Miteko 16:1-40
-
Paulo onnimuthanla Timootheyo (1-5)
-
Mulopwana a oMasedonia onnooniwa moolohani (6-10)
-
Lidia onnikhala mukristau oFilipi (11-15)
-
Paulo ni Sila annitthukweliwa (16-24)
-
Kwarta a ekhatteya ni atthu a etthoko awe annipatisiwa (25-34)
-
Paulo oniphavela wira anamalamulela a epooma anvekele musammaha (35-40)
16 Vano, Paulo aahiphiya oDerbe, nuumala-vo, aahirowa oLiistra. Weiwo, aahikhala mwiixutti mmosa aihaniwa Timootheyo. Maama awe aari muyuda oowaamini, masi paapa awe aari mukereku.
2 Timootheyo owo, aanittottopeliwa saana ni anna a oLiistra ni a wIkoonio.
3 Paulo aaniphavela vanceene omukuxa Timootheyo, wira eetteke mikwaha hoothe. Tivo, aahimwinnuwiha, mwaha wa ayuda yaakhala mittetthe iye, maana otheene aya yaanisuwela wira paapa awe Timootheyo aari mukereku.
4 Okathi Paulo ni apatthani awe yaavira aya mpooma, yaanaahiyerya anna a ipooma iyo, malamulo yaavahiwe ni arummwa ni axitokweene yaari oYerusalemu, wira yeetteleke.
5 Tthiri, atthu a mmulokoni yaanitepa olipihiwa waamini waya, nave khula nihiku atthu yaanincerereya.
6 Nuumala-vo, yaahivira oFiriixia ni oGalasia, okhala wira munepa woowaarya waahaakhoottiherya olaleerya nuulumo na Muluku eprovinsia ya wAsia.
7 Vano, vaaphiyale aya oMiisia, yaahimananiha orowa oBitinia, masi munepa wa Yesu,* waahaakhoottiherya.
8 Tivo, yaahivira* oMiisia, anarowa oTrowade.
9 Ohiyu, Paulo aahimoona moolohani mulopwana mmosa a oMasedonia, eemenle ene, onvekelaka wira: “Murwe oMasedonia, munikhaliherye”.
10 Nuumala Paulo oweha eyo, naaheererya orowa oMasedonia, nisuwelaka wira Muluku taanirumme waalaleerya ihapari sooreera atthu a weiwo.
11 Siiso, naahiwela ekalawa oTrowade, nnarowa oSamotraasia. Mmeeloni mwaya naahiphiya oNeyaapoli.
12 Naahikhuma weiwo, nnarowa oFilipi, epooma ya aroma,* nave-tho tekhanle epooma yuulupale ya edistritu ya oMasedonia. Nto naahikhala epooma eyo mahiku vakhaani.
13 Nihiku na saabadu, naahikhumela ota wa epooma, nnarowa okerekhere wa muro, weiwo nuupuwela ahu wira waahikhala opuro woovekela. Naahikilaathi, nipacerya waalaleerya athiyana yaathukumanne vaavale.
14 Nave aahikhala muthiyana aihaniwa Lidia, a oTiyatira, yoowo aatumiha ikuwo sa musurukhu munceene ni aamukokhorela Muluku. Owo aaniwiriyana, nto Yehova aahitthukula saana murima awe, onavaha ephoole itthu Paulo aahimya awe.
15 Okathi Lidia owo ni atthu a vatthokoni vawe yaapatisiwe aya, aahinlattula iiraka: “Moonaka wira kinniroromeleya ohoolo wa Yehova, murwe mmake vatthokoni vaka”. Nto naahimutthara, okhala wira owo aahinikhanyererya.
16 Nihiku nimosa, nrowaka opuro woovekela, naahikumana mwali, aari murumeyi. Owo aahikhalana nlaikha nootakhala, nenlo naamwiiriha oloherya itthu sa muhoolo. Ale aavarela awe muteko, yaaniphwanya musurukhu munceene, mwaha wa muteko awe wa waaxerya ehako.
17 Mwali ole aanithipelela onitthara, okhuwelaka wira: “Alopwana ala, ti arumeyi a Muluku Muulupalexa, ni anoolaleeryani moota Muluku onrowa awe owoopolani”.
18 Mwali ole aanikhuwela siiso mahiku manceene. Nto Paulo aahiphweeleya, tivo aahirukunuwa onahimeerya nlaikha nle nootakhala wira: “Mwa nsina na Yesu Kristu, kinoorumani wira mmukhume mwali owo”. Siiso, nlaikha nle naahimukhuma ewoora ene yeele.
19 Okathi mapatarau a mwali ole yoonale aya wira khiyaarina-tho manera* oophwanya musurukhu, yaahinvara Paulo ni Sila, yaapurulela nipuro noowaatta atthu,* yaavahererya makhulupale.
