Nehemiya 8:1-18
8 Vano, atthu ootheene yaahiiwanana othukumana opuro woowaatta atthu ohoolo wa Mukhora wa Maasi, amuleela mulipa-oolepa Eezira, wiira oruuhe eliivuru ya Nlamulo na Moise, yeeyo Yehova aavanhe awe atthu a Isarayeli.
2 Siiso, nihiku noopacerya na mweeri wa neethanu nenli, namukuttho Eezira aahiiruuha eliivuru ya Nlamulo ohoolo wa muloko wa atthu waari alopwana, athiyana ni atthu ootheene yaawerya wiiwexexa ele yaahimmwa.
3 Nto owo aahisoma voowiiwanyeya opuro woowaatta atthu, ohoolo wa Mukhora wa Maasi, okhuma voosiisu mpakha othana eriyari. Aahaasomela alopwana, athiyana ni atthu ootheene yaawerya wiiwexexa. Vano atthu yaahiiwa oratteene okathi yaasommwa aya eliivuru ya Nlamulo.
4 Mulipa-oolepa Eezira aaheemela vapaalkuni ya ethaapwa yaapakeliwe okathi ene yoole. Nave vamosa nuuwo, moono awe woolopwana aahikhala Matithiya, Xema, Anaya, Uriya, Hilikiya ni Maaseya. Moono awe woothiyana aahikhala Pedaya, Mixayeli, Malikiya, Haxumi, HaxiBadana, Zakariya ni Mexulami.
5 Eezira aahihula eliivuru eyo ohoolo wa atthu ootheene, okhala wiira aari vasulu va atthu ootheene. Okathi aahunle awe eliivuru eyo, atthu ootheene yaaheemela.
6 Eezira aahimuxonttela Yehova Muluku eekeekhai, yoowo ori Muulupalexa. Nto atthu ootheene yaahaakhula ariki: “Amen!* Amen!”, nave yaahiteexerya matata aya osulu. Awo yaahikokhora ohoolo wa Yehova, nave yaahuurama mpakha vathi.
7 Vano Yexuwa, Bani, Xerebiya, Yamini, Akubi, Xabitayi, Hodiya, Maaseya, Kelita, Azariya, Yozabadi, Hanani ni Pelaya, yaawo yaari alevi, yaanaatthokiherya atthu Nlamulo, nlelo atthu awo yeemenle ene.
8 Awo yaanaasomela atthu voowiiwanyeya eliivuru eyo, eyo piiyo, Nlamulo na Muluku eekeekhai, yaatthokiheryaka oratteene ni yaaleelaka ele yaataphulela aya. Siiso yaanaakhaliherya atthu awo wiiwexexa oratteene ele yaasommwa.
9 Nave kuvernatoro* Nehemiya, namukuttho ni mulipa-oolepa Eezira, ni alevi yaawo yaawiixuttiha atthu, yaahaaleela atthu ootheene wiira: “Nla nihiku noowaarya para Yehova Muluku anyu. Muhinleke aahiiso wiikhupanyerya”. Tthiri, atthu ootheene yaaninla okathi yiiwa aya moolumo a Nlamulo.
10 Nto owo aahaaleela atthu wiira: “Murooke, mwalyeeke eyoolya yoosiva* ni mwawuryeke itthu soonaya, nave mwaaroiheleke yoolya ale ahirina etthu yoolokiheriwa, okhala wiira nla nihiku noowaarya para Pwiya ahu, muhiriipiweke murima, okhala wiira otteeliwa murima onikhuma wa Yehova tori ikuru sanyu”.
11 Alevi yaanaamaaliha atthu ootheene, ariki: “Muhinleke, okhala wiira nla nihiku noowaarya. Muhiriipiweke murima”.
12 Vano atthu ootheene yaahirowa olya ni owurya ni yaahaaroihela yoolya atthu akina, nave yaahitteeliwa murima vanceene, okhala wiira yaahiiwexexa moolumo yaaleeliwe aya.
13 Nihiku na nenli, ahooleli a imusi sootheene, anamukuttho ni alevi yaahithukumana ni mulipa-oolepa Eezira wiira yiiwexexe oratteene moolumo a Nlamulo.
14 Vano, yaahiphwanya opuro naalempwale aya Nlamulo na Yehova, omurumeelaka Moise, naaruma wiira atthu a Isarayeli yaahaana okhala mmaxaxani okathi wa efesta ya mweeri wa neethanu nenli,
15 ni yaahaana olaleya ipooma saya sootheene ni oYerusalemu wootheene wiira: “Murowe muttetthe wa omiyaakoni, mwaruuhe iritta sa miri sa olivera, miri sa pinyeiro, iritta sa miri siniihaniwa murta, ni korooro ni iritta sa miri sikina simpakeliwa maxaxa moovarihana ni ele elempwale”.
16 Vano, atthu yaahirowa ni yaahiruuha iritta wiira apake maxaxa aya, khula mutthu otthunyele nxaxa nawe, vamosa ni mavate aya, mavate a empa ya Muluku eekeekhai, mavate a opuro woowaatta atthu wa Mukhora wa Maasi ni wa opuro woowaatta atthu wa Mukhora wa Efrayimi.
17 Siiso, atthu a muloko wootheene yaatthinke weepotthani yaahipaka maxaxa anakhala memmo. Aisarayeli khiyaatonko opaka efesta siisa, okhuma mahiku a Yooxuuwa, mwaana a Nuni mpakha nihiku nle. Tivo atthu yaahitteeliwa murima vanceene.
18 Nihiku ti nihiku yaanisommwa eliivuru ya Nlamulo na Muluku eekeekhai okhuma nihiku noopacerya mpakha nihiku nookiserya. Nave yaahiviriha mahiku 7 atthapelaka efesta, vano nihiku na neethanu neeraru waahipakiwa muthukumano muulupale ntoko yaarummwale aya.
Inoota
^ Aahiiso, “Yiireye siiso; Ekhale siiso”.
^ Aahiiso, “Tirisata”, mwiihanelo wa oPersia aahimmwa kuvernatoro a eprovinsia.
^ Eheeperi, “itthu sooneneva”.
