Wiisuupulula 11:1-19
11 Nave, kaahivahiwa mutathi waalikana ni ekopo yuulupale,* kinahimeeriwa wira: “Nvenye, mwaphime etemplo ya Muluku, ni mwaaphime altaari vamosa ni ale anikokhorela memmo.
2 Masi, muhiphime nivate na mpantta wa ota wa etemplo, muhiye siiso, okhala wira noovahiwa atthu ahikhanle ayuda. Awo anrowa onyakela epooma yoowaarya, miyeeri 42.
3 Kinimwaaruma anamoona aka anli, ewanre ene esaakho, wira yalaleye eprofesia, mahiku 1.260”.
4 Awo anlikanyihiwa ni miri miili sa olivera ni mithuko* miili. Nave aaheemela ohoolo wa Pwiya a elapo ya vathi.
5 Akhala mutthu onrowa owooniha owereya, onookhuma mooro mwaano mwaya wira waapahe awanani aya. Akhala mutthu onrowa ophavela owooniha owereya, mutthu owo onrowa wiiviwa siiso.
6 Awo aakhalana owerya wa owala osulu* wira ehirupe epula, mahiku anrowa aya olaleyaka eprofesia. Nave aakhalana owerya wa otatuxa maasi wira ekhale ephome, ni okumiherya mulaponi itthu sootakhala sa khula enamuna, khula okathi aniphavela aya.
7 Yamaliha olaleya, enama yoowali, yeeyo enikhuma mulittini moowiixa, enrowa owana ekhotto naawo. Eyo enimwaaxintta ni enoowiiva.
8 Nto mirutthu saya sinrowa waataleliwa ephiro yuulupale ya epooma yuulupale, weiwo-tho atthu yaamwiivale aya Pwiya aya vamwirini. Sodoma ni Exiitu sinithoonyerya epooma eyo.
9 Vano, atthu a makhuli oovirikana, ni a mahimo, ni mattaava ni maloko, anrowa owehaka mirutthu saya mahiku mararu nnimeya. Nave khanrowa weemererya wira mirutthu iyo sivithiwe mmahiye.
10 Atthu anikhala mulaponi anrowa otteeliwa murima ni otthapa mwaha wa yeeyo. Nave anrowa ovahanaka itthu, okhala wira yaanoopopihiwa ni maprofeta ale manli.
11 Nuumala mahiku ale mararu nnimeya, Muluku aahiwiiseelela iphumu sa okumi maprofeta ale manli, nto awo yaahitthikela okhala akumi, yeemela. Vano, atthu ale yaawoona, yaahoova vanceene.
12 Nto maprofeta awo manli yaahiiwa nsu noorunya naakhuma wiirimu, naahimeeryaka wira: “Nwele-nno”. Nto awo yaahiwela wiirimu aviraka mmeekuni, nave awanani aya yaahaaweha.*
13 Ewoora ene yeele, yaahikhumelela etetere yuulupale, ni mpantta wa namuloko wa epooma, waahimora. Atthu 7.000 yaahiiviwa ni etetere ele, nave ale yaahanle yaahoova, ananvuwiha Muluku a wiirimu.
14 Otakhaliwa wa nenli woovira. Mwiiwe! Otakhaliwa wa neeraru onnoorwa moowaakuveya.
15 Nlaikha na neethanu nenli naahoopa nlope naya. Yaahiiwanyeya masu oorunya wiirimu, ahimyaka wira: “Omwene wa Muluku ahu ni wa Kristu awe, onnaalamulela apinaatamu, nave owo onrowa olamulelaka ntoko mwene mahiku otheene ni voohimala”.
16 Nave axitokweene 24, yaawo yaakilanthi veehiceni vaya, ohoolo wa Muluku, yaahikhoroma, anamukokhorela Muluku,
17 ahimyaka wira: “Ninnooxukhuruni Yehova, Muluku Oowerya Sotheene, yoowo onikhala ni aakhanle, maana mookuxa owerya wanyu wuulupale, ni moopacerya olamulela ntoko mwene.
18 Masi maloko aaviruwa, ni nyuwo muhooniherya oviruwa wanyu. Nave woophiya okathi othanliwe wira aphukeliwe alipa-ookhwa ni atthuveliwe maprofeta, yaawo anoorumeelani, vamosa ni ale oororomeleya* ni ale anoova nsina nanyu, ni atthu acikhaani ni aalupale. Nave woophiya okathi woowaapwetexa ale anihonona elapo”.
19 Vano, wiirimu, etemplo ya Muluku yaahihuliwa, nto naahooneya nivuku nawe na nivarihano, niri ene mutemplo mwawe. Waahikhumelela overunya, yaahiiwanyeya masu ni okukutteya, ni yaahikhumelela etetere ni maralala maalupale.
Inoota
^ Aahiiso, “ekopo ya mphimo”.
^ Mithuko iyo, saari sa eyuuma ni saahikhalana mavatta 7, yaapwehiwa ixamaniiya.
^ Aahiiso, “wiirimu”.
^ Aahiiso, “yaanaaweha”.
^ Ekereku, “ale oowaarya”.
