Wiisuupulula 16:1-21
16 Nave, kaahiiwa nsu noorunya nikhumaka nipuro noowaarya,* nihimeeryaka malaikha 7 wira: “Murowe, mwamwarexele mulaponi itthu siri mmihasani 7 sa onanariwa wa Muluku”.
2 Nlaikha noopacerya naahirowa, khumwarexela mulaponi etthu yaari mmuhasani mwaya. Vano, makhwatta oowereya ni ootakhala, yaahaakhumelela atthu yaale yaarina ekanyeryo ya enama yoowali, ni yaakokhorela elatarato ya enama eyo.
3 Nlaikha na nenli naahimwarexela mphareya etthu yaari mmuhasani mwaya. Vano ephareya yaahithatuwa ephome, ntoko ephome ya mutthu iiviwe. Nto soopattuxiwa sotheene sikumi sa mphareya, saahikhwa.
4 Nlaikha na neeraru naahimwarexela mmuro ni mapuro aniphattuwa maasi etthu yaari mmuhasani mwaya. Nto iyo saahithatuwa ephome.
5 Kaahiiwa nlaikha naarina owerya wa weettiha maasi, nihimyaka wira: “Nyuwo mwa Muluku oororomeleya, yoowo onikhala ni aakhala. Nyuwo ti mwa xariya, tivo moolamula wira itthu iya siiraneye.
6 Awo aamwarexa ephome ya ale oororomeleya* ni ya maprofeta, tivo, nyuwo muhaawuriha ephome. Tthiri awo anniphwanela”.
7 Vano, kaahiiwa nsu nikhumaka valtaari, nihimyaka wira: “Aayo Yehova, Muluku Oowerya Sotheene, ophukela wanyu ti weekeekhai ni ti wa xariya”.
8 Nlaikha na neexexe naahimwarexela vansuwani etthu yaari mmuhasani mwaya, nto nsuwa naahivahiwa owerya wa waapaha atthu ni mooro.
9 Vano, atthu yaahipahiwa ni oviha wuulupale, masi khiyaattharunwe ni khiyanvuwinhe Muluku, ohiya-vo, yaahiveeha nsina na Muluku, yoowo orina owerya wa okumiherya ihasara iyo.
10 Nlaikha na neethanu, naahimwarexela veehiceni va enama yoowali, etthu yaari mmuhasani mwaya. Nto yaahikhumelela ewiriphi moomweneni mwa enama eyo yoowali, nave atthu yaahipacerya oluma malumi aya mwaha wa woona owereya.
11 Masi awo khiyaattharunwe miteko saya sootakhala, ohiya-vo, yaahinveeha Muluku a wiirimu mwaha wa woona owereya, ni mwaha wa makhwatta aya.
12 Vano, nlaikha na neethanu namosa, naahimwarexela mmuro muulupale Eufrate etthu yaari mmuhasani mwaya. Nto, muro owo waahuuma wira waatthukulele ephiro mamwene yaarwa onikhuma nsuwa.
13 Nave-tho, kaahiweha moolumo mararu oonanara,* yaawo yaalikana ni anaphulu, akhumaka mwaano mwa enowa yuulupale, ni mwaano mwa enama yoowali, ni mwaano mwa profeta oowootha.
14 Moolumo awo anikhuma wa malaikha ootakhala, nave mamwene a mulaponi motheene ahiiwa. Moolumo awo, annipaka miiriirya wira yaathukumanye mamwene, wira yawane ekhotto ya nihiku nuulupale na Muluku Oowerya Sotheene.
15 “Mwiiwe! Miyo kinrwa ntoko latarau. Oohakalala tuule onikhala oowehaweha ni ohinaakhiwa ikuwo sawe, wira oheetteke ohiwanre etthu, ni wira ohuuliwe muru, owehiwaka ni atthu”.
16 Moolumo awo oonanara, yaahaathukumanya mamwene nipuro nniihaniwa Harmagedoni,* ni nttaava na eheeberi.
17 Nlaikha na neethanu nenli naahimwarexela osulu etthu yaari mmuhasani mwaya. Nuumala-vo, naahiiwanyeya nsu nikhumaka nipuro noowaarya,* veehiceni, nihimyaka wira: “Yoovira!”
18 Nave, waahikhumelela overunya, ni yaahiiwanyeya masu, ni okukutteya. Yaahikhumelela-tho etetere yuulupale ni yoowerya, ehitonko okhumelela okhuma okathi opattuxiwe awe pinaatamu elapo ela ya vathi.
19 Epooma yuulupale yaahikawanyeya, ekhala ipantta tthaaru, nave ipooma sa maloko saahimora. Vano, Muluku aahimuupuwela Babilonia Muulupale, wira onwurihe ekaalisi ya eviinyu ya oviruwa wawe wuulupale.
20 Nave-tho, isisiro sotheene saahitthyawa, ni miyaako saahilakaseya.
21 Nto yaahimora maralala maalupale akhumaka wiirimu, yaamorelaka atthu. Olemela wa khula nluku na maralala awo, waattamela etalento* emosa. Nave, atthu yaahinveeha Muluku, mwaha wa ehasara ya maralala, maana ehasara eyo yaari yuulupalexa.
Inoota
^ Eyo piiyo, Nipuro Noowaaryexa na etemplo.
^ Ekereku, “ale oowaarya”.
^ Aahiiso, “minepa miraru soonanara”.
^ Ekereku, Har Magedón, ninkhuma nuulumo na eheeberi nintaphulela “mwaako wa oMegido”.
^ Eyo piiyo, Nipuro Noowaaryexa na etemplo.
^ Etalento ya ekereku, yaalemela ikiilo 20.4.
