Nehemiya 12:1-47
12 Ala yaari anamukuttho ni alevi, yaawo yaatthinke ni Zorobabeli mwaana a Salathiyeli ni Yexuwa: Seraya, Yeremiya, Eezira,
2 Amariya, Maluki, Hatuxi,
3 Xekaniya, Rehumi, Meremothi,
4 Ido, Ginetoyi, Abiya,
5 Miyamini, Maadiya, Biiliga,
6 Xemaya, Yoyaribi, Yedaya,
7 Salu, Amoki, Hilikiya ni Yedaya. Ala yaari ahooleli a anamukuttho vamosa ni axinnaya, mahiku a Yexuwa.
8 Alevi aari Yexuwa, Binuwi, Kadimiyeli, Xerebiya, Yuda ni Mataniyahi yoowo aahoolela isipo sa oxukhurela vamosa ni axinnawe.
9 Nave Bakibukiya, Uni ni axinnaya, yaaneemela ohoolo waya, avaraka ntoko makwaarta a vamukhora.*
10 Yexuwa aahimuyara Yoyakimi, Yoyakimi aahimuyara Eliyaxibi, nave Eliyaxibi aahimuyara Yoyada.
11 Yoyada aahimuyara Yonathani, vano Yonathani aahimuyara Yaduwa.
12 Mahiku a Yoyakimi, anamukuttho yaawo yaari ahooleli a imusi saya, taala: Meraya a etthoko ya Seraya; Hananiya a etthoko ya Yeremiya;
13 Mexulami a etthoko ya Eezira; Yehohanani a etthoko ya Amariya;
14 Yonathani a etthoko ya Maluki; Yosefe a etthoko ya Xebaniya;
15 Aadina a etthoko ya Harimi; Helikayi a etthoko ya Merayothi;
16 Zakariya a etthoko ya Ido; Mexulami a etthoko ya Ginetoni;
17 Ziikiri a etthoko ya Abiya; . . .* a etthoko ya Miniyamini; Pilitayi a etthoko ya Mowadiya;
18 Xamuwa a etthoko ya Biiliga; Yehonathani a etthoko ya Xemaya;
19 Matenayi a etthoko ya Yoyaribi; Uzi a etthoko ya Yedaya;
20 Kalayi a etthoko ya Salayi; Heeberi a etthoko ya Amoki;
21 Haxabiya a etthoko ya Hilikiya; ni Netaneli a etthoko ya Yedaya.
22 Ahooleli a imusi sa alevi vamosa ni anamukuttho, yaahilempwa mahiku a Eliyaxibi, Yoyada, Yohanani ni Yaduwa, mpakha okathi wa omwene wa Dario a oPersia.
23 Alevi yaawo yaari ahooleli a imusi saya, yaahilempwa muliivuruni ya itthu siiraneyale okathi ole, mpakha mahiku a Yohanani, mwaana a Eliyaxibi.
24 Ahooleli a alevi aari Haxabiya, Xerebiya ni Yexuwa, mwaana a Kadimiyeli. Nave axinnaya yaaneemela ohoolo waya, ekurupu emosa ya makwaarta mpantta wa ekurupu ekina ya makwaarta, wiira amuttottopeleke ni omuxukhurela Muluku attharaka malakiheryo a Davidi, mulopwana a Muluku eekeekhai.
25 Mataniyahi, Bakibukiya, Obadiya, Mexulami, Talimoni ni Akubi, yaakhala makwaarta a vamukhora, awehawehaka mapuro yaasukiwa mireerelo, waattamela vamukhora.
26 Atthu ala yaavara muteko mahiku a Yoyakimi mwaana a Yexuwa mwaana a Yosadaki ni mahiku a kuvernatoro Nehemiya ni namukuttho ni mulipa-oolepa Eezira.
27 Okathi sainakurariwa aya ixiri sa oYerusalemu, awo yaahiwaavya alevi mapuro ootheene yaakhala aya, yaaroiha oYerusalemu wiira yatthapele ovahereriwa ixiri iyo atteeliwe ene murima, yiipaka masipo ooxukhurela, arumihaka isimbalo,* aviola acikhaani ni aviola aalupale.
28 Alipa-oowiipa saana, yaahithukumana akhumaka odistritu,* oYerusalemu wootheene, mittetthe saamukhaani sa atthu a oNetofa,
29 oBethi-Xiligali, ni imatta sa oXeeba ni wAzimavethi, okhala wiira alipa-oowiipa yaahipaka mittetthe saamukhaani oYerusalemu wootheene.
30 Nave anamukuttho ni alevi yaahiireeriha, yaahaareeriha atthu, yaahireeriha mikhora ni exiri.
31 Nuumala-vo, kaahaaruuha makhulupale a oYuda, kaakhaliha vasulu va exiri. Nave kaahithanla ikurupu piili suulupale sa atthu yaawiipa akooru ooxukhurela ni ikurupu piili sa atthu wiira yaatthareke. Ekurupu emosa yaaneetta erowaka moono woolopwana wa exiri, weiwo ori Mukhora wa Osalani.
