Nehemiya 9:1-38
9 Nihiku na namiloko miili neexexe na mweeri yoowo, aisarayeli yaahithukumana. Awo yaahitthukwa awanre ene isaakho ni asareyale ene ntthupi.
2 Atthu a osuulu wa Isarayeli yaahivalaana ni atthu ootheene a ilapo sikina, nto yeemenle ene yaahihimya itampi saya ni soovonya sa axipaapa aya.
3 Iwoora tthaaru saavinre yeemenle ene mapuro aya, yaahisommwa voowiiwanyeya eliivuru ya Nlamulo na Yehova, Muluku aya. Nave saahivira-tho iwoora tthaaru ahimyaka itampi saya ni akokhoraka ohoolo wa Yehova Muluku aya.
4 Yexuwa, Bani, Kadimiyeli, Xebaniya, Buuni, Xerebiya, Bani ni Kenani yaaheemela vapalkuni wa alevi ni yaahimukhuwelela Yehova, Muluku aya, ni nsu noowiiwanyeya.
5 Alevi, Yexuwa, Kadimiyeli, Bani, Haxabineya, Xerebiya, Hodiya, Xebaniya ni Petahiya yaahihimya wiira: “Mweemele, mmuttottopeleke Yehova Muluku anyu mahiku ootheene. Nittottopeliwe nsina nawe noovuwa, nenlo nri vasulu wa mareeliho ni ottottopela wootheene.
6 “Nyuwo paahi muri Yehova. Nyuwo moopaka erimu, aayo, erimu ya osuluxa, ni itthu sootheene siri weiwo, nave moopaka elapo ni itthu sootheene siri memmo, ni iphareya ni itthu sootheene siri memmo. Nyuwo munniiriha itthu iyo sootheene okhala sikumi, nave itthu sootheene siri wiirimu* sinnikokhora ohoolo wanyu.
7 Nyuwo mwa Yehova, Muluku eekeekhai yoowo omuthanlale Abramu, omukumiha elapo ya Uri ya atthu a oKhaldeya ni onvaha nsina noowi Abrahamu.
8 Nyuwo muhoona ororomeleya wawe wa nyuwo vamurimani vawe. Tivo, mwaahipaka nivarihano nuuwo, wiira mwaamunvaha owo ni osuulu awe elapo ya akanaani, ya ahiti, ya atthu a wAmori, ya aperizi, ya ayebusi ni ya axirigaxi. Nave moomaliherya itthu mwaamuleihenrye anyu okhala wiira mwa naxariya.
9 “Nyuwo mwaahoona oxanka wa amuhavinre ahu wExiitu, nave mwaahiiwa okhuwela waya waattamela Ephareya Yooxeerya.
10 Tivo, moopaka ithoonyeryo ni miiriirya wiira mmuhukhumu Farawo, arumeyi awe ootheene ni atthu ootheene a elapo awe, okhala wiira mwaahisuwela wiira yaanaahaaxa atthu anyu. Nave moosuweliha nsina nanyu, nenlo ninsuweliwa oratteene mpakha olelo-va.
11 Mwaahikawanya ephareya ohoolo waya, wiira alapuwe ephareya aviraka opuro woowuuma, nave ale yaalupattha mwaahaarihela opuro woowiixa, ntoko nluku ninriheliwa mmaasini ootupa.
12 Othana mwaaniweettiha murumeelaka neeku, nave ohiyu mwaaniweettiha murumeelaka mooro, wiira waamwaleeleke ephiro yaarowa aya oviraka.
13 Nave nyuwo mwaahikhuruwa omwaako Sinayi, mulavulana muri ene wiirimu, mwaavaha moolumo oophukela a xariya, malamulo eekeekhai,* ikano ni sooruma sooloka.
14 Nyuwo muhaasuweliha esaabadu anyu yoowaarya, nave muhaavaha sooruma sanyu, ikano sanyu ni malamulo anyu mmurumeelaka murumeyi anyu Moise.
