Nehemiya 13:1-31
13 Nihiku nle yaahisommwa eliivuru ya Moise ohoolo wa atthu. Vaahiphwanyiwa opuro waalempwale wiira atthu a wAmoni aahiiso a oMowabi khiyaarowa wiirela mpantta muloko wa Muluku eekeekhai,
2 okhala wiira khiyaakunxe ephaawu ni maasi okathi yaaronwe aya okumana ni aisarayeli, ohiya-vo yaahimuthuma Balaamu wiira aatakhalihe. Masi, Muluku ahu aahiiriha otakhaliha iwo okhala mareeliho.
3 Amalaka-ru wiiwa Nlamulo nlo, atthu ootheene a ilapo sikina yaahipacerya ovalaanyiwa ni atthu a Isarayeli.
4 Ehinatthi wiiraneya eyo, namukuttho aaweherya mapuro yaasukiwa mireerelo* empa* ya Muluku ahu aari Eliyaxibi, mmusi awe Tobiya.
5 Owo aahinvaha Tobiya opuro muulupale yoowo khalai waasukiwa ipyo, oliibano, mireerelo, epantta ya namuloko ya ipyo, eviinyu ya niinaano ni makhura, yaarina aya etireitu alevi, alipa-oowiipa ni makwaarta a vamukhora, vamosa ni soovaha para anamukuttho.
6 Okathi owo wootheene, miyo nkaakhanle oYerusalemu, okhala wiira kaahitthikela wa mwene eyaakha ya namiloko miraru ni piili ya mwene Artaxerxe a oBabiloonia. Nuuvira okathi vakhaani, kaahinvekela mwene wiira kikhume.
7 Nuumala ophiya oYerusalemu kaahiweha etthu yootepexa otakhala Eliyaxibi aapanke awe. Owo aahimureerela murima Tobiya, onvahaka opuro vate wa empa ya Muluku eekeekhai.
8 Kaahinanariwa vanceene ni etthu ele, tivo kaahiruma oriheliwa ota mireerelo sootheene sa Tobiya saari opuro ole.
9 Nuumala-vo, kaahiruma oreerihiwa opuro waasukiwa mireerelo, kittikiherya memmo mireerelo sa empa ya Muluku eekeekhai, ni soovaha sa ipyo ni oliibano.
10 Nave-tho, kaahisuwela wiira alevi khiyaavahiwa itthu saaphavela aya, mpakha alevi awo ni alipa-oowiipa yaavara muteko, okhuma khula mmosa otthikelaka mmatta mwawe.
11 Nto, kaahipacerya waapwapwela makuvernatoro makina, kiiraka: “Xeeni empa ya Muluku eekeekhai eninyanyaliwa aya?” Vano kaahaathukumanya alevi ni kaahaathanlela-tho mapuro aya.
12 Nave atthu ootheene a oYuda yaahiruuha opuro waasukiwa mireerelo epantta ya namuloko ya ipyo, eviinyu ya niinano ni makhura.
13 Nto kaahimuthanla namukuttho Xelemiya, mulipa-oolepa Sadoki ni Pedaya, mulevi mmosa, wiira aweheryeke mapuro yaasukiwa mireerelo. Nave kaahimuthanla Hanani mwaana a Zakuri, mwaana a Mataniyahi, wiira aakhaliheryeke, okhala wiira yaanooniwa okhala alopwana oororomeleya. Awo yaahikhalana muritti woowaakawela mireerelo axinnaya.
14 Khoo Muluku aka, mukuupuwele, mwaha wa etthu kipanke aka, nave muhittipihe miteko saka sa ophenta woororomeleya kiirenle aka empa ya Muluku aka, ni miteko sinivariwa memmo.
15 Mahiku ale, kaahiwoona atthu a oYuda anyakelaka ewuuva opuro waanyakattiwa ewuuva nihiku na esaabadu, ahephaka ipyo soowaatta ni yaateexihaka apuuru ipyo. Awo yaaniruuha eviinyu, ewuuva, ifiiku ni mithinto sootheene sa miritti oYerusalemu nihiku na esaabadu. Nto kaahaalopola wiira ahitumihike itthu iyo nihiku nle.*
16 Nave atthu a oTiiro yaakhala mpooma yaaniruuha ihopa ni inamuna sootheene sa marotta anaatumiherya atthu a oYuda ni a oYerusalemu nihiku na esaabadu.
