Miteko 15:1-41
15 Vano alopwana* akina yaahiphiya akhumaka oYudeya, anapacerya owiixuttiha anna, yiiraka: “Mwaahinnuwihiwe-ru ntoko ninruma aya nlamulo na Moise, khamunwerya woopowa”.
2 Paulo ni Baarnaba yaahivaanyihana ni awiixutti ale. Tivo, axitokweene yaahiiwanana omuruma Paulo ni Baarnaba vamosa ni anna akina, waaroihela mwaha ole* arummwa ni axitokweene, yaawo yaari oYerusalemu.
3 Siiso, anna a muloko yaahaahoola vakhaani. Paulo ni Baarnaba vamosa ni anna akina, yaahitthikela mukwaha aya arowaka oFeniisia ni oSamariya. Awo yaanaatthokiherya oratteene anna otheene, moota atthu yahaakhanle ayuda yaapacenrye aya omukokhorela Muluku. Nuumala wiiwa ihapari iyo, anna otheene yaahitteeliwa murima vanceene.
4 Nuuphiya oYerusalemu, awo yaahaakheliwa oratteene ni muloko, ni arummwa, ni axitokweene. Vano yaahihimya itthu sinceene Muluku aapanke awe aarumeelaka awo.
5 Masi, ale khalai yaatthara soowiixuttiha sa afarisi, yaawo vano yaari awiixutti, yaaheemela anahimya wira: “Atthu awo ahaana winnuwihiwa ni ahaana orummwa wiiwelela Nlamulo na Moise”.
6 Siiso, arummwa ni axitokweene yaahithukumana wira athokorerye mwaha owo.
7 Nuumala ovaanyihana vanceene, Pedru aaheemela, onahimya wira: “Anna, nyuwo moosuwela oratteene wira Muluku ookithanla eriyari anyu, wira kipacerye waalaleerya ihapari sooreera ale ahikhanle ayuda, wira yaamini.
8 Muluku, yoowo onisuwela mirima sa atthu, ohooniherya eyo aavahaka atthu awo munepa woowaarya, ntoko onivanhe awe hiyo.
9 Muluku khonikhalinhe oovirikana naawo, masi ooreeriha mirima saya, mwaha wa waamini waya.
10 Vano, xeeni munimwiiriha anyu Muluku onanariwa, mwaareyaka awiixutti muritti woolemela, yoowo amuhavinre ahu nnakhala hiyo nihiwenrye ahu okuxa?
11 Ohiya-vo, hiyo ayuda ninnaamini wira ninrowa woopowa mwaha wa oreera murima wuulupale wa Pwiya Yesu. Nave-tho, awo ahikhanle ayuda, annaamini etthu emosa-ru”.
12 Siiso, otheene aya yaahimaala, ananwiriyana Baarnaba ni Paulo ahimyaka miiriirya ni miteko sootikiniha, Muluku aapanke awe aarumeelaka awo, eriyari ya atthu ahikhanle ayuda.
13 Nto vaamanle aya olavula, Yakobo aahipacerya olavula oriki: “Anna, mukiwiriyane.
14 Simeyoni,* oonileela wira vano Muluku onniwaakhela atthu ahikhanle ayuda, wira nave aathanle eriyari ya ale ahikhanle ayuda, atthu anrowa wiihaneliwaka nsina nawe.
15 Moolumo ala annivarihana ni ele soolempwa sa Maprofeta sinihimya aya wira:
16 ‘Nuumala itthu iya, miyo kinootthika ni kinooteka-tho empa ya* Davidi, yeeyo emonre. Nave, kinoolokiherya mapuro aphweeyale ni kinimweemexa-tho,
17 wira ale anrowa ohala, amurumeeleke Yehova vamosa ni atthu a maloko otheene, yaawo anrowa wiihaneliwaka nsina naka. Ti miyo Yehova kinihimya, ti yoomi kinipaka itthu iya,
18 seiyo sinisuweliwa okhuma khalai’.
19 Tivonto, kinoona wira nihaaxankihe atthu ala anirwa omukokhorela Muluku.
20 Masi naalepele* wira, ahaana okhootta itthu sinivahiwa amuluku eethiru, orupihana woohiloka,* okhuura inama soohihitiwa,* nnakhala ephome.