15 Nyuwo mwaahaavaha ephaawu yaamora wiirimu okathi yaavoliwe aya etala, nave mwaahikumiha maasi vamwala okathi yaavoliwe aya ntthona, mwaahaaleela wiira akele ni akuxe elapo yeeyo mwalaihenrye* anyu wiira mwaamwaavaha.
16 “Masi, amuhavinre ahu, yaahiixinnuwiha ni yaahuumiha mirima saya, nave awo khiyaiwelenle sooruma sanyu.
17 Awo yaahikhootta owiriyana, nave khiyuupuwenle miteko sootikiniha mwaavanre anyu, masi awo yaahuumiha mirima saya ni yaahimuthanla muhooleli wiira aattikiherye weepotthani wExiitu. Masi nyuwo mwa Muluku onilevelela okathi wootheene, a othunku ni oomoriwa ikharari, oopixa murima* ni oosareya ophenta woororomeleya, nto khimwaanyanyanle.
18 Hata okathi yaipakenle aya elatarato ya epooyi ya eyuuma, ahimyaka wiira, ‘ola Muluku ahu onikuminhe elapo ya wExiitu’, awo khiyoonihenrye ottittimiha wuulupale.
19 Nave nyuwo mooniheryaka omoriwa ikharari wuulupale, khimwaanyanyanle woothakoni. Neeku naawooniherya ephiro othana, khinaahiyale, nnakhala mooro waamwaleela wiira owooniheryeke ephiro yaarowa aya oviraka ohiyu khiwaahiyale.
20 Mwaahaavaha munepa anyu woowaarya wiira avareke itthu ni ankhili, nave khimwaakhoottihenrye emana anyu ni mwaahaavaha maasi okathi yaavoliwe aya ntthona.
21 Iyaakha 40 mwaahaavaha yoolya woothakoni. Khiivo etthu yaahaleela. Malaya aya khiyaathaala, nave inawu saya khasaipale.
22 “Nyuwo mwaahaavaha mamwene ni atthu, mwaakawelaka ilapo; siiso yaahikuxa elapo ya Sihoni, eyo piiyo, elapo ya mwene a oHexeboni, ni elapo ya Ogi mwene a oBaxani.
23 Nave moowiiriha anaaya okhala oowaatta ntoko itheneeri sa wiirimu. Nto muhaaroiha anamwane awo elapo yeeyo mwaaleihenrye anyu amuhavinre aya wiira yaamukela ni yaamukuxa wiira ekhale yawaya.
24 Siiso awo aakela ni aakuxa elapo eyo, nave moowiiriha waawerya atthu a oKanaani, yaawo yaakhala mulaponi-mmo, akhale mamwene ni atthu yaakhala mulaponi-mmo, wiira ewiiriheke etthu yaaphavela aya.
25 Awo yaahikuxa ipooma soolipihiwa ni imatta sooruwerya, yaahikuxa ipa saasareyale itthu sootheene sooreera, ihime soothimpwa sene, imatta sa ewuuva, imatta sa olivera ni miri siima mihokorokho soowaatta. Siiso, awo yaahilya, avona, aneneva ni yaahittottela mureerelo oreera wanyu murima wuulupale.
26 “Masi, awo yaahikhala oohiiwelela, yaahoovirikanyani ni yaahihiya Nlamulo nanyu. Yaahiwiiva maprofeta anyu, yaawo yaalopola wiira yootthikeleni, nave yaahipaka itthu suulupale sooniherya ohittittimiha.
27 Mwaha wa yeeyo, nyuwo mwaahaavahererya mmatatani mwa awanani aya, yaawo yaahaaxa. Masi awo yaanookhuwelelani okathi yaahaaxiwa aya. Nto nyuwo mwaaniwiriyana muri ene wiirimu. Nave mwaha wa omoriwa wanyu ikharari wuulupale mwaahaavaha ahooleli wiira awoopole mmatatani mwa awanani aya.
