simphavela awe Tiithi aka ori wiirimu.
22 Nihiku nlo, atthu anceene anrowa okiirela: ‘Apwiya, Apwiya! Kiira noolaleya ntoko maprofeta mwa nsina nanyu? Kiira nihoomola malaikha ootakhala mwa nsina nanyu, nave noovara miteko sootikiniha ni nsina nanyu?’
23 Vano miyo kinoowaakhula wira: ‘Miyo nkinoosuwelani! Mukhumase-va, nyuwo muniira sootakhala!’
24 “Tivonto, otheene yaale aniiwa moolumo aka, aneettela, anrowa olikanaka ni mulopwana aarina ankhili, yoowo aatenke empa awe vamwala.
25 Yaahirupa epula yinceene, nto maasi yaahisareya ni yaahoopa epheyo yuulupale, khimana empa eyo. Masi empa eyo khiyaamonre, okhala wira yaalipihiwe vamwala.
26 Nave-tho, otheene yaale aniiwa moolumo aka, ahineettela, anrowa olikanaka ni mulopwana ahaarina ankhili, yoowo aatenke empa awe vamihaavani.
27 Yaahirupa epula yinceene, nto maasi yaahisareya ni yaahoopa epheyo yuulupale, khimana empa eyo. Nto empa eyo yaahimora. Vano, omora iwo waari woomalela”.
28 Nuumala Yesu olavula itthu iya, yiiraneyale tiila: mittitthi iye sa atthu saahitikinihiwa vanceene ni moota aixuttiha awe,
29 maana itthu aixuttiha awe saakhuma wa Muluku, ohiya ntoko alipa-oowiixuttiha Nlamulo.
Inoota
^ Mwiri onirumeeliwa wira evathiwe empa.
^ Nluku na efaita yuulupale.
^ Ekereku, “opwetexiwa”.
^ Aahiiso, “orukula”.
^ Aahiiso, “mmalaxini”.
