Miruku 1:1-33
1 Iya miruku sa Salomooni, mwaana a Davidi, mwene a wisarayeli:
2 Wiira mwaasuwele ankhili ni musuwele ottaruxiwa;Wiira mwiixutte moolumo a ankhili;
3 Wiira mwiixutte ottaruxiwa oniphwanyiha osuwela,Exariya, mweettelo wooloka ni ohimuthanla mutthu;
4 Wiira aavahe ankhili ale ahinsuwela itthu sinceene;Wiira aavahe amiravo osuwela ni orumeela saana muupuwelo aya.
5 Mutthu a ankhili onniwiriyana ni onniixutta itthu sinceene;Mulopwana orina osuwela onniphwanya malakiheryo a ankhili,
6 Wiira osuwele saana miruku ni malikanyiho,Moolumo a atthu a ankhili ni ithale saya.
7 Omuttittimiha vanceene* Yehova, tori maphattuwelo a osuwela.
Alolo paahi tanaathanya ankhili ni tanithanya ottaruxiwa.
8 Mwanaka, nwiriyaneke ottaruxa wa paapa anyu;Nave muhihiye malakiheryo a* maama anyu.
9 Awo anlikana ni ekhara yooreera ya ifilori para muru anyu,Nave anlikana ni ekolaari yooreera enreeriha exiko anyu.
10 Mwanaka, anatampi yaphavela wootthekihani, muheemererye.
11 Awo yahimya wiira: “Munitthare.
Nrowe nawiipithele atthu akina wiira niwiive.
Naipithe naalipelelaka atthu oohittheka wiira naathweeliheke.
12 Nrowe naamirye atthu awo ari ene akumi, ntoko mahiye aniira aya,Naamirye ntero nene,* ntoko ale anivithiwa.
13 Nrowe nawaakhe mihakhu saya sootheene sooreerexa,Nisarihe ipa sahu ni itthu ninrowa ahu owaakha.
14 Mukhale vamosa ni hiyo,Itthu sootheene ninrowa ahu wiiya nnookawana eriyari”.
15 Mwanaka, muhaatthare atthu awo.
Inawu sanyu sihaattamele ephiro aya,
16 Okhala wiira awo* annitthimakela opaka etthu yootakhala;Annitthimakela omwiiva mutthu.
17 Tthiri oreya ntapha* mwaapalame owehaka, khomphwanyiha etthu.
18 Tivo awo anniwiipithela atthu wiira awiive;Anniipitha wiira awiive atthu akina.
19 Ela ti etthu anipaka aya ale aniphwanya mihakhu ahiroromeleyaka.Mwaha wa yeeyo, atthu awo annookhwa.
20 Ankhili eekeekhai annikhuwela mphironi.
Nsu naya ninnirunya opuro woowaatta atthu.
21 Awo annikhuwela opuro onikumana aya iphiro sinimakela oviriwa.
Vamikhora va epooma, ankhili awo annihimya wiira:
22 “Nyuwo atthu muhinisuwela itthu sinceene, munrowa ophentaka ohisuwela itthu mpakha silini?
Nyuwo atthu ooveeha, onrowa woosivelakani oveeha mpakha silini?
Nyuwo alolo, munrowa onyokhaka osuwela mpakha silini?
23 Mweemererye ottaruxa waka.
Nto kinimoovahani ikuru saka wiira soophwanyiheni mureerelo;*Kinimoosuwelihani moolumo aka.
24 Miyo koowiihanani, masi nyuwo mookhootta wiiwa,Koowookolelani ntata, masi khuuvo ovanhe ephoole.
25 Nyuwo mookhootta miruku saka sootheene,Nave mookhootta ottaruxiwa ni miyo.
26 Tivo, miyo kinootheya okathi enrowa aya wookhumelelani ehasara.Kinootheya okathi enrowa aya owiiraneelani etthu yeeyo munoova anyu,
27 Okathi etthu munoova anyu enrowa aya wookhumelelani ntoko munamukhaya,Okathi enrowa aya wookhumelelani ehasara ntoko ettheku,Okathi munrowa anyu oxanka ni ohaawa.
28 Okathi owo, anrowa okiitthanaka, masi nkinrowa waakhula;Anrowa okaavyaka axankale ene vanceene, masi khanrowa okiphwanya,
29 Okhala wiira aanyokha osuwela,Nave khathanlale omuttittimiha vanceene* Yehova.
30 Awo aakhootta miruku saka.Khattittiminhe ottaruxa waka wootheene.
31 Siiso, awo anoohaawa mwaha wa mweettelo aya,Anoohaawa vanceene mwaha wa apalano aya.*
32 Atthu ahinsuwela itthu sinceene, animookhwa mwaha wa ohiiwelela waya.Alolo anoopwetexiwa mwaha wa ohicala waya.
33 Masi ole onikiwiriyana, onookhalaka oovareleleya.Nave onookhalaka ni murettele ohoovaka nnakhala ehasara emosa”.
Inoota
^ Eheeperi, “Omoova”.
^ Aahiiso, “nlamulo na”.
^ Aahiiso, “apurukuma”.
^ Eheeperi, “inawu saya”.
^ Aahiiso, “ntthavi; muraakho”.
^ Aahiiso, “koopwapwelani mutthikele ottuli”.
^ Eheeperi, “omoova”.
^ Aahiiso, “miruku saya”.