28 “Masi amalaka-ru woopowa yaanitthikela opaka itthu sootakhala ohoolo wanyu. Tivo nyuwo mwaanaavahererya mmatatani mwa awanani aya, yaawo yaawerya.* Vano awo yaanitthikela woovekelani wiira mwaakhaliherye, nto nyuwo mwaanaawiriyana muri ene wiirimu. Khula okathi mwaaniwoopola mwaha wa omoriwa wanyu ikharari wuulupale.
29 Nyuwo mwaanaalopola wiira mwaattikiherye Nlamulo nanyu, masi awo yaaniixinnuwiha ni khiyaaphavela owiriyana sooruma sanyu. Yaanitthekela ikano sanyu, seiyo sinrowa omwiiriha mutthu okhala mukumi akhala wiira onimweettela. Awo yaanithipelela woorukunuwelani, yaanuumiha mirima saya ni khiyaaphavela owiriyana.
30 Mwaahaapixerya murima iyaakha sinceene ni mwaahithipelela waalopola murumeelaka munepa anyu, mwaarumaka maprofeta anyu, masi awo khiyaaphavenle owiriyana. Wookiseryani waya mwaahaavahererya mmatatani mwa atthu a ilapo sikina.
31 Mwaha woomoriwa wanyu ikharari wuulupale, nyuwo khimwaamala-malinhe, aahiiso khimwaanyanyanle, okhala wiira nyuwo mwa Muluku a othunku ni oomoriwa ikharari.
32 “Vano, khoo Muluku ahu, Muluku muulupalexa oowerya ni oowoopiha, onimaleliha nivarihano nawe ni onooniherya ophenta woororomeleya, muhiliyale mixankiho sootheene sinikhumelenle hiyo, mamwene ahu, makhulupale ahu, anamukuttho ahu, maprofeta ahu, amuhavinre ahu ni atthu anyu ootheene okhuma mahiku a mamwene a wAsiiria mpakha olelo-va.
33 Nyuwo muhooniherya okhala a xariya ni itthu sootheene siniiranenle, okhala wiira moopaka itthu voororomeleya. Hiyo nipanke itthu sootakhala.
34 Vano, mamwene ahu, makhulupale ahu, anamukuttho ni amuhavinre ahu, awo khiyaiwelenle Nlamulo nanyu, nnakhala khiyaawiriyanne malamulo anyu ni moolumo anyu oowuupuxerya yaawo mwaavanhe anyu.
35 Hata okathi yaari aya moomweneni mwaya atteeliwaka murima mwaha wa oreera wanyu murima wuulupale mwaawoonihenrye anyu, ematta yuulupale ni yooruwerya mwaavanhe anyu, awo khiyoorumenleni ni khiyaahiyale opaka itthu sootakhala.
36 Tivo, hiyo olelo-va na ipottha, aayo, ipottha elapo yeeyo mwaavanhe anyu amuhavinre ahu wiira elyeeke mihokorokho saya ni epuheke itthu sooreera sa elapo eyo.
37 Mwaha wa soottheka sahu, itthu sinceene siniruweriwa elapo ela sinikuxiwa ni mamwene yaawo munivanhe anyu wiira anihaaxeke. Awo annilamulela eniirihaka hiyo ni inama sahu etthu aniphavela aya, nave hiyo nooxanka vanceene.
38 “Tivo, mwaha wa itthu iya sootheene, noopaka nivarihano noolempwa, nenlo neemereriwe niheliwaka eseelu* ya makhulupale ahu, alevi ahu ni anamukuttho ahu”.
Inoota
^ Eheeperi, “anakhotto a wiirimu”. Anihimmwa malaikha ni itheneeri.
^ Aahiiso, “malamulo oororomeleya”.
^ Eheeperi, “mwaavenxale anyu ntata nanyu”.
^ Aahiiso, “oopisa onanariwa”.
^ Aahiiso, “yaahaaxa”.
^ Aahiiso, “ekanyeryo”.
