Miruku 22:1-29
-
Nsina nooloka nookhalana efaita ovikana mihakhu sinceene (1)
-
Omwiixuttiha ori ene mwaana onoomukhaliherya okumi awe wootheene (6)
-
Mulipa-oonyoonyiwa onnimoova kharamu ori vate (13)
-
Ekopo yoottaruxa ennikhaliherya opaka itthu ni ankhili (15)
-
Mulopwana oorattela muteko awe onimweemela ohoolo wa mamwene (29)
22 Nsina nooloka* nookhalana efaita ovikana mihakhu sinceene,Ottittimihiwa ti vootepexa oreera ovikana eparatha ni eweero.
2 Thaaciri ni mulipa-oohaawa anoolikana:
Oowanli aya apattuxiwe ni Yehova.
3 Mutthu orina ankhili, onniweha etthu yoowoopiha oniipitha,Masi ole ohinsuwela itthu sinceene, onrowa weiwo sinamukhumelela mixankiho.
4 Wiiyeviha ni omuttittimiha vanceene* Yehova,Onnimwiiriha mutthu ophwanya mihakhu, ovuwa ni okumi.
5 Ephiro ya mutakhali sookhala miiwa ni miraakho,Masi ole onivaha efaita okumi khonaattamela itthu iyo.
6 Mmwiixuttiheke mwaana* ephiro onireerela awe otthara,Hata uuluvalaka khonrowa ohiya ephiro eyo.
7 Thaaciri onninwerya mulipa-oohaawa,Nave ole onikopha onnikhala epottha ya mutthu omukophenle awe.
8 Ole onaala itthu sootakhala onoohepha maxakha,Nave ekopo onirumeela awe wiira aahukhumu atthu ni owali, enimuntiwa.
9 Mutthu oovaha* onooreelihiwa,Okhala wiira onnikawana yoolya awe ni mutthu oohaawa.
10 Mmoomole mulipa-ooveeha,Nto onyakulihana onoomala,Nave owana-wana ni oruwana onoomala.
11 Ole orina murima wooloka ni onilavula moolumo ooreera,Onookhala mpatthani a mwene.
12 Maitho a Yehova annimukhapelela mutthu orina osuwela,*Masi Muluku onnihonona moolumo a atthu oohiroromeleya.
13 Mutthu oonyoonyiwa onnihimya wiira: “Ookhala kharamu vate!
Kinimwiiviwa eriyari ya ephiro!”
14 Eyano ya muthiyana onirupihana voohiloka,* nlitti noowiixa.
Ole onlamuliwa ni Yehova onoomorela memmo.
15 Okhala wene, anamwane aniphavela opaka itthu ahooniheryaka ankhili,Masi ekopo ya ottaruxa enimwaakhaliherya opaka itthu ni ankhili.
16 Ole onimwiiyerya mulipa-oohaawa wiira othaaciri,Vamosa ni ole oninvaha itthu mutthu oothaaciri,Anoohaawa.
17 Nvahe ephoole ni nwiriyane moolumo a ankhili,Wiira murima anyu weetteleke osuwela waka.
18 Tthiri ti vooreera osuka itthu iyo vamurimani vanyu,Wiira itthu iyo sootheene sihihiye okhala mwaano mwanyu.
19 Olelo kinnoovahani osuwela,Wiira mmuroromeleke Yehova.
20 Kiira kihoolepelani,Wiira koovaheeni miruku sinceene ni malakiheryo,
21 Wiira kiwiixuttiheni moolumo eekeekhai ni ororomeleya,Wiira mmuttikiherye ole oorummeni ihapari seekeekhai?
22 Muhimwiiyerye mulipa-oohaawa mwaha wookhala oohaawa,Nave muhimuhaaxe mulipa-oohaawa vamukhora wa epooma,
23 Okhala wiira Yehova mwaneene tonrowa owaakiherya mulattu aya,Nave onimwaapwetexa ale aniwiiyerya.
24 Muheetteke vamosa ni atthu oowaakuva onanariwa,Nnakhala muhikhaleke vamosa ni atthu oowaakuva onanariwa,
25 Mwiira siiso, khamunrowa wiixutta iphiro saya,Nnakhala khamunrowa wiikumiherya maxakha.
26 Muhikhaleke ntoko atthu yaale anivahana ntata yiiwananaka etthu,Ephavelaka waaroromeliha atthu akina anaakophela aya.
27 Mwaahikhalane etthu yoolivana,Munimwaakhiwa ekhaama anyu!
28 Muhikumihe mikano sa khalai,Seiyo saaheliwe ni amuhavinre anyu.
29 Mootoko omoona mulopwana oorattela muteko awe?
Owo onimweemela ohoolo wa mamwene,Ohiya ohoolo wa atthu pure.
Inoota
^ Aahiiso, “Mweettelo wooloka”. Eheeperi, “Nsina”.
^ Eheeperi, “omoova”.
^ Aahiiso, “mmiravo”.
^ Eheeperi, “Ole orina niitho nooloka”.
^ Eheeperi, “annikhapelela osuwela”.
^ Eheeperi, “voohiirya”. Nwehe Miruku 2:16.
