Miruku 11:1-31
11 Epalansa yoowootha, ennimunanara vanceene Yehova,Masi epalansa yeekeekhai, ennimusivela.
2 Mutthu aapaceryaka wiikuxererya, onimuulihihiwa muru.Masi atthu oowiiyeviha, aakhalana ankhili.
3 Ororomeleya wa anaxariya, toniweettiha,Masi atthu oohiroromeleya anoopwetexiwa mwaha wa wootha waya.
4 Mihakhu khasinrowa wookhaliheryani nihiku Muluku onrowa awe onanariwa vanceene,Masi exariya tenrowa owoopolani wookhwaani.
5 Okumi wa mutthu ohirina mulattu, onlikana ni ephiro yoowookololowa mwaha wa itthu sooloka onipaka awe,Masi mutthu ootakhala enoomukhumelela ehasara mwaha wa otakhala wawe.
6 Naxariya onimoopowa mwaha wa itthu sooloka onipaka awe,Masi atthu oohiroromeleya anoovariwa mwaha wa otakhala waya.
7 Okathi onikhwa awe mutthu ootakhala, nlipelelo nawe ninnimala.Nave-tho, itthu sootheene aalipelela awe wiira anvara orumeelaka owerya wawe, sinnimala.
8 Naxariya onnoopoliwa mmaxakhani,Masi mutakhali onoophwanya maxakha.
9 Moolumo a namavirikanya annimpwetexa ole aattamanne awe,Masi naxariya onimoopoliwa mwaha wa osuwela wawe.
10 Oreera murima wa anaxariya onniwiiriha atthu a mpooma otteeliwa murima,Nave, okathi anikhwa aya atthu ootakhala, atthu annikhuwela atteeliwe ene murima.
11 Mareeliho a anaxariya anniiriha epooma ovuwihiwa,Masi moolumo a atakhali annipwetexa epooma eyo.
12 Ole ohinuupuwela saana* onnimuthanya mukhwaawe,Masi mulopwana orina ankhili eekeekhai onnimaala.
13 Nawoothe onnimwara-mwarya isiiri,Masi mutthu oororomeleya khonilaleya isiiri.*
14 Yaahikhale malakiheryo a mutthu a miruku, atthu annihaawa,Masi yaatta anvaha miruku, itthu sinneetta saana.
15 Ole onimukophela mutthu ohinimusuwela awe onookhalana mixankiho,Masi ole onikhootta wiiwanana etthu* ni mutthu owo, onookhalana murettele.
16 Muthiyana ooreera murima onnittittimihiwa,Masi alopwana ahinimoriwa ikharari annivarexexa mihakhu.
17 Mutthu ooreera murima onniipakela itthu sooreera,Masi mutthu ootakhala onniikumiherya itthu sootakhala.
18 Mutthu ootakhala onnaakhela etthu ehirina efaita,Masi mutthu onaala exariya onniphwanya etthu erina efaita.
19 Ole onithanla opaka itthu sooloka onookhala mukumi,Masi ole okathi wootheene onipaka itthu sootakhala onimookhwa.
20 Yehova onnimunanara vanceene atthu yaale arina murima wootakhala,Masi owo onnisiveliwa ni ale arina mweettelo wooloka.
21 Mukupali etthu ela: Atakhali anoohukhummwa,Masi anamwane a anaxariya animoopowa.
22 Ntoko siisaale ekharawa* ya eweero eheliwe mphulani mwa ekuluwe,Ti muthiyana ooreera onihiya wuupuwela saana.
23 Etthu eniphavela aya anaxariya ennikumiherya itthu sooreera,Masi etthu anilipelela aya atthu ootakhala ennikumiherya onanariwa vanceene.
24 Ole onivaha ni murima wootheene, onoovahiwa voowaatta.Masi ole onikhootta ovaha etthu oniwerya awe, onoohaawa.
25 Mutthu oovaha onoothaaciri,Nave ole onimulipiha mukhwaawe, nuuwo onoolipihiwa.
26 Atthu anoomutakhaliha ole onikhootta otumiha ipyo,Masi anoomureeliha ole onitumiha ipyo iyo.
27 Ole oniimananiha opaka itthu sooloka, onooreereliwa murima,Masi ole oniphavela itthu sootakhala, sinoomukhumelela itthu sootakhala.
28 Ole oniroromela mihakhu sawe onoophwanya maxakha,Masi anaxariya anoothaaciri ntoko miri sinikumiherya makukhu manceene ooriipelela.
29 Mutthu onikumiherya mixankiho etthoko awe, khonrowa ophwanya etthu,*Nave mutthu ohirina ankhili, onookhala murumeyi a mutthu orina ankhili.
30 Miteko sa anaxariya sinlikana ni mwiri wa ekumi,Nave ale anaakhaliherya atthu akina opaka itthu sooloka, aakhalana ankhili.
31 Tthiri, vakhala wiira naxariya onnaakhela etthu oniphwanela awe valaponi-va,Vaatepa-tho mutthu ootakhala ni natampi!
Inoota
^ Eheeperi, “ohirina murima”.
^ Eheeperi, “onnivitha mwaha”.
^ Eheeperi, “ovahana ntata”.
^ Aahiiso, “anela oniwariwa vaphulani”.
^ Eheeperi, “onimwaakhela epheyo”.
