Nehemiya 5:1-19
5 Vano alopwana ni axaaraya yaaniikhupanyerya vanceene mwaha wa axinnaya, ayuda.
2 Atthu akina yaahimya wiira: “Hiyo, aniihu axilopwana ni aniihu axithiyana khanreere. Nihaana ophwanya yoolya wiira nilyeeke ni nikhaleke akumi”.
3 Atthu akina yaahimya wiira: “Mwaha woothowa yoolya, ninneemexerya imatta sahu, imatta sahu sa ewuuva ni ipa sahu wiira niphwanye yoolya”.
4 Akina yaahimya wiira: “Nookopha musurukhu wiira nimulive mpoosito mwene, neemexeryaka imatta sahu ni imatta sahu sa ewuuva.
5 Vano hiyo ni axinnihu, nirina erutthu emosa ni ephome emosa-ru,* nave aniihu anlikana ni anaaya, masi hata vari siiso, nihaana waavahererya aniihu axilopwana ni aniihu axithiyana ntoko ipottha, nave nenna-va, aniihu akina axithiyana, ari weepotthani. Khiivo etthu nikhanle ahu oopaka wiira naakhoottiherye, okhala wiira imatta sahu ni imatta sahu sa ewuuva ti sa atthu akina”.
6 Okathi kaiwale aka wiikhupanyerya waya ni moolumo ala, kaahinanariwa vanceene.
7 Nto kaahupuwelela itthu iya vamurimani vaka, kinapacerya waapwapwela atthu oovuwa ni makuvernatoro makina, kiiraka: “Ootheene anyu munnaaliviha exuuru axinninyu”.
Nave kaahipaka muthukumano muulupale mwaha wa atthu awo.
8 Miyo kaahaalela wiira: “Khula okathi naawerya ahu, naaniwoopola axinnihu ayuda yaawo yaatumiheriwe maloko makina. Masi vano nyuwo munnaatumiha axinninyu. Nto niireke nnootthikela owoopola?” Awo yaahimaala ahinoona etthu yoohimya.
9 Moottharelana, miyo kaahaakoha wiira: “Etthu munipaka anyu khelonke. Khamunoona oreerela weetta nimoovaka Muluku ahu, wiira maloko makina, awanani ahu ahiniveehe?
10 Miyo, axinnaka ni arumeyi aka, nave-tho noowooliha musurukhu ni yoolya. Xontte, nihiye okophiha ni ixuuru.
11 Xontte mwaattikiherye olelo vaava, imatta saya, imatta saya sa ewuuva, sa olivera ni ipa saya, musurukhu aya wa yoolya, wa eviinyu ya niinaano, ni wa makhura yoowo munaaliviha anyu ixuuru”.
12 Vano awo yaahaakhula wiira: “Hiyo nnimwaattikiherya mireerelo saya nave khaninrowa waavekela etthu. Nnoopaka oratteene ntoko muhimmye anyu”. Nto kaahiwiihana anamukuttho, kiwiiriha alopwana awo olapha ohoolo waya ahimyaka wiira yaamwiira siiso ntoko yaaleihenrye aya.
13 Vano miyo kaahitatha ntthupi na nlaya naka, kihimyaka wiira: “Mwa enamuna ela, Muluku eekeekhai aatathele ota wa empa awe ni wa mireerelo sawe alopwana ootheene ahinrowa weettela yooleiherya ela, nave mwa enamuna emosa-ru atathiwe ni ahihalane etthu”. Nto muloko wootheene waahihimya wiira: “Amen!”* Nto awo yaahimuttottopela Yehova. Atthu ootheene yaahimaliherya ele yaaleihenrye aya.
14 Nave okhuma nihiku owo* okithanlale awe para okhala kuvernatoro a elapo ya oYuda, eyaakha ya namiloko miili mpakha eyaakha ya namiloko miraru ni piili ya mwene Artaxerxe, eyo piiyo, iyaakha 12, miyo ni axinnaka khinnalye yoolya yeeyo kuvernatoro orina awe etireitu.
15 Makuvernatoro yaakhanle khalai kihinatthi miyo, yanaahaaxa atthu mahiku ootheene, yaavekelaka ixeekele* 40 sa eparatha wiira athume ephaawu ni eviinyu. Nave arumeyi aya, yaanaahaaxa atthu. Masi miyo nkipanke eyo okhala wiira kinnimuttittimiha vanceene* Muluku.
16 Ohiya-vo, miyo kaahivara muteko wooteka exiri ela, nave nkaakunxe ematta. Arumeyi aka ootheene yaahithukumana wiira avare muteko.
17 Yaahikhala ayuda 150 ni makuvernatoro makina yaalya vameesa vaka, ohaakontari atthu a maloko makina oowaattamela.
18 Khula nihiku kaaniiveliwa epooyi, ipwittipwitthi thanu na mosa sooloka ni axipalame. Nave khula mahiku 10, naanikhalana mithinto soovirikana sa eviinyu yoowaatta. Hata vaari siiso, miyo nkaavekenle ephaawu kuvernatoro orina awe etireitu, okhala wiira atthu yaahaatteliwa muteko.
19 Khoo Muluku aka, mukuupuwele ni mukireelihe mwaha wa itthu sootheene kipanke aka kiwiirelaka atthu ala.
Inoota
^ Eheeperi, “siisaale eri aya erutthu ya axinnihu, erutthu ahu eri siiso”.
^ Aahiiso, “Yiireye siiso; Ekhale siiso!”
^ Eyo piiyo, mwene.
^ Exeekele emosa yaalemela ikarama 11.4. Munwehe Apendise B14.
^ Eheeperi, “kinnimoova”.
