Wiisuupulula 22:1-21
22 Nlaikha naahikooniherya muro wa maasi a okumi, woowooneela ntoko ekiristaale,* okhumaka veehiceni ya Muluku ni ya Mwaapwittipwitthi,
2 orowaka eriyari ya ephiro yuulupale ya epooma eyo. Ipantte soopiili sa muro owo, saahikhala miri sa okumi, seiyo siima mihokorokho ikwaha 12 khula mwaakha. Khula mweeri, saaniima ekwaha emosa. Makukhu a miri iyo, yaanaapenuxa atthu a maloko otheene.
3 Nave, Muluku khonrowa otakhaliha epooma eyo. Masi ehice ya Muluku ni ya Mwaapwittipwitthi enrowa okhala epooma eyo, ni arumeyi awe anrowa onvarelaka muteko Muluku.
4 Awo anooweha owiitho wa Muluku, nave nsina nawe nnoolempwa vayuuci vaya.
5 Nave-tho, epooma eyo khenrowa wiilaka, ni atthu awo khanrowa ophavelaka omwaleeliwa ni muthuko aahiiso ni nsuwa, okhala wira Yehova Muluku, tonrowa waamwaleelaka. Nave, awo anrowa olamulelaka ntoko mamwene mahiku otheene ni voohimala.
6 Nlaikha naahikileela wira: “Moolumo ala toororomeleya ni teekeekhai. Tthiri, Yehova Muluku, yoowo onilavula aarumeelaka maprofeta, ooruma nlaikha nawe wira niwooniherye arumeyi awe itthu sinrowa wiiraneya voohipisa.
7 Mwiiwe! Miyo kinnoorwa voohipisa. Oohakalala tuule oniiwelela moolumo a eprofesia ya eroolu ela”.
8 Miyo Yohani, kaaniiwa ni kaaniweha itthu iya. Okathi kaiwa aka ni kaaweha aka itthu iya, kaahikhoroma wira kikokhorele nlaikha nle naakoonihenrye itthu iye.
9 Masi nlaikha nle naahikileela wira: “Nnaari, muhiire siiso! Miyo ka murumeyi mukhwiinyu paahi, ni ka murumeyi a axinninyu, yaawo ari maprofeta ni aniiwelela moolumo a eroolu ela. Tivo, mmukokhoreleke Muluku paahi”.
10 Nlaikha naahikileela-tho wira: “Muhivithe moolumo a eprofesia ya eroolu ela, okhala wira okathi othanliwe ohaattamela.
11 Ole ootakhala murima, eetteleke nlelo otakhala wawe murima, ole oohiloka, eetteleke nlelo ohiloka wawe. Masi naxariya, eetteleke nlelo exariya, nave ole ooreera vamaithoni va Muluku, otepeke nlelo oreera vamaithoni va Muluku.
12 “‘Mwiiwe! Miyo kinnoorwa voohipisa. Kinrowa omutthuvela khula mutthu kittharihelaka miteko sawe.
13 Miyo ka Oopacerya ni Ookiserya,* ephattuwelo ni emalelo.
14 Oohakalala taale anikattha malaya aya, wira awerye olya mihokorokho sa miri sa okumi, ni wira awerye okela mpooma, aviraka mikhora sa epooma eyo.
15 Ota wa epooma eyo, aakhala alapwa,* anookhwiri, ale anrupihana voohiloka,* ni anawiive, ni ale anaakokhorela amuluku eethiru, ni otheene ale onaasivela wootha ni anipakelela itthu soowoothiwa’.
16 “‘Miyo Yesu, kooruma nlaikha naka wira nookhaleleni onamoona itthu iya, wira siphwanyihe mureerelo miloko. Miyo ka mutathaari ni osuulu wa Davidi, ni ka etheneeri enaarya voosiisu’”.
17 Nave, munepa woowaarya ni muthiyana onitheliwa,* annithipelela ohimya wira: “Murwe!” Nto ole oniiwa, ohimyeke wira: “Murwe!” Nave ole ovoliwe ntthona, orweeke. Ole oniphavela, owuryeke maasi a okumi mahala ene.
18 “Kinnaaleela otheene ale aniiwa moolumo a eprofesia ya eroolu ela, wira: Akhala mutthu onrowa wuncererya etthu wa itthu iya silempwale, Muluku onoomuruuhela ihasara silempwale murooluni-mu.
19 Nave, akhala mutthu onrowa okumiha etthu wa moolumo ari murooluni ya eprofesia ela, Muluku khonrowa omweemererya waakhela itthu sooreera sinihimmwa murooluni-mu. Eyo enitaphulela wira khonrowa omweemererya mutthu owo olya mihokorokho sa miri sa okumi, nave khonrowa omweemererya okela epooma yoowaarya.
20 “Ole onihimya wira itthu iya sotheene ti seekeekhai, onniira: ‘Aayo, kinnoorwa voohipisa’”.
“Amen! Murweeke, Pwiya Yesu”.
21 Oreera murima wuulupale wa Pwiya Yesu, okhale ni ale oororomeleya.*
Inoota
^ Nluku noowaarya ni noowooneela.
^ Ekereku, “Alfa ni Omega”. Moolumo ala manli, “Alfa” ni “Omega”, anithoonyerya nuulumo noopacerya ni nookiserya na alfapeeto a ekereku.
^ Eyo piiyo, yaale soowiira saya sinimunanara Muluku.
^ Nwehe Moolumo Ootthokiheriwa ani: “Orupihana woohiloka”.
^ Aahiiso, “noiva”.
^ Ekereku, “ale oowaarya”.
