Nehemiya 1:1-11
1 Moolumo a Nehemiya,* mwaana a Hakaliya: Mweeri wa Kisilevi,* eyaakha ya namuloko miili, miyo kaari opuro woolipihiwa* wa oSusa.
2 Nto okathi ene yoowo, aahiphiya munnaka Hanani vamosa ni alopwana yaakhuma oYuda, kaakoha ihaali sa ayuda yooponwe weepotthani ni ihaali sa oYerusalemu.
3 Awo yaahaakhula wiira: “Atthu ahanle anikhala oprovinsia yaawo yooponwe weepotthani, annihaawa vanceene ni annuuliwa muru. Ixiri sa oYerusalemu soopwexakasiwa, nave mikhora saya soopahiwa ni mooro”.
4 Kiiwaka-ru moolumo awo, kaahikilaathi, kaahipacerya wunla ni kaahiviriha mahiku manceene kiripiwe ene murima. Kaahitthukwa ni kaahinvekela Muluku a wiirimu.
5 Nto kaahimulela kiiraka: “Khoo Yehova, Muluku a wiirimu, Muluku muulupale ni oowoopiha, onimaleliha nivarihano nawe ni oniwooniherya ophenta woororomeleya ale animphenta ni aneettela sooruma sawe.
6 Xontte, mutthukule maitho anyu, nave maaru anyu awiriyane nivekelo na murumeyi anyu, nenlo kimpaka aka olelo. Kinnoovekelani othana ni ohiyu, mwaha wa arumeyi anyu, aisarayeli, ni kinnihimya itampi atthu a Isarayeli yootthekenlaayani. Noottheka, miyo vamosa ni etthoko ya apaapa.
7 Tthiri hiyo noowiirelani itthu soohiloka, mwaha woohiiwelela sooruma sanyu, malamulo anyu, ni ikano sanyu seiyo mwanvanhe anyu murumeyi anyu, Moise.
8 “Xontte, muupuwele moolumo* mwaamurumme anyu murumeyi anyu Moise, yaahimya wiira: ‘Mwapaka etthu yoohiroromeleya kinimoomwarya-mwaryani eriyari ya atthu.
9 Masi, mwatthikela wa miyo, munaiwelela sooruma saka ni muneettela, hata atthu anyu amwarenle ene mpakha omalenle elapo, miyo kinimwaathukumanya, khula opuro ori aya, kaattikiherye opuro kithanlale aka wiira nsina naka nikhaleke weiwo’.
10 Awo arumeyi anyu ni atthu anyu, yaawo nwooponle anyu ni owerya wanyu wuulupale ni ntata nanyu noowerya.
11 Khoo Yehova, xontte, maaru anyu awiriyane ovekela wa murumeyi anyu ola ni ovekela wa arumeyi anyu anittittimiha vanceene nsina nanyu. Xontte, mwiirihe wiira olelo, itthu simweettele saana murumeyi anyu ola ni mulopwana* ola okoonele othunku”.
Okathi ole, miyo kaari mulipa-oolawiha itthu mwene aawurya awe.
Inoota
^ Nsina nintaphulela “Yehova onnimaaliha”.
^ Munwehe Apendise B15.
^ Aahiiso, “opalaasio”.
^ Aahiiso, “soolopola”.
^ Eyo piiyo, mwene.
