Matheyo 9:1-38
-
Yesu onnimpenuxa mulopwana oorakala (1-8)
-
Yesu onnimulattula Matheyo (9-13)
-
Nikoho voohimya sa otthukwa (14-17)
-
Mwaana mwaamuthiyana a Jairo; muthiyana onnivara vathi va malaya a ota a Yesu (18-26)
-
Yesu onnimpenuxa mulopwana ahoona ni ahaalavula (27-34)
-
Soolya khasireere mmatta, masi anamuteko ari vakhaani (35-38)
9 Nto, Yesu aahikela mukalawani, aahilapuwa ephareya, khurowa epooma awe.
2 Weiwo, aahiruuheliwa mulopwana oorakala, aataleliwe ene vanrepani.* Voonale awe waamini waya, Yesu aahimuhimeerya mulopwana ole oorakala wira: “Mwanaka, mulipihe murima! Itampi sanyu sooleveleliwa”.
3 Vano, alipa-oowiixuttiha Nlamulo akina yaanihimya vamurimani vaya, wira: “Mulopwana ola onninveeha Muluku”.
4 Osuwelaka itthu yuupuwela aya, Yesu aahaakoha oriki: “Xeeni munuupuwela anyu itthu sootakhala vamurimani vanyu?
5 Mwa ntakiheryo, yookhweya tiivi? Niireke ohimya wira: ‘Itampi sanyu sooleveleliwa’, aahiiso ohimya wira: ‘Mweemele, mweetteke’?
6 Masi wira musuwele wira Mwaana a mutthu ookhalana owerya woolevelela itampi valaponi . . . ”. Yesu aahimuhimeerya mulopwana ole oorakala, wira: “Mweemele, mukuxe nrepa nanyu,* muroweke owaani”.
7 Vano, aaheemela, onarowa owaani.
8 Mittitthi sa atthu voonale aya etthu ele, saahoova vanceene, khunvuwiha Muluku, yoowo aavanhe atthu owerya iwo.
9 Avenyaka vale, Yesu aahimoona mulopwana mmosa, aitthaniwa Matheyo, okilanthi ene opuro waaliviwa mpoosito, khumwiirela: “Mukhale mwiixutti aka”. Nto Matheyo aahivenya, onamutthara Yesu.
10 Ohoolo waya, okathi Yesu aalya awe* vatthokoni va Matheyo, alipa-ooliviha mpoosito anceene ni anatampi, yaahirwa analya* vamosa ni Yesu ni awiixutti awe.
11 Masi, afarisi voonale aya etthu ele, yaahaakoha awiixutti awe wira: “Xeeni mwiixuttihi anyu onilya awe ni alipa-ooliviha mpoosito ni anatampi?”
12 Nuumala Yesu owiiwa, aahiwaakhula oriki: “Atthu akumi khanirowa wa meetiku, masi aretta tanirowa.
13 Tivonto, mwiixutte ele enitaphulela aya moolumo ala: ‘Kiniphavela wira atthu yaamoreleke ikharari akhwaaya, ohiya okivaha mukuttho’. Tthiri miyo nkirwenle owiitthana anaxariya, masi anatampi”.
14 Vano, awiixutti awe Yohani yaahimwaattamela Yesu, anamukoha wira: “Xeeni hiyo ni afarisi nintthukwa ahu, masi awiixutti anyu ahinatthukwa?”
15 Yesu aahaakoha wira: “Niireke apatthani awe mutheli anniriipiwa murima, nlelo ari ene ni mutheli? Masi anoophiya mahiku aniira aya yaakhiwe mutheli, nto okathi yoowo tanrowa aya otthukwaka.
16 Khuuvo onikuxa ekuwo esya khuttotthela vakuwoni ya khalai, maana ekuwo eyo esya enootthikelana mpakha okhera ekuwo ya khalai. Vano nipuro nlo naakhereyale, nnimuncerereya.
17 Nnakhala khuuvo mutthu onihela eviinyu ya niinaano mirupa sa khalai sa eviinyu.* Apaka eyo, mirupa iyo sinoophuleya, vano eviinyu enooyiiheya,* nave mirupa iyo sinoohononeya. Masi atthu anihela eviinyu ya niinaano mirupa isya. Siiso, itthu iyo soopiili khasinihononeya”.
