Nehemiya 10:1-39
10 Atthu yaahenle eseelu* nivarihano, yaari ala:
Kuvernatoro* Nehemiya, mwaana a Hakaliya,Ni Sedekiya,
2 Seraya, Azariya, Yeremiya,
3 Paxehuri, Amariya, Malikiya,
4 Hatuxi, Xebaniya, Maluki,
5 Harimi, Meremothi, Obadiya,
6 Daniyeli, Ginetoni, Baruki,
7 Mexulami, Abiya, Miyamini,
8 Maaziya, Biligayi ni Xemaya. Ala yaari anamukuttho.
9 Vano alevi yaari ala: Yexuwa mwaana a Azaniya, Binuwi mwaana a Henadadi, Kadimiyeli,
10 ni axinnawe Xebaniya, Hodiya, Kelita, Pelaya, Hanani,
11 Mika, Rehobi, Haxabiya,
12 Zakuri, Xerebiya, Xebaniya,
13 Hodiya, Bani ni Beninu.
14 Ahooleli a atthu yaari ala: Parewoxi, Pahathi-Mowabi, Elami, Zatu, Bani,
15 Buuni, Azigadi, Bebayi,
16 Adoniya, Bigivayi, Adini,
17 Ateri, Ezekiya, Azuri,
18 Hodiya, Haxumi, Bezayi,
19 Harifi, Anatothi, Nebayi,
20 Magipiyaxi, Mexulami, Heziri,
21 Mexezayeli, Sadoki, Yaduwa,
22 Pelatiya, Hanani, Anaya,
23 Hoxeya, Hananiya, Haxubi,
24 Halohexi, Pileha, Xobeki,
25 Rehumi, Haxabina, Maaseya,
26 Ahiya, Hanani, Anani,
27 Maluki, Harimi ni Bayanahi.
28 Atthu akina, eyo piiyo, anamukuttho, alevi, makwaarta a vamukhora, alipa-oowiipa, ale yaavara muteko mutemplo* ni atthu ootheene yaavalanne ni atthu a ilapo saarukurenrye wiira atthareke Nlamulo na Muluku eekeekhai, vamosa ni axaaraya, anaaya axilopwana ni anaaya axithiyana, ootheene yaarina osuwela ni wiiwexexa,*
29 Ootheene aya yaahitakaahana ni axinnaya, alopwana oottittimiheya ni yaahilapha wiira yaamweettelaka Nlamulo na Muluku eekeekhai, nenlo aavanhe awe omurumeelaka Moise murumeyi a Muluku eekeekhai, ni wiira yaamwiiwelelaka oratteene malamulo ootheene a Yehova, Pwiya ahu, ophukela wawe, ni ikano sawe.
30 Khaninrowa waatheliha aniihu axithiyana atthu a ilapo sinaattamenle, nave khaninrowa waakuxa anaaya axithiyana wiira atheliweke ni aniihu axilopwana.
31 Vakhala wiira atthu a ilapo sinaattamenle, animoorwa otumiha mireerelo saya ni ipyo saya nihiku na esaabadu, khaninrowa othuma etthu, nnakhala nihiku na esaabadu aahiiso nihiku noowaarya. Nave-tho, khula eyaakha ya neethanu nenli, khaninrowa olima imatta sahu, nave nnimwaalevelela atthu ootheene anikophenle.
32 Nave khula mutthu ooweha wiira ohaana ovaha nimeya na exeekele emosa khula mwaakha, empa ya Muluku ahu:
33 para iphaawu sinivahiwa Muluku, soovaha sa ipyo sinivahiwa khula okathi, mikuttho soopahiwa sinivahiwa khula esaabadu ni khula mweeri musya, ifesta sithanliwe, itthu sikhalihiwe soowaarya, soovaha sa oleveleliwa etampi, wiira aleveleliwe itampi atthu a Isarayeli, ni soovaha para muteko wootheene onivariwa empa ya Muluku ahu.
34 Nave-tho, naahivonya isorti wiira nisuwele mwaattelo wa ikhuni khula emusi ya anamukuttho, alevi ni atthu yaarowa aya oruuhaka empa ya Muluku ahu, khula mwaakha, wiira sipahiweke valtaari a Yehova, Muluku ahu, moovarihana ni ele elempwale Munlamuloni.
35 Nave khula mwaakha nnooroiha empa ya Yehova mihokorokho soopacerya ottokottha sa mmatta mwahu ni mihokorokho soopacerya ottokottha sa khula muthinto wa mwiri,
36 vamosa ni aniihu oopacerya oyariwa ni inama sahu soopacerya ototholiwa, moovarihana ni ele elempwale Munlamuloni. Nave nnooroiha inama sahu soopacerya ototholiwa munikotoni mwahu. Nnooroiha itthu iyo empa ya Muluku ahu, nave nnimwaaroihela anamukuttho anivara muteko empa ya Muluku ahu.
37 Nave-tho, nihaana waaroihela anamukuttho, opuro onisukiwa mireerelo sa empa ya Muluku ahu, otthu wa ipyo soopacerya ohemphwa, soovaha sahu, mihokorokho sa miri sa khula muthinto, eviinyu ya niinaano ni makhura, vamosa ni epantta ya namuloko ya itthu siniruwerya ahu mmatta mwahu wiira naavahe alevi, okhala wiira alevi tanaakhela epantta ya namuloko ya itthu nnaala ahu imatta sa ipooma sahu.
38 Vano, namukuttho mwaana a Aroni, ohaana okhala ni alevi okathi alevi anrowa aya okuxaka ipantta sa namuloko. Nave ipantta iyo sa namuloko, alevi ahaana ovaha epantta ya namuloko ya itthu iyo empa ya Muluku ahu, isaala sinisukiwa mireerelo.
39 Tthiri, aisarayeli ni anamwane a alevi, ahaana oroiha soovaha sa ipyo, eviinyu ya niinaano ni makhura opuro sinisukiwa mireerelo, weiwo siri aya mireerelo sa opuro woowaarya, ni ari aya anamukuttho anivara muteko, makwaarta a vamukhora ni alipa-oowiipa. Siiso khaninrowa onyanyala empa ya Muluku ahu.
Inoota
^ Aahiiso, “nthoonyeryo”.
^ Aahiiso, “Tirisata”, mwiihanelo wa oPersia aahimmwa kuvernatoro a eprovinsia.
^ Aahiiso, “Anetinimi”. Eheeperi, “ale yaavahereriwe”.
^ Aahiiso, woonasa wene: “atthu ootheene yaawerya wiiwexexa”.
