Wiisuupulula 19:1-21
19 Nuumala-vo, kaahiiwa wiirimu etthu yaalikana ni nsu noorunya na muttitthi muulupale wa atthu. Awo yaahimya wira: “Mmuttottopele Yehova!* Muluku ahu onniwoopola apinaatamu, ni ookhalana owerya ni ovuwa,
2 okhala wira ophukela wawe ti weekeekhai ni wa xariya. Owo omphukela muthiyana namararuwa muulupale, yoowo ohononne elapo mwaha wa orupihana wawe woohiloka.* Nave Muluku ohinlela ikuhu ephome ya arumeyi awe, yeeyo namararuwa owo omwarenxe awe ni matata awe”.*
3 Okathi ene yoowo, kaahiwiiwa-tho ekwaha ya nenli, yiiraka: “Mmuttottopele Yehova!* Nave mwiixi wa opahiwa wa namararuwa owo, onniwela osulu mahiku otheene ni voohimala”.
4 Nave axitokweene 24 ni soopattuxiwa sikumi ixexe, yaahikhoroma anamukokhorela Muluku, yoowo okilanthi veehiceni, ehimyaka wira: “Amen! Mmuttottopele Yehova!”*
5 Nave-tho, naahiiwanyeya nsu nikhumaka veehiceni, niiraka: “Mmuttottopeleke Muluku ahu, nyuwo arumeyi awe otheene, munimoova yoowo, aalupale ni acikhaani”.
6 Kaahiiwa-tho etthu yaaruma ntoko nsu na muttitthi muulupale wa atthu, ni yaalikana ni oruma wa maasi manceene, ni yaakhala ntoko okukutteya wuulupale. Awo yaahimya wira: “Mmuttottopele Yehova,* okhala wira Yehova, Muluku ahu Oowerya Sotheene, oopacerya olamulela ntoko mwene!
7 Vano, nitteeliweke murima vanceene ni ninvuwiheke Muluku, okhala wira ekasamento ya Mwaapwittipwitthi yoophiya, nave mwaarawe ohiilokiherya.
8 Mwaarawe mwaapwittipwitthi oovahiwa ekuwo ya eliinyu yooreera, yoowaarya ni yoohinanara, wira oware. Eliinyu yooreera enithoonyerya miteko sa xariya sa ale oororomeleya”.*
9 Nave nlaikha naahikihimeerya wira: “Mulepe moolumo ala: Oohakalala taale alattuliwe orowa olya yoolya ya ekasamento ya Mwaapwittipwitthi”. Naahikihimeerya-tho wira: “Ala moolumo eekeekhai a Muluku”.
10 Nto miyo kaahikhoroma ohoolo wa nlaikha nlo wira kikokhorele. Masi naahikileela wira: “Nnaari, muhiire siiso! Miyo ka murumeyi mukhwiinyu paahi, ni ka murumeyi a axinninyu, yaawo animukhalela onamoona Yesu. Tivo, mmukokhoreleke Muluku paahi, okhala wira yoolakela ya iprofesia, ti olaleya ekeekhai enimuhimya Yesu”.
11 Vano, kaahoona erimu ehuleiye ene, nto yaahikhumelela ekhavalo yootteela. Ole aakilanthi vakhavaloni-vo, oniihaniwa Oororomeleya ni Eekeekhai. Nave ophukela wawe ti wa xariya ni ekhotto oniwana awe ti ya xariya.
12 Maitho awe anlikana ni mooro onivarela, ni ookhalana ikhara sinceene vamuru vawe. Nave oolempwa nsina nihinsuweliwa ni mutthu mukina, masi ninsuweliwa ni yoowo paahi.
13 Owo oowara nlaya na ota nitatheliwe ephome. Nsina nawe ti Nuulumo na Muluku.
14 Nave-tho, anakhotto a wiirimu yaanimutthara ewenle ene ikhavalo sootteela, ni ewanre ene ikuwo sa eliinyu yooreera, yootteela, ni yoohinanara.
15 Mwaano mwawe, aanikhuma xoowa* oowiitha ni oorakama, onrowa awe omurumeela wira opwetexe maloko. Onrowa okukhula maloko awo ni ekopo ya eyuuma. Nave-tho, onninyakela ewuuva nipuro naanyakattiwa ewuuva ya oviruwa wuulupale wa Muluku Oowerya Sotheene.
16 Vanlayani vawe na ota ni vatarani vawe, voolempwa nsina nni: Mwene a mamwene, ni Pwiya a mapwiya.
17 Kaahiweha-tho nlaikha neemenle ene vansuwani, nikhuwelaka ni nsu noorunya, naahimeeryaka axipalame otheene anivava osulu-sulu, wira: “Murwe nno, muthukumanele eyoolya yuulupale ya Muluku,
18 wira mukhuure mirutthu sa mamwene, ni mirutthu sa makumantanti a atoropa, ni mirutthu sa atthu oowerya, ni mirutthu sa ikhavalo ni sa atthu awenle seiyo. Nave, mukhuure mirutthu sa atthu otheene, ale ootaphuwa vamosa ni ipottha, ni ale acikhaani ni aalupale”.
19 Kaahiweha-tho enama yoowali ni mamwene a mulaponi vamosa ni anakhotto aya, athukumanne ene wira yawane ekhotto ni ole okilanthi vakhavaloni vamosa ni anakhotto awe.
20 Ole aakilanthi vakhavaloni aahivara enama ele yoowali ni profeta oowootha, yoowo aapaka miiriirya ohoolo wa enama eyo, wira owootothe ale yaaheliwe ekanyeryo ya enama yoowali, ni ale anikokhorela elatarato ya enama eyo. Enama ele yoowali ni profeta oowootha nlelo ari ene akumi, nakhavalo ole aahaarihela vantthiyani na mooro, nenno nimpaha ni enxoofere.
21 Masi akina yaahanle yaahiiviwa ni xoowa* oorakama aakhuma mwaano mwa ole aakilanthi vakhavaloni. Nto axipalame otheene yaahikhuura mirutthu sa atthu awo, khuvona.
Inoota
^ Ekereku, “Aleluya”. Nuulumo nna, nookhalana enamuna yookhuveya ya nsina na Yehova.
^ Ekereku, porneía. Nwehe Moolumo Ootthokiheriwa.
^ Ekereku, “enikhuma mmatatani mwawe”.
^ Ekereku, “Aleluya”. Nuulumo nna, nookhalana enamuna yookhuveya ya nsina na Yehova.
^ Ekereku, “Aleluya”. Nuulumo nna, nookhalana enamuna yookhuveya ya nsina na Yehova.
^ Ekereku, “Aleluya”. Nuulumo nna, nookhalana enamuna yookhuveya ya nsina na Yehova.
^ Ekereku, “ale oowaarya”.
^ Aahiiso, “espaata”.
^ Aahiiso, “espaata”.