18 Okathi Yesu aahimya awe itthu iya, mukhulupale mmosa aahimwaattamela, uurama ohoolo wawe, onahimya wira: “Okathi ola, kinoona wira mwanaka mwaamuthiyana ohookhwa. Nto nrowe mwamwiixaatherye ntata nanyu, owo onookhala mukumi”.
19 Yesu aahivenya ni awiixutti awe, onamutthara mukhulupale owo.
20 Okathi owo, muthiyana mmosa aavinre iyaakha 12 ephome awe eyiiheyaka, aahimwaattamela Yesu ottuli wawe, ovara vathi va nlaya nawe na ota.
21 Owo aanuupuwela vamurimani vawe oriki: “Miyo kavara-ru nlaya nawe na ota paahi, kinookhala saana”.
22 Yesu aahirukunuwa, amoona muthiyana owo, onamuhimeerya wira: “Mwanaka, mulipihe murima! Waamini wanyu ohookhalihani saana”. Okhuma ewoora ene yeele, muthiyana ole aahikhala saana.
23 Vano, okathi Yesu aaphiyale awe vatthokoni va mukhulupale owo, aahaaphwanya alipa-oowoopa iphivi,* ni muttitthi wa atthu onyakulaka.
24 Nto Yesu aahaaleela wira: “Mukhumase-va, maana mwaaruusi ola khokhwiiye, masi onoorupa”. Vano, atthu ale yaahipacerya omutheya voonyoholela.
25 Nuumala atthu ale okumiheriwa ota, Yesu aahikela mpaani, aahivara ntata na mwaaruusi, nto mwaaruusi ole aahivenya.
26 Tivonto, ehapari ele yaahuulaana muttetthe ole wotheene.
27 Yesu akhumaka muttetthe ole, alopwana anli oohoona yaanimutthara, akhuwelaka wira: “Mwaana a Davidi, munimorele ikharari”.
28 Nuumala Yesu okela mpaani, alopwana ale oohoona yaahimwaattamela. Nto Yesu aahaakoha wira: “Munnaamini wira kinniwerya woopenuxani?” Awo yaahimwaakhula ariki: “Aayo, Pwiya”.
29 Nuumala-vo, Yesu aahivara maitho aya, onahimya so: “Okhala wira muhaamini, maitho anyu anootthukuwa”.
30 Nto maitho aya yaahitthukuwa. Masi, Yesu aahaalopola oratteene, oriki: “Phoole, muhimuleele mutthu etthu ela”.
31 Akhumelaka-ru ota, awo yaahimulaleya Yesu muttetthe wotheene.
32 Okathi alopwana ale anli yaakhumale aya, Yesu aahiruuheliwa mulopwana mmosa ahaalavula, yoowo aavariwe ni nlaikha nootakhala.
33 Nuumala nlaikha nle nootakhala woomoliwa, mulopwana ole aahipacerya olavula. Nto mittitthi iye sa atthu saahitikinihiwa vanceene, sinahimya wira: “Khanitonko woona etthu siisa wIsarayeli”.
34 Masi, afarisi yaahimya wira: “Ola onoomola malaikha ootakhala okhaliheriwaka ni namalamulela a malaikha ootakhala”.
35 Yesu aaneetteetta mittetthe ni ilapo sotheene, iixuttihaka musinagoga* mwaya, aalaleeryaka atthu ihapari sooreera sa Omwene ni aapenuxaka atthu yaarina iretta sa khula enamuna.
36 Okathi aawehale awe mittitthi sa atthu, aahoonela othunku, okhala wira saari ntoko ipwittipwitthi soovulalihiwa ni soonyanyaliwa, sihirina makampusi aya.
37 Vano aahaaleela awiixutti awe wira: “Mweekeekhai, soolya khasireere mmatta, masi anamuteko ari vakhaani.
38 Tivonto, munvekele Mwaneene ematta wira aaruuhe anamuteko”.
Inoota
^ Aahiiso, “vakhaamani”.
^ Aahiiso, “ekhaama anyu”.
^ Aahiiso, “aari awe vameesa”.
^ Aahiiso, “anakhala vameesa”.
^ Murupa waapakiwa ni esapala ya enama.
^ Aahiiso, “enoomwareya”.
^ Aahiiso, “iflauta”.
^ Nwehe Moolumo Ootthokiheriwa.