32 Hoxaya ni nimeya na makhulupale a oYuda, yaanitthara ekrupu ele,
33 vamosa ni Azariya, Eezira, Mexulami,
34 Yuda, Beniyamini, Xemaya ni Yeremiya.
35 Nave-tho yaahikhala naawo anamwane akina a anamukuttho yoopa malope: Zakariya mwaana a Yonathani, mwaana a Xemaya, mwaana a Mataniyahi, mwaana a Mikaya, mwaana a Zakuri, mwaana a Asafi,
36 ni axinnawe Xemaya, Azareli, Milalayi, Gilalayi, Maayi, Netaneli, Yuda ni Hanani. Awo yaarumiha ikaruma sa masipo sa Davidi, mulopwana a Muluku eekeekhai. Nave mulipa-oolepa Eezira aari ohoolo waya.
37 Yaaphiyale aya Mukhora wa Ehime, yaahirowa vasulu va exiri, ewelaka eskatta yaaroiha epooma ya Davidi. Exiri eyo, yaari vasulu va Empa ya Davidi, ni yaaroiha Mukhora wa Maasi, mpantta onikhuma nsuwa.
38 Ekurupu ekina yaawiipa akooru ooxukhurela yaahirowa moono woothiyana. Nto miyo kaahitthara ekurupu eyo ni nimeya na atthu, neettaka vasulu va exiri, niviraka Empa Yoorakamela Osulu ya Efornu, mpakha Exiri Yuulupale.
39 Naahivira vasulu va Mukhora wa Efrayimi, nirowa Mukhora wa Epooma ya Khalai, Mukhora wa Ihopa, Empa Yoorakamela Osulu ya Hananeli, Empa Yoorakamela Osulu ya Meya, ni Mukhora wa Ipwittipwitthi, neemela Mukhora wa Makwaarta.
40 Wookiseryani waya, ikurupu soopiili sa atthu yaawiipa akooru ooxukhurela saaheemela ohoolo wa empa ya Muluku eekeekhai. Nave miyo ni nimeya na makhulupale naaheemela vaavo.
41 Vano anamukuttho Eliyakimi, Maaseya, Miniyamini, Mikaya, Eliyowenayi, Zakariya, ni Hananiya, yaahikuxa malope aya.
42 Awo yaari vamosa ni Maaseya, Xemaya, Eleyazari, Uzi, Yehohanani, Malikiya, Elami ni Eseri. Nto alipa-oowiipa, yaaniipa vanceene, ahooleliwaka ni Izihari.
43 Nihiku nle, saahivahiwa mikuttho sinceene ni atthu yaahitteeliwa murima, okhala wiira Muluku eekeekhai aahiwiiriha otteeliwa murima vanceene. Nave athiyana ni anamwane yaahitteeliwa murima. Siiso, otteeliwa murima wa atthu a oYerusalemu, waaniiwanyeya ottaiwene.
44 Nihiku nle, yaahithanliwa alopwana wiira aweheryeke opuro waasukiwa aya soovaha, mihokorokho soopacerya, ni ipantta sa namuloko. Yaahaana waakhela weiwo itthu saaruuhiwa imatta sa ipooma iye ntoko soovaha saavekeliwa ni Nlamulo para anamukuttho ni alevi, okhala wiira atthu a oYuda yaahitteeliwa murima, maana anamukuttho ni alevi yaanivara muteko.
45 Awo yaahipacerya onvarela muteko Muluku ni otthara yooruma ya wiireeriha, nave alipa-oowiipa ni makwaarta a vamukhora yaanipaka etthu emosa-ru, attharaka malakiheryo a Davidi ni mwanawe, Salomoni.
46 Okhuma khalai, mahiku a Davidi ni a Asafi, yaahikhala atthu yaahoolela alipa-oowiipa ni yaahoolela masipo a omuttottopela ni omuxukhurela Muluku.
47 Mahiku a Zorobabeli ni mahiku a Nehemiya, atthu ootheene a Isarayeli yaanaavaha itthu alipa-oowiipa ni makwaarta a vamukhora moovarihana ni itthu saaphavela aya khula nihiku. Nave-tho, yaanaavaha alevi mpantta wa namuloko wa soovaha iyo, nto alevi yaanivaha osuulu wa Aroni mpantta wa namuloko wa itthu yaakhela aya.
Inoota
^ Aahiiso, woonasa wene: “okathi aakokhoreliwa awe Muluku”.
^ Vanikhala wiira soolempwa sa eheeperi khinaaheliwe nsina opuro ola.
^ Ekaruma ya isipo ya eyuuma enlikana ni eparatho.
^ Eyo piiyo, edistritu yaarukurenrye oYordani.
