Nehemiya 6:1-19
6 Okathi Sanibalti, Tobiya, Gexemi a wArabia ni awanani ahu akina yaaleeliwe aya wiira kaahitthikela oteka exiri, ni wiira khiyaahanle mapuro oophweeya (nnaamwi nlelo kahahenle mikhora),
2 Sanibalati ni Gexemi, moowaakuveya yaahikiruuhela ihapari saahimya wiira: “Murwe, nikumane mittetthe saamukhaani sa opuro woowaataleya wa wOno”. Masi awo yaaphavela okiiriha etthu yootakhala.
3 Siiso, kaahaaruma atthu wiira yaaleele wiira: “Nkireere waatteliwa miteko, nkiwerya orowa. Karwa okumana ni nyuwo, muteko ola onimweemela”.
4 Awo yaahikiruhela ihapari simosa-ru ikwaha xexe, nto miyo kaaniwaakhula etthu emosa-ru.
5 Vano, Sanibalati aahimuruma murumeyi awe okiruuhela ihapari simosa-ru ekwaha ya neethanu, vamosa ni ekarta yahaatthukiwe.
6 Ekarta eyo yaahimya wiira: “Atthu ahiiwa wiira nyuwo ni ayuda muninvirikanya mwene, nave Gexemi onihimya etthu emosa-ru. Tivo muniteka anyu exiri eyo, nave moovarihana ni etthu enihimmwa, nyuwo munrowa okhala mwene aya.
7 Ohiya-vo, muhathanla maprofeta wiira alaleye oYerusalemu wootheene yoohimyakani nyuwo wiira: ‘Ookhala mwene oYuda!’ Itthu iya onooleeliwa mwene. Tivo murwe nivaanele mwaha owo”.
8 Masi miyo kaahiruma oleeliwa wiira: “Khiivo etthu ehimyale anyu yiiraneyale, itthu iyo sootheene nyuwo muroopakelela”.*
9 Ootheene aya yaaneererya onoopopiha ahimyaka wiira: “Awo animooceela muteko ola,* ni khonrowa omala”. Masi miyo kaahivekela kiiraka: “Khoo Muluku, mukivahe olipa murima”.
10 Moottharelana, kaahirowa owannyawe Xemaya, mwaana a Delaya, mwaana a Mehetabeli okathi iipithale awe weiwo. Owo aahihimya wiira: “Nrowe nithanle okathi wiira nakumaane empa ya Muluku eekeekhai, muhina mwa etemplo, nave niwale mikhora okhala wiira awo annoorwa owiivani. Awo anrwa ohiyu, aphavelaka owiivani”.
11 Masi miyo kaahihimya wiira: “Niireke mulopwana ntoko miyo kihaana otthyawa? Niireke mulopwana ntoko miyo kihaana okela mutemplo wiira kikhale mukumi? Nnaari, nkinrowa!”
12 Vano miyo kaahisuwela wiira khaarummwale ni Muluku, masi Tobiya ni Sanibalati ti yaamuthumme wiira olavule eprofesia ela okihimyaka miyo.
13 Owo aaroothummwa wiira okoopopihe ni okiirihe ottheka. Siiso awo yanwerya ohonona mweettelo aka ni okuulihiha muru.
14 Khoo Muluku aka, mmuupuwele Tobiya ni Sanibalati, vamosa ni itthu anipaka aya, nave mmuupuwele profeta muthiyana Nowadiya, vamosa ni maprofeta makina, yaawo yeerenrye okoopopiha ikwaha sinceene.
15 Exiri eyo yaahimalihiwa muhina mwa mahiku 52, nihiku na 25 mweeri wa Eluli.*
16 Okathi awanani ahu ootheene yaasuwenle aya eyo, ni maloko ootheene yaanirukurenrye yaawehale aya eyo, yaahuuliwa muru vanceene, nave yaahisuwela wiira naahimaliha muteko owo nikhaliheriwaka ni Muluku ahu.
17 Mahiku ale, atthu oovuwa a oYuda yaanimuroihela Tobiya ikarta sinceene, vano Tobiya aaniwaakhula.
18 Yaahikhala atthu anceene a oYuda yaaleihenrye wiira yammukhaliherya, okhala wiira owo aari mutthepa a Xekaniya, mwaana a Arahi, ni Yehohanani mwaana a Tobiya, maana aamuthenle mwaana mwaamuthiyana a Mexulami, mwaana a Berekiya.
19 Ohiya-vo, khula okathi kaanileeliwa itthu sooloka simuhimyaka yena, nave owo aanileeliwa itthu kaahimya aka. Nto Tobiya aanikiruuhela ikarta wiira okoopopihe.
Inoota
^ Eheeperi, “sikhumme vamurimani vanyu”.
^ Eheeperi, “Matata aya animooceela muteko ola”.
^ Munwehe Apendise B15.
