Nehemiya 4:1-23
4 Nuumala Sanibalati osuwela wiira naahitthikela oteka exiri, aahinanariwa vanceene ni aahinyoonyiheya vanceene, nave aahipacerya waathanya ayuda.
2 Nave owo aahilavula ohoolo wa axinnawe ni anakhotto a oSamariya oriki: “Exeeni ela ayuda ala oolosowa anipaka aya? Anoona wiira anoowerya opaka etthu ela mekhaya? Niireke anoowerya ovaha mikuttho? Anuupuwela wiira anoomaliha muteko ola nihiku nimosa? Niireke anoowerya ottikiherya maluku oopahiwa ari omiyakoni ntoko ntthupi?”
3 Tobiya, a wAmoni, yoowo aamwaattamenle aahihimya wiira: “Hata khwatte onoowerya omoroxa exiri ya maluku aniteka aya”.
4 Khoo Muluku ahu, muniwiriyane, okhala wiira ninnithanyiwa. Mwiirihe wiira oveeha waya waamorele yaawo,* nave mwaavahererye mmatatani mwa awanani aya ni nwiirihe okhala ipottha elapo ekina.
5 Muhikhuneele mulattu aya, aahiiso muhimalihe mulattu aya ohoolo wanyu, okhala wiira ahaaveeha alipa-ooteka.
6 Nto, naahitthikela oteka exiri. Naahittiyela mapuro ootheene yaapwexiwe, ni naahiteka-tho mpakha eriyari aya. Nave atthu khiyaahiyale ovara muteko ni murima aya wootheene.
7 Nuumala Sanibalati, Tobiya, atthu a wArabia, atthu a wAmoni ni atthu a wAxidodi wiiwa wiira muteko woolokiherya ixiri sa oYerusalemu waanirowa ohoolo ni yaanittiyeliwa mapuro yaapwexiwe, yaahinanariwa vanceene.
8 Awo yaahiiwanana orwa owana ni atthu a oYerusalemu ni okumiherya ohiiwanana.
9 Masi hiyo naahinvekela Muluku ahu, nave naahaapweha makwaarta opuro aya, wiira anaakiheryeke atthu awo othana ni ohiyu.
10 Vano, atthu akina a oYuda yaahimya wiira: “Anamuteko aakhulumuwa, nave khoreere muteko, khaninwerya omaliha oteka exiri”.
11 Nave awanani ahu yaahimya wiira: “Ahinatthi osuwela ni ahinatthi oniweha, nnookela eriyari aya; niwiive ni neemexe muteko”.
12 Ayuda yaattamanne naawo okathi yaavolowa aya mpooma, khula okathi* yaahimya wiira: “Awo anontuphela ipantte sootheene”.
13 Nave kaahaapweha makwaarta ipantta sa ohitto ni sahaakhapeleliwa, ottuli wa exiri. Kahaapweha moovarihana ni imusi saya, akunxe ene ispaata, mavaka ni miyuura.
14 Okathi koonale aka wiira yaanoova, moowaakuveya kaahaaleela atthu oovuwa, makuvernatoro makina ni atthu akina wiira: “Muhiwoove atthu awo. Mmuupuweleke Yehova, yoowo ori muulupale ni oowoopiha, nave nwaneke mwaha wa axinninyu, aniinyu axilopwana ni axithiyana, axaarinyu ni ipa sanyu”.
15 Nuumala awanani ahu wiiwa wiira naahisuwela etthu yaapaka aya, ni wiira Muluku eekeekhai aahimuhonona palano aya, ootheene ahu naahitthikela oteka exiri.
16 Okhuma nihiku nle orowa ohoolo, nimeya na alopwana aka yaanivara muteko wooteka, vano nimeya yakhala makwaarta akunxe ene mavaka, iskuutu, miyuura ni ikuleti sa eyuuma. Nave makhulupale yaanaakhaliherya* atthu ootheene a etthoko ya Yuda
17 yaawo yaateka exiri. Ale yaateexa itthu, yaavara muteko ni ntata nimosa, ntata nikina akunxe ene ekaruma ya ekhotto.
18 Khula mulipa-ooteka aahikhalana espaata muyuununi mwawe okathi aateka awe, nave aanikhala mulopwana mmosa vakhiviru vaka oopa nlope.
19 Moottharelana, kaahaalela atthu oovuwa, makuvernatoro makina ni atthu akina wiira: “Muteko ola muulupale ni khoreere waatta, nave noomwara-mwareya exiri yootheene, nirakamelanaka mukina ni mukhwaawe.
20 Okathi munrowa anyu wiiwa oruma wa nlope, muthukumane vamosa ni hiyo opuro ori ahu. Muluku ahu onoowana onaakihaka”.
21 Siiso khinaahiyale ovara muteko atthu akina akunxe ene mavaka, okhuma oxaka mpakha ohiyu okathi sinipacerya aya wooneya itheneeri.
22 Okathi ole kaahaaleela atthu wiira: “Alopwana ootheene ni anamakhaliherya aya avirihe ohiyu oYerusalemu. Ohiyu, anrowa okhala makwaarta ahu, nave othana, anrowa ovaraka muteko wooteka”.
23 Tivo, nnakhala miyo, axinnaka, anamakhaliherya aka ni makwaarta yaakitthara, khinaarula ikuwo sahu. Khula mmosa aanikuxa ekaruma awe ya ekhotto ntata nawe noolopwana.
Inoota
^ Eheeperi, “waamorele vamuru vaya”.
^ Eheeperi, “ikwaha muloko”.
^ Eheeperi, “yaanemela ottuli”.