20 Nto yaahaaroiha wa anamalamulela a epooma, anaaleela wira: “Alopwana ala annikumiherya onyakulihana vanceene epooma ahu. Atthu ala ayuda,
21 masi itthu aniixuttiha aya, hiyo khanneemereriwa ni nlamulo weettela, maana hiyo na aroma”.
22 Muttitthi wa atthu waahimurukunuwela Paulo ni Sila, nave anamalamulela a epooma yaahiruma wira eruliwe malaya aya, ni emaniwe ni ikopo.
23 Nuumala waamana vanceene, yaahaarihela mukhatteya, ni yaahimuruma kwarta a ekhatteya wira aawehaweheke oratteene.
24 Okhala wira kwarta owo aahirummwa, nto aahaarihela nipuro nootepexa ovareleleya na ekhatteya, aatthukwa metto saya, olipihaka ni ithaapwa.*
25 Waattamela ohiyu eriyari, Paulo ni Sila yaanivekela, ni yaaniipa isipo soomuttottopela Muluku, nave atthu akina yaatthukweliwe, yaanaawiriyana.
26 Vootutuxerya, yaahikhumelela etetere yuulupale, mpakha waaxekexa alisenso* a ekhatteya. Niinaano-ru, mikhora sotheene sa ekhatteya saahihuleya, nave ikwirinti ni ithaapwa* saatthukwaniwe aya atthu awo otheene, saahitaphuwa.
27 Nuumala kwarta a ekhatteya ovenya vaarupa awe, khiweha wira mikhora sa ekhatteya saahihuleya, aahimutholola xoowa* awe, onahala vakhaani wiixiiva, maana uupuwela wira alipa-ootthukiwa yaahitthyawa.
28 Masi Paulo aahikhuwela oriki: “Muhiixiive, okhala wira otheene ahu nri vaava!”
29 Kwarta owo, aahivekela ovahereriwa muthuko, ni aahitthimakela mukhatteya aari awe Paulo ni Sila, nto aahikokhora ohoolo waya othukumelaka.
30 Vano kwarta owo aahaakumiherya ota, onaakoha wira: “Kipake exeeni wira koopowe?”
31 Nto awo yaahimwaakhula ariki: “Mmwaaminiki Pwiya Yesu, vano nyuwo ni atthu a etthoko anyu, munimoopowa”.
32 Nuumala-vo, awo yaahimulaleerya nuulumo na Yehova, vamosa ni atthu otheene a etthoko awe.
33 Ewoora ene yeele ya ohiyu, kwarta ole aahaakuxa, aaloola makhwatta aya. Nto owo ni atthu otheene a etthoko awe, yaahipatisiwa voohipisa.
34 Kwarta owo, aahaaroiha owannyawe, khwaavaha yoolya. Nto owo ni atthu otheene a etthoko awe, yaahitteeliwa murima vanceene, mwaha woowi aanimwaamini Muluku.
35 Nuumala oxa, anamalamulela a epooma, yaahaaruma makwarta ariki: “Mwaataphule alopwana awo”.
36 Vano, kwarta a ekhatteya aahimuhimeerya Paulo etthu aarummwale awe, oriki: “Anamalamulela a epooma aaruma wira mutaphuliwe. Nto, mukhumele ota, muroweke ni murettele”.
37 Masi Paulo aahiwaakhula oriki: “Awo aaniwaxula ohoolo wa atthu otheene ahiniphukenle, nnaamwi nri ene aroma. Nave, aanirihela mukhatteya. Vano, aniphavela onikumiherya ota voohisuweliwa? Nnaari, vahiireye siiso! Arweeke axineene yaawo, anikumiherye ota”.
38 Makwarta yaahaaleela moolumo ala anamalamulela a epooma. Nto awo yaahoova vanceene, nuumala wiiwa wira alopwana ale yaari aroma.
39 Siiso anamalamulela awo yaahirwa, anaaxonttela. Nuumala waakumiha mukhatteya, yaahaavekela wira akhume epooma ele.
40 Nto Paulo ni Sila yaahikhuma mukhatteya, anarowa owannyawe Lidia. Okathi yaawenhe aya axinna, yaahaalipiha, anarowa.
Inoota
^ Onihimmwa munepa woowaarya, Yesu aavahiwe awe ni Muluku.
^ Aahiiso, “yaahivikana”.
^ Epooma yahaakhanle wItaalia, masi atthu yaakhala epooma eyo, yaarina ehakhi emosa-ru ntoko atthu a wItaalia.
^ Aahiiso, “mananna”.
^ Aahiiso, “omerkaatu”.
^ Nwehe Moolumo Ootthokiheriwa.
^ Aahiiso, “oxekexa mathipelo”.
^ Nwehe Moolumo Ootthokiheriwa.
^ Aahiiso, “ aahitholola espaata”.