17 Nto miyo kaahaapwapwela atthu oovuwa a oYuda kihimyaka wiira: “Otakhala xeeni nno muniira anyu, muhononaka nihiku na esaabadu?
18 Kiira ti yeeyo amuhavinre anyu yaapaka aya, amwiirihaka Muluku ahu onikumiherya hiyo ni epooma ela ihasara iya sootheene? Vano munninanariha nihiku na esaabadu, mmwiirihaka Muluku onanariwa vanceene ni atthu a Isarayeli”.
19 Nto okathi muuttutthi waapacenrye aya okhuneela mikhora sa oYerusalemu nihinatthi nihiku na esaabadu, kaahiruma owaliwa mikhora. Nave kaahiruma wiira sihihuliwe mpakha ovira nihiku na esaabadu, ni khula mukhora kaahaaruma arumeyi aka wiira ahihiye miritti sivolowaka nihiku na esaabadu.
20 Siiso alipa a nakoso ni alipa-ootumiha inamuna sootheene sa marotta, yaahiviriha ohiyu omosa wala miili ari ene ota wa oYerusalemu.
21 Vano kaahaalopola kiiraka: “Xeeni muniviriha anyu ohiyu muri ene ohoolo wa exiri? Mwatthikela opaka ela, kinoowoomolani ni ikuru”. Okhuma nihiku nle orowa ohoolo, khiyaatthinke-tho nihiku na esaabadu.
22 Nave kaahaaleela alevi wiira yiireeriheke mahiku ootheene ni wiira arweeke owehererya mikhora, wiira nihiku na esaabadu nooniweke okhala noowaarya. Khoo Muluku aka, mukuupuwele, nave mukimorele ikharari mwaha wa ophenta wanyu woororomeleya wuulupale.
23 Mahiku ale, kaahiweha wiira ayuda yaahaathela* athiyana a wAxidodi, a wAmoni ni a oMowabi.
24 Nimeya na anaaya yaalavula nttaava na atthu a wAxidodi, nave nimeya nikina yaalavula mattaava a atthu a ilapo sikina, masi khuuvo a yaawo aasuwela olavula nttaava na ayuda.
25 Vano kaahaapwapwela ni kaahaatakhaliha, nave kaahaamana alopwana akina ni kaahiwaasula ikharari saya. Kaahaatumererya olapha ni nsina na Muluku kiiraka: “Aniinyu axithiyana ahitheliwe ni anaaya axilopwana, nnakhala aniinyu axilopwana ehaathele anaaya axithiyana, aahiiso nyuwo mmansinyu muhaathele.
26 Salomoni, mwene a wIsarayeli, khaatthenke mwaha wa athiyana? Eriyari ya maloko manceene, khaakhanle mwene mukina aalikana nuuwo. Owo aaniphentiwa ni Muluku awe, tivo Muluku aamukhalinhe awe mwene a atthu ootheene a Isarayeli. Masi owo aahittheka mwaha wa athiyana awo a ilapo sikina.
27 Nwenrye sai opaka etthu ela yootakhala, muhiroromeleyaka wa Muluku ahu mpakha waathela athiyana a ilapo sikina?”
28 Mwaana mmosa a Yoyada, mwaana a Eliyaxibi, muulupale a anamukuttho, aahikhala mutthepa a Sanibalati a oBethi-Horoni. Tivo kaahimoomolela ottaiwene wa miyo.
29 Khoo Muluku aka, nwuupuwele mwaha woohonona muteko wa onamukuttho ni nivarihano mpanke anyu ni anamukuttho ni alevi.
30 Siiso kaahaareeriha mwaha wa itthu sootheene soohiloka sa ilapo sikina, nave kaahaathanlela anamukuttho ni alevi miteko saya, khula mmosa muteko awe.
31 Nave kaahilokiherya wiira sikhaleke ikhuni okathi aya woothanliwa ni okathi wa mihokorokho soopacerya ottokottha.
Khoo Muluku aka, mukuupuwele ni mukireelihe.
Inoota
^ Aahiiso, “mapuro yaalyiwa”.
^ Aahiiso, “etemplo”.
^ Aahiiso, woonasa wene: “kaahaalopola nihiku nle wiira ahitumiheke itthu”.
^ Aahiiso, “yaahaaroiha owannyeya”.