21 Okhuma khalai, khula epooma, aakhala atthu anilaleya itthu siri iliivuru sa Moise, maana khula esaabadu sinnisommwa iliivuru iyo musinagoga”.*
22 Vano arummwa ni axitokweene, yaahithukumana vamosa ni muloko wotheene, yiiwanana waaruma alopwana yaathanlale aya eriyari aya, orowa wAntiyokiya vamosa ni Paulo ni Baarnaba. Nto yaahimuruma Yuda, yoowo-tho aihaniwa Barsaba ni Sila, yaawo yaahooleela anna.
23 Awo yaahaavahererya epaphelo yaahimya wira:
“Hiyo arummwa ni axitokweene, nri axinninyu, ninnoolepelani nyuwo anna ahikhanle ayuda a wAntiyokiya, oSiiria ni oSilisia: Mwaakhelele makhomaso ahu!
24 Hiyo nihiiwa wira aakhala akhumme eriyari ahu ni yooxankihaleni ni itthu ahimmye aya, yeereryaka ohonona ele munikupali anyu, nnaamwi nihaavanhe malakiheryo.
25 Tivo, nihiiwanana waathanla atthu wira naarume orwa weiwo vamosa ni Baarnaba ni Paulo.
26 Alopwana ala, aaleva okumi aya mwaha wa nsina na Pwiya Yesu Kristu.
27 Nave-tho, ninnimuruma Yuda ni Sila, wira yooleeleni itthu simosa-ru.
28 Tthiri, munepa woowaarya woonikhaliherya woona wira khivanireerela wooreyani muritti mukina, sihikhanle itthu iya soophwanelela:
29 wira mukhootteke itthu sinivahiwa amuluku eethiru, ephome, inama soohihitiwa,* ni orupihana woohiloka.* Mwasyaka oratteene itthu iya, okumi anyu onookhala saana. Mukhaleke ni murettele!”*
30 Nuumala olaxerya, awo yaahirowa wAntiyokiya, yaathukumanya awiixutti anceene, ni yaahaavahererya epaphelo.
31 Okathi yaamanle aya osoma epaphelo eyo, yaahitteeliwa murima mwaha wa moolumo oolipiha.
32 Vano Yuda ni Sila, yaawo yaari maprofeta, yaahaakhaliherya ni waalipiha anna ni moolumo manceene.
33 Nuumala awo oviriha okathi vakhaani, anna yaahaalaxerya. Siiso, arummwa ale yaahitthikela oYerusalemu.
34 *——
35 Masi Paulo ni Baarnaba yaahihala wAntiyokiya. Weiwo, yaahiixuttiha ni olaleya ihapari sooreera sa nuulumo na Yehova, akhaliheriwaka ni anna anceene.
36 Nuuvira mahiku vakhaani, Paulo aahimuleela Baarnaba wira: “Nrowe nitthikele waaxukurya anna a ipooma sotheene seiye nilaleiye ahu nuulumo na Yehova, wira naawehe moota ari aya”.
37 Baarnaba aaphavela omukuxa Yohani, yoowo-tho aihaniwa Marko.
38 Masi Paulo khaaphavela wira Marko orowe naawo, okhala wira Marko owo, aahaatthyawa oPanfiilia, khuhirowa ovara muteko woolaleerya naawo.
39 Nto Paulo ni Baarnaba, yaahinyakulihana vanceene, khivalaana. Baarnaba aahimukuxa Marko, khiwela ekalawa, anarowasa oKiipero.
40 Paulo aahimuthanla Sila, anarowa hoothe, nuumala anna onvekela Yehova wira omooniherye Paulo oreera wawe murima wuulupale.
41 Paulo aahivira oSiiria ni oSilisia olipihaka miloko.
Inoota
^ Aahiiso, “awiixutti”.
^ Aahiiso, “ovaanyihana iwo”.
^ Eyo piiyo, Pedru.
^ Aahiiso, “muxaxa”.
^ Aahiiso, “naalepele epaphelo”.
^ Ekereku, porneía. Nwehe Moolumo Ootthokiheriwa.
^ Aahiiso, “inama siniiviwa sihimwarexiwe ephome aya”.
^ Nwehe Moolumo Ootthokiheriwa.
^ Aahiiso, “inama siniiviwa sihimwarexiwe ephome aya”.
^ Ekereku, porneía. Nwehe Moolumo Ootthokiheriwa.
^ Aahiiso, “Muhale saana”.
^ Eversiikulu ela enniphwanyaneya aBiibiliya akina, masi kheniphwanyaneya soolempwa ni matata sinceene sootthuneya sa ekereku.
